ଖୋର୍ଦ୍ଧା : ନିଶା ମାଫିଆ ଛୋଟାକୁ ଏସ୍ଟିଏଫ୍ ରିମାଣ୍ଡରେ ନେବାପରେ ଜଣକ ପରେ ଜଣେ ନିଶା ବେପାରୀଙ୍କୁ ପୋଲିସ ଓ ଅବକାରୀ ବିଭାଗ ଗିରଫ କରୁଛି । ଦିନକ ତଳେ ନୂଆ ବସଷ୍ଟାଣ୍ଡରୁ ଜିଲ୍ଲା ଅବକାରୀ ବିଭାଗ ଜଣେ ବ୍ରାଉନସୁଗାର ବ୍ୟବସାୟୀକୁ ଗିରଫ କରିଥିବାବେଳେ ଶୁକ୍ରବାର ଜଟଣୀ ପୋଲିସ ଏହି ବ୍ୟବସାୟ ଚଳାଉଥିବା ଦମ୍ପତ୍ତିଙ୍କୁ ଗିରଫ କରିଛି । ସେପଟେ ଖୋର୍ଦ୍ଧା ଆଦର୍ଶ ଥାନା ପୋଲିସ ଚର୍ଚ୍ଚା ହେଉଥିବା ଲେଡି ଡନର ସହଯୋଗୀକୁ ଧଳାଜହର ବିକ୍ରି କରୁଥିବା ଅଭିଯୋଗରେ ଗିରଫ କରିଛି ।
ଜଟଣୀ ନୂଆଗାଁ ଅଞ୍ଚଳର ଜଗମୋହନ ପଟ୍ଟନାୟକ ଓ ତାଙ୍କ ପତ୍ନୀ ଆଜି ବ୍ରାଉନସୁଗାର ବେପାର କରୁଥିବା ସମୟରେ ଅଚାନକ ଚଢାଉ କରି ପୋଲିସ ଦୁଇ ଜଣଙ୍କୁ ଗିରଫ କରିଥିଲା । ସେହିପରି ଆଦର୍ଶ ଥାନା ପୋଲିସ ଲେଡି ଡନର ସହଯୋଗୀ ସରସ୍ୱତୀ ପଲେଇକୁ ଗିରଫ କରିଛି ।
ଦମ୍ପତିଙ୍କ ଠାରୁ 8 ଗ୍ରାମ ବ୍ରାଉନସୁଗାର, 1200 ଟଙ୍କା ସହ ମୋବାଇଲ ଫୋନ ଓ ଗୋଟିଏ ବାଇକ୍ ଜବତ ହୋଇଛି । ଅନ୍ୟପଟେ ସରସ୍ବତୀଙ୍କ ଠାରୁ ନଗଦ 4ଲକ୍ଷ 43ହଜାର 990ଟଙ୍କା ଜବତ କରିବା ସହ 12ଗ୍ରାମ ବ୍ରାଉନସୁଗାର ଜବତ କରିଛି ପୋଲିସ । ଯାହାର ଆନୁମାନିକ ମୂଲ୍ୟ 20ହଜାର ଟଙ୍କା ହେବ ବୋଲି ଜଣାପଡିଛି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
