ଖୋର୍ଦ୍ଧା: ଲିଙ୍ଗୁଇଷ୍ଟିକ ସୋସାଇଟି ଅଫ୍ ଇଣ୍ଡିଆର ୪୪ତମ ଅନ୍ତର୍ଜାତୀୟ ସମ୍ମିଳନୀ ଅନୁଷ୍ଠିତ । ଭାଷାବିଜ୍ଞାନୀମାନଙ୍କୁ ନେଇ ଗଠିତ ଲିଙ୍ଗୁଇଷ୍ଟିକ୍ ସୋସାଇଟି ଅଫ୍ ଇଣ୍ଡିଆର ଅନ୍ତର୍ଜାତୀୟ ସମ୍ମିଳନୀ ପ୍ରଥମ ଥର ଓଡ଼ିଶାର ସେଞ୍ଚୁରିଅନ ୟୁନିଭରସିଟିରେ ଅନୁଷ୍ଠିତ ହୋଇଛି । ଏହି ସମ୍ମିଳନୀରେ ବାଂଲାଦେଶ, କାନାଡା, ଜର୍ମାନୀ, ଜାପାନ, ଜୋର୍ଡାନ, କୁଏତ, ନେପାଳ, ପୋଲାଣ୍ଡ, ସାଉଦି ଆରବ, ୟୁକ୍ରେନ, ଭାରତ ଏବଂ ଆମେରିକା ଭଳି ଅନେକ ଦେଶରୁ ବହୁ ପ୍ରତିନିଧି ଯୋଗ ଦେଇଛନ୍ତି ।
ଉଦ୍ଘାଟନୀ ଅଧିବେଶନରେ ରାଜ୍ୟପାଳ ପ୍ରଫେସର ଗଣେଶୀ ଲାଲ୍ ସାମିଲ ହୋଇଥିଲେ । ଭାଷାର ପରିବ୍ୟାପ୍ତି ବିଷୟରେ ବିସ୍ତୃତ ଭାବେ ବୁଝାଇ କହିଥିଲେ ଯେ, "ଭାଷା ବ୍ୟବହାର ପାଇଁ ଲିପି ହୁଏତ ଏକ ମାଧ୍ୟମ ହୋଇପାରେ ହେଲେ ମନରଭାଷା, ମସ୍ତିସ୍କର ଭାଷା, ଇସାରାର ଭାଷା ଆଦି ବ୍ୟବହାରରେ ଲିପିର ଆବଶ୍ୟକତା ନଥାଏ । ଭାଷା କିଭଳି, କେମିତି, କାହିଁକି, କେଉଁଠାରେ କୁହାଯାଉଛି ତାହାହିଁ ବଡକଥା ।"
ରାଜ୍ୟପାଳ ବିଭିନ୍ନ ଭାଷାର ଉଦାହରଣ ଦେଇ ମାତୃଭାଷାର ମହତ୍ଵ କଥା କହିଥିଲେ । ଭାଷା ଯୋଡ଼େ, ଭାଷା ଗଢେ ବୋଲି ମତଦେଇ ପ୍ରଫେସର ଗଣେଶୀ ଲାଲ ଏହି ଅନ୍ତର୍ଜାତୀୟ ସମ୍ମିଳନୀର ସଫଳତା କାମନା କରିଛନ୍ତି ।
ଇଟିଭି ଭାରତ, ଖୋର୍ଦ୍ଧା
