କେନ୍ଦୁଝର: ସ୍ଥାନୀୟ କେନ୍ଦୁଝର ସଦର ଥାନା ଶୁଆକାଠି ଫାଣ୍ଡି ଅନ୍ତର୍ଗତ 49 ନଂ ଜାତୀୟ ରାଜପଥ ଠାକୁରଡିହି ନିକଟରେ ଲୁଟ ହୋଇଥିବା ଅଭିଯୋଗ ହୋଇଛି। ଉତ୍କଳ କାରଗୋ ନାମକ ଏକ ଖଣିଜ ପଦାର୍ଥ ପରିବହନ ସଂସ୍ଥାର କର୍ମଚାରୀମାନେ ନଗଦ 8 ଲକ୍ଷରୁ ଉର୍ଦ୍ଧ୍ବ ଟଙ୍କା ଧରି କେନ୍ଦୁଝରରୁ ଶୁଆକାଠିସ୍ଥିତ ଓଏମସି ଖଣିକୁ ଯାଉଥିବା ବେଳେ ଏହି ଲୁଟ ହୋଇଥିବା ଜଣାପଡିଛି ।
ଲୁଟର ଶିକାର ହୋଇଥିବା କର୍ମଚାରୀଙ୍କ କହିବା ମୁତାବକ ଏକ ନମ୍ବର ବିହୀନ କଳା ପଲସରରେ ତିନି ଜଣ ଦୁର୍ବୃତ୍ତ ଆସି ସେମାନଙ୍କୁ ଅଟକାଇ ବନ୍ଧୁକ ଦେଖାଇ ଭୁଜାଲିରେ ଆକ୍ରମଣ କରିଥିଲେ । ଏହା ସତ୍ତ୍ବେ ପରିବହନ କର୍ମଚାରୀମାନେ ଟଙ୍କା ନଦେବାରୁ ଦୁର୍ବୃତ୍ତମାନେ ଗୁଳି ଚଳାଇବାକୁ ପଛାଇ ନଥିଲେ । ଶେଷରେ ପ୍ରାଣ ଭୟରେ ଟଙ୍କା ବ୍ୟାଗକୁ ଛାଡି କର୍ମଚାରୀମାନେ ଜୀବନ ବଞ୍ଚାଇ ସେଠାରୁ ଚାଲି ଯାଇଥିଲେ ।
ଦୁର୍ବୃତ୍ତମାନେ ସୁଯୋଗ ନେଇ ଟଙ୍କା ବ୍ୟାଗ ଧରି ଚମ୍ପଟ ମାରିଥିଲେ । ଖବର ପାଇ ଘଟଣାସ୍ଥଳରେ ସଦର ପୋଲିସ ପହଞ୍ଚି ତଦନ୍ତ ଜାରି ରଖିଛି । ବିଗତ କିଛି ମାସ ମଧ୍ୟରେ ଏଭଳି ଲୁଟ ଓ ଚୋରି କେନ୍ଦୁଝର ଜିଲ୍ଲାରେ ସାଧାରଣ ପାଲଟିଥିବା ବେଳେ ପୋଲିସ ଏହାର ଟେର ପାଉ ନଥିବା ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
