କେନ୍ଦୁଝର: ଦିନକୁ ଦିନ ମହିଳାଙ୍କ ଉପରେ ନିର୍ଯ୍ୟାତନା ଅଭିଯୋଗ ସଂଖ୍ୟା ବୃଦ୍ଧି ପାଇଛି । ତେବେ ଏହି ସମସ୍ୟା ସରକାରଙ୍କ ମୁଣ୍ଡବିନ୍ଧାର କାରଣ ହୋଇଥିବା ବେଳେ ଏହାର ସମାଧାନ ପାଇଁ ହାତ ବଢାଇଛି ରାଜ୍ୟ ମହିଳା ଆୟୋଗ ।
ରାଜ୍ୟ ମହିଳା ଆୟୋଗ ରାଜ୍ୟ କେନ୍ଦ୍ର ସ୍ଥଳୀ ଛାଡି ସବୁ ଜିଲ୍ଲାରେ କ୍ୟାମ୍ପ କୋର୍ଟ ମାଧ୍ୟମରେ ଏସବୁ ମାମଲାର ସମାଧାନ କରୁଛନ୍ତି । ଶୁକ୍ରବାର କେନ୍ଦୁଝର ଜିଲ୍ଲାପାଳଙ୍କ ଦରବାର ହଲ ଠାରେ ମହିଳା ଆୟୋଗ ପକ୍ଷରୁ ଶିବିର ଅଦାଲତର ଆୟୋଜନ କରାଯାଇଥିଲା । ରାଜ୍ୟ ମହିଳା ଆୟୋଗର ଅଧ୍ୟକ୍ଷା ଡ ମିନତୀ ବେହେରାଙ୍କ ଅଧ୍ୟକ୍ଷତାରେ ତିନି ଜଣିଆ ପ୍ରତିନିଧି ଦଳ ଏହି ଅଦାଲତରେ ସାମିଲ ହୋଇ ଶିବିରକୁ ପରିଚାଳନା କରିଥିଲେ ।
ଶୁକ୍ରବାର ଏହି ଶିବିରରେ 48ଟି ମାମଲାର ଆପୋଷ ସମାଧାନ କରିଥିଲେ ମହିଳା ଆୟୋଗ । ଏହାସହ କେନ୍ଦୁଝର ସହରରେ ଥିବା ସୁଧାର ଗୃହ ଓ ଜିଲ୍ଲା ମୁଖ୍ୟ ଚିକିତ୍ସାଳୟରେ ଥିବା ସଖୀ କାର୍ଯ୍ୟାଳୟ ପରିଦର୍ଶନ କରିଥିଲେ । ମହିଳା ଆୟୋଗ ଜିଲ୍ଲା ମୁଖ୍ୟ ଚିକିତ୍ସାଳୟରେ ମହିଳା ଓ ଶିଶୁ ବିକାଶ ୱାର୍ଡରେ ବୁଲି ଡାକ୍ତରୀ ଚିକିତ୍ସା ସମ୍ବନ୍ଧରେ ପଚାରି ବୁଝିଥିଲେ ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
