କେନ୍ଦୁଝର: ପ୍ରଧାନ ଶିକ୍ଷୟତ୍ରୀଙ୍କ ବଦଳି ଦାବିରେ ବଡନେଉଳି ସ୍କୁଲ ଫାଟକରେ ଝୁଲିଲା ତାଲା । ସ୍କୁଲ ସମ୍ମୁଖରେ ପାଠ ପଢିଲେ ଛାତ୍ରଛାତ୍ରୀ ।
ଏପରି ଘଟଣା ଦେଖିବାକୁ ମିଳିଛି କେନ୍ଦୁଝର ଜିଲ୍ଲା ଝୁମ୍ପୁରା ବ୍ଲକ ବଡ଼ନେଇଳି ଉଚ୍ଚ ବିଦ୍ୟାଳୟରେ । ସ୍କୁଲର ପ୍ରଧାନ ଶିକ୍ଷୟତ୍ରୀଙ୍କ ବଦଳି ଦାବି କରି ଫାଟକରେ ତାଲା ପକାଇଛନ୍ତି ଗ୍ରାମବାସୀ ।
ବିଦ୍ୟାଳୟରେ ନିମ୍ନମାନର ଖାଦ୍ୟ ସହିତ ଅଭିଭାବକ ମାନଙ୍କୁ ପ୍ରଧାନ ଶିକ୍ଷୟତ୍ରୀଙ୍କ ଦୁର୍ବ୍ୟବହାର ପ୍ରତିବାଦରେ ସ୍କୁଲ ଫାଟକରେ ତାଲା ପକାଇ ପ୍ରତିବାଦ କରିଛନ୍ତି ଛାତ୍ରଛାତ୍ରୀ ଏହଂ ଗ୍ରାମବାସୀ ।
ବିଦ୍ୟାଳୟର ପ୍ରଧାନ ଶିକ୍ଷୟତ୍ରୀ ହେନାରାଣୀ ସ୍ବାଇଁ ମନମୁଖୀ କାର୍ଯ୍ୟକୁ ନେଇ ଅଭିଭାବକଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଛି । ଯାହାର ପ୍ରତିବାଦରେ ଅଭିଭାବକ ମାନେ ସ୍କୁଲ ଫାଟକରେ ତାଲା ପକାଇଛନ୍ତି । ସ୍କୁଲ ଫାଟକରେ ତାଲା ପଡିଥିବାରୁ ଫାଟକ ସମ୍ମୁଖରେ ବସି ପାଠ ପଢୁଛନ୍ତି ଛାତ୍ରଛାତ୍ରୀ ।
ଏହା ପୂର୍ବରୁ ଗତ ଶନିବାର ମଧ୍ୟ ପ୍ରଧାନ ଶିକ୍ଷୟତ୍ରୀଙ୍କ ବଦଳି ଦାବି କରି ଫାଟକରେ ତାଲା ପକାଯାଇଥିଲା କିନ୍ତୁ କୌଣସି ସନ୍ତୋଷ ଜନକ ପ୍ରତିଶୃତି ନ ପାଇବାରୁ ଆଜି ପୁନର୍ବାର ସ୍କୁଲରେ ତାଲା ପକାଇ ପ୍ରତିବାଦ କରୁଛନ୍ତି ଉଭୟ ଅଭିଭାବକ ଓ ଛାତ୍ରଛାତ୍ରୀ ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
