ଭୁବନେଶ୍ବର: କେନ୍ଦ୍ର ଓ ରାଜ୍ୟ ସରକାରଙ୍କ ବିରୋଧରେ ଓଡ଼ିଶାରୁ ଯୁଦ୍ଧଂଦେହୀ ଡାକରା ଦେଲା ବିଜେପି ଓ ବିଜେଡି ବିରୋଧୀ ମେଣ୍ଟ ଇଣ୍ଡିଆ । ଆଜି ଏହି ବିରୋଧୀ ମେଣ୍ଟ ଇଣ୍ଡିଆର ଓଡ଼ିଶା ମିଳିତ ବିରୋଧୀ ଦଳ ଏକତାର ରାଜନୈତିକ ସମ୍ମିଳନୀ ଅନୁଷ୍ଠିତ ହୋଇଛି । ୧୭ଟି ବିରୋଧୀ ରାଜନୈତିକ ଦଳକୁ ନେଇ ଅନୁଷ୍ଠିତ ହୋଇଛି ଏହି ସମ୍ମିଳନୀ । ଓଡ଼ିଶାକୁ ସର୍ବଶ୍ରେଷ୍ଠ ରାଜ୍ୟ କରିବା ପାଇଁ ଗାଁ ଗାଁରେ ଜୋରଦାର ଆନ୍ଦୋଳନ କରିବା ପାଇଁ ଏହି ସମ୍ମିଳନୀରେ ନିଷ୍ପତ୍ତି ହୋଇଛି ।
'ମୋଦି ହଟାଅ ଦେଶ ବଞ୍ଚାଅ, ନବୀନ ହଟାଅ ଓଡ଼ିଶା ବଞ୍ଚାଅ' ନାରା ଦେଇ ବିରୋଧୀ ଦଳ ଆଗକୁ ବଢିବ । ଆସନ୍ତା ଅଗଷ୍ଟ ୨୫ ତାରିଖରୁ ବେରୋଜଗାରୀ, ସାମାଜିକ ନ୍ୟାୟ, ବେକାରୀ ସମସ୍ୟା, ଦରଦାମ ବୃଦ୍ଧି ଭଳି ପ୍ରମୁଖ ମୁଦ୍ଦାକୁ ନେଇ ଜନସାଧାରଣଙ୍କ ପାଖକୁ ଯିବ ବିରୋଧୀ ମେଣ୍ଟ ଇଣ୍ଡିଆ । ମୋଦି ଏବଂ ନବୀନ ସରକାର ବିରୋଧରେ ଲଢେଇ କରିବା ପାଇଁ ବିରୋଧୀ ଏକାଠି ହୋଇଥିବାରୁ ଉଭୟ ସରକାର ଭୟଭୀତ ହୋଇଥିବା ପିସିସି ସଭାପତି ଶରତ ପଟ୍ଟନାୟକ କହିଛନ୍ତି ।
ସେ କହିଛନ୍ତି, "ଲୋକସଭାରେ ପ୍ରଧାନମନ୍ତ୍ରୀ ମଣିପୁର କେବେ ଯିବେ ତାରିଖ ଘୋଷଣା କରିପାରିଲେନାହିଁ । ଓଡ଼ିଶା ସମ୍ବନ୍ଧରେ ଭୁଲ ତଥ୍ୟ ଦେଲେ । ଏହାକୁ ସମସ୍ତ ବିରୋଧୀ ଦଳ ନିନ୍ଦା କରୁଛୁ । ପ୍ରଧାନମନ୍ତ୍ରୀଙ୍କ ମନମୁତାବକ ଇଲେକ୍ସନ କମିଶନ ନିଯୁକ୍ତି ବିଲକୁ ମଧ୍ୟ ନିନ୍ଦା କରୁଛୁ । ଦେଶର ଆତ୍ମା ହେଉଛି ସମ୍ବିଧାନ । ଗଣତନ୍ତ୍ର ନାଁରେ ମୋଦି ସରକାରଙ୍କ ଅନ୍ୟାୟ ଚଳିବ ନାହିଁ । ନବୀନ ସରକାର ପୂର୍ବରୁ ବିଲ ଗୁଡିକୁ ସିଧାସଳଖ ସମର୍ଥନ କରୁନଥିଲେ । କିନ୍ତୁ ଏବେ ସିଧାସଳଖ ସମର୍ଥନ କରୁଛନ୍ତି । ବିଜେଡି ଏବଂ ବିଜେପିକୁ ଓଡ଼ିଶା ମାଟିରୁ ବରଖାସ୍ତ କରିବା ପାଇଁ ଆମେ ୧୭ଟି ଦଳ ଏକ ହୋଇଛୁ ।"
