ସମ୍ପତ୍ତି ଆଗରେ ଫିକା ପଡିଲା ସମ୍ପର୍କ, ଦାଦାର ତଣ୍ଟି ଚିପିଲା ପୁତୁରା

ସମ୍ପତ୍ତି ପାଇଁ ପୁତୁରା ଭୁଲିଗଲା ରକ୍ତ ସମ୍ପର୍କ । ଆନନ୍ଦପୁରରେ ଦାଦା ବେକରେ ଗାମୁଛା ପକାଇ ପୁତୁରା ଝିଆରିଙ୍କ ହତ୍ୟା ଉଦ୍ୟମ । ଗୁରୁତର ଅବସ୍ଥାରେ ଦାଦା ଗୋପାଳ ସାହୁଙ୍କୁ ଉଦ୍ଧାର କରି ମେଡିକାଲରେ ଭର୍ତ୍ତି କରାଯାଇଛି ।

ଆନନ୍ଦପୁର: ସମ୍ପତ୍ତି ଆଗରେ ଦେଖାଗଲାନି ରକ୍ତ ସମ୍ପର୍କ । ଗାମୁଛା ପକାଇ ଦାଦାର ତଣ୍ଟି ଚିପିଲା ପୁତୁରା । ଏଭଳି ଘଟଣା ଘଟିଛି ଆନନ୍ଦପୁର ଥାନା ଅନ୍ତର୍ଗତ କୋଡ଼ପଡ଼ା ଗାଁରେ । ଘର ବାଡ଼ି ବିବାଦକୁ କେନ୍ଦ୍ର କରି ଦେଖାଦେଇଛି ଉତ୍ତେଜନା ।

ଘଟଣାରୁ ପ୍ରକାଶ ଯେ କୋଡ଼ପଡ଼ା ଗାଁର ଗୋପାଳ ସାହୁ ନିଜ ଘର କାମ କରୁଥିବା ବେଳେ ଏହି ସମୟରେ 2ଜଣ ପୁତୁରା ସଞ୍ଜୟ କୁମାର ସାହୁ, କୃଷ୍ଣ ସାହୁ ଓ ଜଣେ ଝିଆରୀ ପ୍ରିୟଙ୍କା ସାହୁ ମିଳିତ ଭାବରେ ନିଜ ଦାଦା ଗୋପାଳ ସାହୁଙ୍କୁ ଆକ୍ରମଣ କରିବା ସହ ହତ୍ୟା ଉଦ୍ଦେଶ୍ୟରେ ଗାମୁଛା ଗୁଡ଼ାଇ ନିଜ ଦାଦାର ତଣ୍ଟିକୁ ଚାପି ଦେଇଥିଲେ ।

ଫଳରେ ଦାଦା ଗୋପାଳ ସାହୁ ଖଣ୍ଡିଆ ଖାବରା ହୋଇ ସଂଜ୍ଞାହୀନ ହୋଇ ପଡ଼ିଥିଲେ । ତାଙ୍କୁ ଗୁରୁତର ଅବସ୍ଥାରେ ଉପଖଣ୍ଡ ଚିକିତ୍ସାଳୟ ଆନନ୍ଦପୁରରେ ଭର୍ତ୍ତି କରାଯାଇଛି । ଏହାକୁ ନେଇ ଆନନ୍ଦପୁର ଥାନାରେ ଆହତଙ୍କ ପରିବାର ପକ୍ଷରୁ ଏତଲା ଦିଆଯାଇଛି । ଘଟଣାର ତଦନ୍ତ କରୁଛି ପୋଲିସ ।

ଆନନ୍ଦପୁରରୁ ସ୍ମୃତି ରଞ୍ଜନ ବିହାରୀ, ଇଟିଭି ଭାରତ