କେନ୍ଦୁଝର: ସ୍ଥାନୀୟ ଚମ୍ପୁଆ ରେଞ୍ଜ ଅନ୍ତର୍ଗତ ମହେଶ୍ବରପୁର ଗାଁରେ କୁକୁର ପଲଙ୍କ ଆକ୍ରମଣରେ ଗୋଟିଏ ମାଈ ହରିଣର ମୃତ୍ୟୁ ହୋଇଥିବା ଜଣା ପଡିଛି । ସୂଚନା ଅନୁଯାୟୀ ଜଙ୍ଗଲ ପଟୁ ବୈତରଣୀ ନଦୀ ପାରି ହୋଇ ଏକ 5 ବର୍ଷର ମାଈ ହରିଣ ଚମ୍ପୁଆ ରେଞ୍ଜର କାଳିକା ପ୍ରସାଦ ରିଜର୍ଭକୁ ପଶି ଆସିଥିଲା । ହେଲେ ଏହି ହରିଣଟି କୁକୁର ପଲଙ୍କ ଆକ୍ରମଣର ଶିକାର ହୋଇଥିବାରୁ ତାହାର ମୃତ୍ୟୁ ହୋଇଥିବା ଜଣା ପଡିଛି ।
ହରିଣଟି ମହେଶ୍ବରପୁର ଦୋଳିତା ନିକଟସ୍ଥ କାଜୁ ଜଙ୍ଗଲରେ ବୁଲୁଥିବା ବେଳେ ଏହାକୁ କିଛି ବୁଲା କୁକୁର ଗୋଡାଇବା ଆରମ୍ଭ କରିଥିଲେ । ପରେ କୁକୁରଙ୍କ ଆକ୍ରମଣରେ ହରିଣଟି ଗୁରୁତର ହୋଇ ପଡିଥିଲା । ଖବର ପାଇ ସ୍ଥାନୀୟ ଲୋକେ ଗୁରୁତର ଅବସ୍ଥାରେ ହରିଣଟିକୁ ଉଦ୍ଧାର କରି ଚମ୍ପୁଆ ରେଞ୍ଜରଙ୍କୁ ଖବର କରିଥିଲେ । ହେଲେ ବନ କର୍ମଚାରୀମାନେ ସେଠାରେ ପହଞ୍ଚିବା ବେଳକୁ ହରିଣଟିର ମୃତ୍ୟୁ ହୋଇ ସାରିଥିଲା ।
ପରେ ବନ ବିଭାଗ କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ମୃତ ହରିଣକୁ ଉଦ୍ଧାର କରିବା ସହ ଏହାର ବ୍ୟବଚ୍ଛେଦ କରାଇଥିଲେ । ବ୍ୟବଚ୍ଛେଦ ପରେ ହରିଣଟିର ମୃତଦେହକୁ ପୋତି ଦିଆଯାଇଥିବା ଜଣା ପଡିଛି ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
