ଆନନ୍ଦପୁର: ଡାକ୍ତରଖାନାରେ ହନ୍ତସନ୍ତ ରୋଗୀ। ରୋଗ ନିରାକରଣ ପାଇଁ ମିଳୁନି ସରକାରୀ ଔଷଧ। ଏପଟେ ମାଟିରେ ଖତ ଖାଉଛି ଗଦାଗଦା ମେଡିସିନ। ତେବେ ଆଳୁ ଖୋଳୁ ଖୋଳୁ ମହାଦେବ ବାହାରିବା ପରି ଏ ଘଟଣା ପୁରା ସମାନ।
ମୃତଦେହ ଖୋଜିବାକୁ ଯାଇ ପୋଲିସ ହାତରେ ଲାଗିଛି ପୋତା ମେଡିସିନର ଗନ୍ତାଘର। ଯାହା ସରକାରଙ୍କ ପାରିବାପଣିଆ ଓ 5'ଟି'ର ସଫଳ କାର୍ଯ୍ୟକାରୀତାକୁ ବାହାରେ ପକାଇଦେଇଛି। ଯାହାକୁ ଦେଖି ସ୍ଥାନୀୟ ଅଞ୍ଚଳରେ ଚର୍ଚ୍ଚା ସୃଷ୍ଟି ହୋଇଛି।
ସୂଚନା ଅନୁସାରେ, ଘଟଣାଟି ହେଉଛି କେନ୍ଦୁଝର ଜିଲ୍ଲା ହାଟଡ଼ିହି ବ୍ଲକ ଡିମିରିଆ ରାସ୍ତା ନିକଟର। ସକାଳୁ ସକାଳୁ ସଡଙ୍ଗ କଲେଜ ପାଖ ପଡିଆରେ ଏକ ମୃତଦେହ ପୋତାଯାଇଥିବା ଗୁଜବ ପ୍ରଚାରିତ ହୋଇଯାଇଥିଲା। ଖବର ପାଇ ନନ୍ଦିପଦା ପୁଲିସ ମାଜିଷ୍ଟ୍ରେଟ ଘଟଣାସ୍ଥଳରେ ପହଞ୍ଚିଥିଲେ। ଏହାସହ ଏକ ଜେସିବି ମେସିନ ଡାକି ମାଟି ଖୋଳିବା ଆରମ୍ଭ ହୋଇଥିଲା। କିନ୍ତୁ ଉକ୍ତ ସ୍ଥାନରୁ ମୃତଦେହ ମିଳିବା ବଦଳରେ ମାଟିତଳୁ ପୁଳା ପୁଳା ଏକ୍ସପାରୀ ଔଷଧ ବାହାରିଥିଲା। ତେବେ କିଏ ଓ କାହିଁକି ଏହି ଔଷଧ ଏଠାରେ ପୋତିଲା ତାହାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି।
ପୋଲିସ କିଛି ମେଡ଼ିସିନର ନମୁନା ସଂଗ୍ରହ କରି ଅବଶିଷ୍ଟ ପୋତିଦେଇଥିଲା। ସରକାର ବିଭିନ୍ନ ଯୋଜନାରେ ରୋଗୀ ମାନଙ୍କ ପାଇଁ ମାଗଣାରେ ଔଷଧ ଯୋଗାଇଦେଉଥିଲା ବେଳେ ତାହା ରୋଗୀଙ୍କୁ ଦିଆନଯାଇ କିପରି ପୋତା ଯାଉଛି ସେଥିପାଇଁ ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି ହେଉଛି।
ଆନନ୍ଦପୁରରୁ ସ୍ମୃତି ରଞ୍ଜନ ବିହାରୀ, ଇଟିଭି ଭାରତ
