ରାଜ ରାଜେଶ୍ୱରୀ ବେଶରେ ଦର୍ଶନ ଦେଇଛନ୍ତି ମା' ସମଲେଶ୍ୱରୀ

କୁମାର ପୂର୍ଣ୍ଣିମା ଅବସରରେ ସମ୍ବଲପୁରର ଅଧିଷ୍ଠାତ୍ରୀ ଦେବୀ ମା' ସମଲେଶ୍ୱରୀ ରାଜରାଜେଶ୍ୱରୀ ବେଶରେ ଶ୍ରଦ୍ଧାଳୁଙ୍କୁ ଦର୍ଶନ ଦେଉଛନ୍ତି ।

ସମ୍ବଲପୁର: ଆଜି ହେଉଛି କୁମାର ପୂର୍ଣ୍ଣିମା ବା ଦଶହରା ପୂର୍ଣ୍ଣିମା l ଆଉ ପ୍ରତ୍ୟେକ ବର୍ଷ ଆଜିର ତିଥିରେ ସମ୍ବଲପୁରର ଅଧିଷ୍ଠାତ୍ରୀ ଦେବୀ ମା' ସମଲେଶ୍ୱରୀ ରାଜରାଜେଶ୍ୱରୀ ବେଶ ବା ମହାରାଣୀ ବେଶରେ ଶ୍ରଦ୍ଧାଳୁମାନଙ୍କୁ ଦର୍ଶନ ଦିଅନ୍ତି l ଏହି ପରମ୍ପରା ଶହ ଶହ ବର୍ଷ ପୁରୁଣା l ରାଜା ରାଜୁଡା ଅମଳରୁ ଏହି ପରମ୍ପରା ଚାଲି ଆସିଛି l ତ୍ରେତୟା ଯୁଗରେ ମଧ୍ୟ ପ୍ରଭୁ ଶ୍ରୀରାମ ରାବଣର ବଦ୍ଧ କଲା ପରେ ମା' ଦୁର୍ଗାଙ୍କ ଏହି ବେଶର ଦର୍ଶନ କରି ପୂଜା କରିଥିଲେ ବୋଲି ବିଶ୍ୱାସ ରହିଥିବା ପୂଜକ କୁହନ୍ତି l

ମା' ସମଲେଶ୍ୱରୀଙ୍କ ରାଜରାଜେଶ୍ୱରୀ ବେଶ:

ଆଜି ମଧ୍ୟ ଅପରାହ୍ନ 1 ଟାରୁ ସାଢେ 3 ଟା ପର୍ଯ୍ୟନ୍ତ ମା'ଙ୍କୁ ପାରମ୍ପରିକ ରୀତିନୀତି ଅନୁସାରେ ପୂଜାର୍ଚ୍ଚନା କରାଯାଇ ବିଭିନ୍ନ ଅଳଙ୍କାରରେ ଅଭୁଷିତ କରାଯାଇ ମା' ସମଲେଶ୍ୱରୀଙ୍କୁ ରାଜରାଜେଶ୍ୱରୀ ବେଶରେ ସଜ୍ଜିତ କରାଯାଇଥିଲା l ଏହା ପରେ ଅପରାହ୍ନ 4 ଟା ପରେ ଶ୍ରଦ୍ଧାଳୁମାନଙ୍କୁ ମା'ଙ୍କ ଦର୍ଶନ ପାଇଁ ଛଡା ଯାଇଥିଲା l ମା'ଙ୍କ ଏହି ଦୁର୍ଲଭ ବେଶର ଦର୍ଶନ କଲେ କୋଟି ପୁଣ୍ୟ ମିଳିଥାଏ ବୋଲି ମାନ୍ୟତା ରହିଛି l ଏଥିପାଇଁ ଆଜି ମା'ଙ୍କ ଦର୍ଶନ ପାଇଁ ବହୁ ସଂଖ୍ୟକ ଭକ୍ତଙ୍କ ସମାଗମ ହୋଇଥିଲା l ଏହି ଅବସରରେ ସମଲେଶ୍ୱରୀ ମନ୍ଦିର ଟ୍ରଷ୍ଟ ବୋର୍ଡ ପକ୍ଷରୁ ସ୍ୱତନ୍ତ୍ର ବ୍ୟବସ୍ଥା ଗ୍ରହଣ କରାଯାଇଛି l

MAA SAMALESWARI TEMPLE (ETV Bharat Odisha)

ଧ୍ୱଜା ପରିବର୍ତ୍ତନ ପରମ୍ପରା:

ଆଜିର ଦିନରେ ପ୍ରତ୍ୟେକ ବର୍ଷ ମା'ଙ୍କ ମନ୍ଦିରର ଧ୍ୱଜା ପରିବର୍ତ୍ତନ କରିବାର ପରମ୍ପରା ରହିଛି l ଆଜି ରାତି ସାଢେ 7 ଟା ପରେ ପାରମ୍ପରିକ ରୀତିନୀତିରେ ପୂଜା ସରିଲା ପରେ ଝଣ୍ଡା ପୂଜା କରାଯାଇ ଝଣ୍ଡାକୁ 3 ଥର ବେଢା ପରିକ୍ରମା କରାଗଲା ପରେ ରାତି ପ୍ରାୟ 8 ଟା ସମୟରେ ମା'ଙ୍କ ମନ୍ଦିରର ପୁରୁଣା ଝଣ୍ଡା ବା ଧ୍ୱଜାକୁ ଓହ୍ଲାଇ ନୂତନ ଧ୍ୱଜାରୋହଣ କରାଯିବ l ଏହି ଅବସରରେ ଆଖଡ଼ା ଖେଳର ପ୍ରଦର୍ଶନ କରାଯିବ l ଏହି ଦିନ ମା'ଙ୍କ ପୁରୁଣା ଧ୍ୱଜାର କିଛି ଅଂଶ ଶ୍ରଦ୍ଧାଳୁ ମାନେ ନିଜ ଘରକୁ ନିଅନ୍ତି l ଏହା ଦ୍ୱାରା ପରିବାରର ସୁଖ ସମୃଦ୍ଧି ବୃଦ୍ଧି ପାଇଥାଏ ବୋଲି ବିଶ୍ୱାସ ରହିଛି l

ଇଟିଭି ଭାରତ,ସମ୍ବଲପୁର