କେନ୍ଦୁଝର: ଜଙ୍ଗଲମୟ ଜିଲ୍ଲା କେନ୍ଦୁଝର । ଜିଲ୍ଲାର ଅର୍ଦ୍ଧାଧିକ ଲୋକ ଏହି ବଣ ଜଙ୍ଗଲ ଭରା ଗାଁ ରେ ବସବାସ କରନ୍ତି । ଗାଁରେ ଚାଷବାସ କରି ବଣ ଜଙ୍ଗଲ ଉପରେ ନିର୍ଭର କରିଥାଆନ୍ତି ଗ୍ରାମବାସୀ । କିନ୍ତୁ ଏହି ବଣ ଜଙ୍ଗଲ ଅଭିଶାପ ପାଲିଟିଛି ବାଂଶପାଳ ବ୍ଳକ ଅନ୍ତର୍ଗତ ତାଳକାଦକଳା ପଞ୍ଚାୟତର ସୁଣ୍ଡୁରା ଗ୍ରାମବାସୀଙ୍କ ପାଇଁ ।
ଉକ୍ତ ଗ୍ରାମଟି ଖଣ୍ଡାଧାର ଜଳପ୍ରପାତ ନିକଟରେ ଅବସ୍ଥିତ । ଗ୍ରାମଟି ଜଙ୍ଗଲ ନିକଟରେ ଅବସ୍ଥିତ ଥିବାରୁ ସବୁବେଳେ ହାତୀ ଆକ୍ରମଣ ଭୟ ଘାରିଛି ଗ୍ରାମବାସୀଙ୍କୁ । ଉକ୍ତ ଅଞ୍ଚଳରେ ଦଶରୁ ଉର୍ଦ୍ଧ୍ବ ହାତୀ ବସବାସ କରୁଛନ୍ତି । ରାତି ହେଲେ ଦୁଇ ତିନି ହାତୀ ଆସି ଗ୍ରାମ ମଧ୍ୟରେ ଘର ଭାଙ୍ଗି ଧାନ ଚାଉଳ ଖାଇ ଯାଉଛନ୍ତି । ଏହି ହାତୀ ଭୟରେ ଗ୍ରାମର ପଚାଶରୁ ଉର୍ଦ୍ଧ୍ବ ଗ୍ରାମବାସୀ ମଞ୍ଚା ଉପରେ ରହିବାକୁ ବାଧ୍ୟ ହେଉଛନ୍ତି ।
ଦିନରେ ନିତ୍ୟକର୍ମ ସାରି ରାତିରେ ସୁଣ୍ଡୁରା ଗ୍ରାମବାସୀ ମଞ୍ଚା ଉପରେ ରହୁଛନ୍ତି । ଏପରିକି ଛୋଟ ଛୁଆଙ୍କୁ ଧରି ମହିଳା ମଧ୍ୟ ବିପଦ ସଂକୁଳ ଅବସ୍ଥାରେ ଏହି ମଞ୍ଚା ଉପରକୁ ଉଠି ହାତୀ ଠାରୁ ଜୀବନ ବଞ୍ଚାଇବାକୁ ଶ୍ରେୟ ମଣୁଛନ୍ତି । ନିଜ ଚାଷକୁ ହାତୀ କବଳରୁ ବଞ୍ଚାଇବାକୁ ଜମି ନିକଟରେ ମଧ୍ୟ ମଞ୍ଚା ବାନ୍ଧି ରହୁଛନ୍ତି ଚାଷୀ । ମାତ୍ର କିଛି ସୁଫଳ ମିଳୁନାହିଁ ବୋଲି ଅଭିଯୋଗ କରିଛନ୍ତି ଗ୍ରାମବାସୀ ।
ଏନେଇ ଜଙ୍ଗଲ ବିଭାଗକୁ ଦୀର୍ଘଦିନ ଧରି ଜଣାଇ ଆସୁଥିଲେ ମଧ୍ୟ ବିଭାଗ ନିଦାବିଷ୍ଣୁ ସାଜିଥିବା ଅଭିଯୋଗ କରିଛନ୍ତି ଗ୍ରାମବାସୀ । ଏହା ସହ ହାତୀ ଘଉଡାଇବା ପାଇଁ କିଛି ବ୍ୟବସ୍ଥା କରୁନଥିବା ଅଭିଯୋଗ କରିଛନ୍ତି ଗ୍ରାମବାସୀ । ଏନେଇ ଜିଲ୍ଲା ବନଖଣ୍ଡ ଅଧିକାରୀଙ୍କୁ ପଚାରିବାରୁ ଚିରାଚରିତ ଭାବେ ହାତୀ ସୁରକ୍ଷା ସାଙ୍ଗକୁ ଗ୍ରାମବାସୀଙ୍କ ସୁରକ୍ଷା ପାଇଁ ବ୍ୟବସ୍ଥା ଗ୍ରହଣ କରାଯାଉଥିବା ପ୍ରକାଶ କରିଥିଲେ । କେବେ ଜଙ୍ଗଲ ବିଭାଗ ଆସି ହାତୀ ଘଉଡାଇବେ ସେନେଇ ଅପେକ୍ଷାରେ ଅଛନ୍ତି ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
