ଭୁବନେଶ୍ବର: ଜଣକ ବଦଳରେ ରାଜଧାନୀରେ ରହିବେ ୨ଜଣ ଡିସିପି । ସହରରେ ଜନସଂଖ୍ୟା ବୃଦ୍ଧି ଯୋଗୁଁ ପୋଲିସ ଜିଲ୍ଲାକୁ ଦୁଇ ଭାଗ କରାଯିବ ନେଇ ସୂଚନା ଦେଇଛନ୍ତି କମିଶନର ସତ୍ୟଜିତ ମହାନ୍ତି ।
ରାଜଧାନୀରେ ଜନସଂଖ୍ଯା ବୃଦ୍ଧି ସହ ଗାଡି, ଅପରାଧ ମଧ୍ୟ ବଢ଼ିବାରେ ଲାଗିଛି । ସହରକୁ ଅପରାଧ ମୁକ୍ତ କରିବାକୁ ଏପରି ନିଷ୍ପତ୍ତି ନିଆଯାଇଥିବା କହିଛନ୍ତି କମିଶନର । ଏଥିସହିତ ସହରରେ 3ଟି ନୂଆ ଥାନା ଗଠନ ପାଇଁ ଡ଼ିଜିପିଙ୍କୁ ପ୍ରସ୍ତାବ ମଧ୍ୟ ସେ ଦେଇଛନ୍ତି । ସହିଦ ନଗର, ଖଣ୍ଡଗିରି ଓ ମାନେଶ୍ୱର ଥାନାକୁ ବିଭକ୍ତ କରାଯିବ । ସେହିପରି ରାଜଧାନୀକୁ ଦୁଇଟି ୟୁପିଡ଼ିରେ ବିଭକ୍ତ କରାଯିବ । ଯଥା ଉତ୍ତର ଜୋନ ଏବଂ ଅନ୍ଯଟି ଦକ୍ଷିଣ ଜୋନ୍ ।
ଗୋଟିଏ ଜୋନ ଅଧିନରେ 11ଟି ଲେଖାଏଁ ଥାନା ରହିବ । ତେବେ ଉତ୍ତର ଜୋନରେ ଚନ୍ଦ୍ରଶେଖରପୁର ଥାନା, ଚନ୍ଦକା ଥାନା, ଖଣ୍ଡଗିରି ଥାନା, ନାୟପାଲି ଥାନା ଇନଫୋସିଟି ଥାନା ଇତ୍ୟାଦି ରହିବ । ସେହିପରି ଦକ୍ଷିଣ ଜୋନରେ ସହିଦନଗର, ବାଲିଅନ୍ତା, ଧଉଳି, କ୍ୟାପିଟାଲ ଓ ଲକ୍ଷ୍ମୀସାଗର ଥାନା ରହିବ । ଏହା ଦ୍ୱାରା ସହରରେ ମୁଖ୍ୟତଃ ଅପରାଧ ନିୟନ୍ତ୍ରଣ ହେବା ସହ କ୍ରାଇମ୍ ଉପରେ ବିଶେଷ ଧ୍ୟାନ ଦିଆଯାଇ ପାରିବ ବୋଲି କମିଶନର ସତ୍ଯଜିତ ମହାନ୍ତି କହିଛନ୍ତି ।
ଭୁବନେଶ୍ବରରୁ ବିକାଶ ଦାସ, ଇଟିଭି ଭାରତ