ଭୁବନେଶ୍ବର: କେନ୍ଦୁଝର ଜିଲ୍ଲାର ସୁଲେଇଖମାରରେ ସ୍ଥିତ ମହାରାଜା ଶ୍ରୀରାମଚନ୍ଦ୍ର ଭଞ୍ଜଦେଓ ବିଶ୍ବବିଦ୍ୟାଳୟର ଦ୍ବିତୀୟ କ୍ୟାମ୍ପସକୁ ଧରଣୀଧର ବିଶ୍ବବିଦ୍ୟାଳୟକୁ ହସ୍ତାନ୍ତର କରିବାକୁ ରାଜ୍ୟ ସରକାର ନିଷ୍ପତ୍ତି ନେଇଛନ୍ତି । ଏଥିପାଇଁ ଆରମ୍ଭ ହୋଇଛି ଉଚ୍ଚଶିକ୍ଷା ବିଭାଗ ପକ୍ଷରୁ ପ୍ରକ୍ରିୟା । କେନ୍ଦୁଝର ଠାରେ ଥିବା ଶ୍ରୀରାମଚନ୍ଦ୍ର ଭଞ୍ଜଦେଓ ବିଶ୍ବବିଦ୍ୟାଳୟର ଦ୍ବିତୀୟ କ୍ୟାମ୍ପସ ପାଇଁ ମଞ୍ଜୁର ହୋଇଥିବା ସମସ୍ତ ପଦବୀ ଡିଡି ବିଶ୍ବବିଦ୍ୟାଳୟକୁ ସ୍ଥାନାନ୍ତର କରାଯିବ ।
ମହାରାଜା ଶ୍ରୀରାମଚନ୍ଦ୍ର ଭଞ୍ଜଦେଓ ବିଶ୍ବବିଦ୍ୟାଳୟର ଦ୍ବିତୀୟ କ୍ୟାମ୍ପସରେ ନାମ ଲେଖାଇଥିବା ସମସ୍ତ ଛାତ୍ରଛାତ୍ରୀ ପାଠ୍ୟକ୍ରମ ଶେଷ ହେବା ପର୍ଯ୍ୟନ୍ତ ମହାରାଜା ଶ୍ରୀରାମଚନ୍ଦ୍ର ଭଞ୍ଜଦେଓ ବିଶ୍ବବିଦ୍ୟାଳୟ ଅଧୀନରେ ରହିବେ । ୨୦୨୩-୨୪ ଶିକ୍ଷାବର୍ଷରୁ ଶ୍ରୀରାମଚନ୍ଦ୍ର ଭଞ୍ଜଦେଓ ବିଶ୍ବବିଦ୍ୟାଳୟର ଦ୍ବିତୀୟ କ୍ୟାମ୍ପସରେ କୌଣସି ନାମଲେଖା ହେବ ନାହିଁ । ଯେଉଁ ଛାତ୍ରଛାତ୍ରୀ ନାମ ଲେଖାଇବେ ତାହା କେବଳ ଧରଣୀଧର ବିଶ୍ବବିଦ୍ୟାଳୟ ପାଇଁ ଉଦ୍ଦିଷ୍ଟ ହେବ । ଧରଣୀଧର ବିଶ୍ବବିଦ୍ୟାଳୟକୁ ବାଛିଥିବା ଏମଏସସିବି ବିଶ୍ବବିଦ୍ୟାଳୟର ଦ୍ବିତୀୟ କ୍ୟାମ୍ପସର ଶିକ୍ଷାଦାନ ଦେଉଥିବା ଅଧ୍ୟାପିକାମାନେ ଧରଣୀଧର ବିଶ୍ବବିଦ୍ୟାଳୟରେ ଖାଲି ଥିବା ପଦବୀରେ ରହିବେ।
ଓଡିଆର ଜଣେ ଅଧ୍ୟାପକ ଯିଏ ମହାରାଜା ଶ୍ରୀରାମଚନ୍ଦ୍ର ଭଞ୍ଜଦେଓ ବିଶ୍ବବିଦ୍ୟାଳୟକୁ ଯିବାକୁ ଇଚ୍ଛା କରିଥିଲେ, କିନ୍ତୁ ମହାରାଜା ଶ୍ରୀରାମଚନ୍ଦ୍ର ଭଞ୍ଜଦେଓ ବିଶ୍ବବିଦ୍ୟାଳୟରେ ଓଡିଆର କୌଣସି ପଦବୀ ନ ଥିବାରୁ ସେ ଧରଣୀଧର ବିଶ୍ବବିଦ୍ୟାଳୟରେ ଅବଶୋଷିତ ହୋଇ ମହାରାଜା ଶ୍ରୀରାମଚନ୍ଦ୍ର ଭଞ୍ଜଦେଓ ବିଶ୍ବବିଦ୍ୟାଳୟରେ ନିୟୋଜିତ ହୋଇପାରନ୍ତି । ମହାରାଜା ଶ୍ରୀରାମ ଭଞ୍ଜଦେଓ ବିଶ୍ବବିଦ୍ୟାଳୟର ଦ୍ବିତୀୟ କ୍ୟାମ୍ପସରେ ୨୦୨୩ରୁ ୨୪ ପର୍ଯ୍ୟନ୍ତ କୌଣସି ନୂତନ ଆଡମିଶନ କରାଯିବ ନାହିଁ । ଏହି ପରିସରରେ ନୂତନ ଆଡମିଶନ କେବଳ ଡିଡି ବିଶ୍ବବିଦ୍ୟାଳୟ ଅଧୀନରେ କରାଯିବ ।
ମହାରାଜା ଶ୍ରୀରାମଚନ୍ଦ୍ର ଭଞ୍ଜଦେଓ ବିଶ୍ବବିଦ୍ୟାଳୟର ରେଜିଷ୍ଟ୍ରାର ନାମଲେଖା ପକ୍ରିୟା କରିବେ । ତେବେ ଦ୍ବିତୀୟ କ୍ୟାମ୍ପସର ସମସ୍ତ ଅଫିସିଆଲ ଫାଇଲ୍, ରେକର୍ଡ, ଡକ୍ୟୁମେଣ୍ଟ ଡିଡି ବିଶ୍ବବିଦ୍ୟାଳୟକୁ ହସ୍ତାନ୍ତର କରିବାକୁ ନିଷ୍ପତ୍ତି ହୋଇଛି । ସୂଚନା ଅନୁଯାୟୀ ରାଜ୍ୟରେ ଯୁକ୍ତ ତିନି ଏବଂ ଯୁକ୍ତ ଦୁଇ କଲେଜ ଅଲଗା ନେଇ ବିଭିନ୍ନ ପ୍ରକାରର ପଦକ୍ଷେପ ନିଆଯାଇଛି । ଏମିତିକି ଭୁବନେଶ୍ଵରର ରମାଦେବୀ ବିଶ୍ଵବିଦ୍ୟାଳୟରୁ ଯୁକ୍ତ ଦୁଇ ଅଲଗା ହୋଇ ୟୁନିଟ୍ ୯ ବାଳିକା ସ୍କୁଲରେ କରାଯିବା ନେଇ ନିଷ୍ପତ୍ତି ହୋଇଥିଲା । ଏଭଳି କି ସମ୍ବଲପୁରରେ ଥିବା ଗଙ୍ଗାଧର ମେହେର ବିଶ୍ଵବିଦ୍ୟାଳୟରୁ ମଧ୍ୟ ଯୁକ୍ତ ଦୁଇ ଅଲଗା ନେଇ ଉଚ୍ଚଶିକ୍ଷା ବିଭାଗ ବିଚାର ବିମର୍ଶ ଆରମ୍ଭ କରିଛି ।
ଇଟିଭି ଭାରତ, ଭୁବନେଶ୍ବର
