କେନ୍ଦୁଝର: ପୁଣି ଥରେ ଖବର ପରିସରକୁ ଆସିଛି ବହୁ ଚର୍ଚ୍ଚିତ ଗ୍ରାହମ ଷ୍ଟେନ୍ସ ହତ୍ୟାକାଣ୍ଡ ଘଟଣାର ମୁଖ୍ୟ ଅଭିଯୁକ୍ତ ଦାରା ସିଂଙ୍କ କଥା । ଦାରା ସିଂଙ୍କୁ ଜେଲରୁ ମୁକ୍ତ କରିବା ପାଇଁ ଲଢେଇ ଆରମ୍ଭ କରିଛି ଦାରା ସେନା ।
୧୯୯୯ ମସିହାରେ ଘଟିଥିବା ଏହି ଘଟଣାରେ ଦାରା ସିଂ ଗିରଫ ହୋଇ ଦୀର୍ଘ ୨୨ ବର୍ଷ ଧରି କେନ୍ଦୁଝର ଜିଲ୍ଲା କାରାଗାରରେ ସଜା କାଟୁଛି । ଦାରା ସିଂର କାରାଗାର ଅବଧି ପୁରଣ ହୋଇଯାଇଥିଲେ ମଧ୍ୟ ଏପର୍ଯ୍ୟନ୍ତ ଜେଲରୁ ବାହାରି ପାରୁ ନାହାଁନ୍ତି । ଏନେଇ ବହୁ ହିନ୍ଦୁ ସଂଗଠନ ବିଭିନ୍ନ ସମୟରେ ପ୍ରତିବାଦ କରିଆସୁଛନ୍ତି । ତାଙ୍କର ବାରମ୍ବାର ବେଲ ପାଇଁ ଆବେଦନ ହେଉଥିଲେ ସୁଦ୍ଧା ଖାରଜ ହୋଇଯାଉଛି ।
ଏବେ ଦାରା ସିଂଙ୍କୁ ନ୍ୟାୟ ପ୍ରଦାନ କରିବା ସହ ଜେଲରୁ ମୁକ୍ତ କରିବା ପାଇଁ ଅଣ୍ଟା ଭିଡିଛି ଦାରା ସେନା । ଦାରା ସେନା ପକ୍ଷରୁ ସୁପ୍ରିମକୋର୍ଟର ବରିଷ୍ଠ ଆଇନଜୀବି ଏପି ସିଂଙ୍କୁ ନିୟୋଜିତ କରାଯାଇଛି । ନିର୍ଭୟା ଦୋଷୀଙ୍କ ମାମଲା ଲଢିଥିବା ଓ ପୁରୀ ରଥଯାତ୍ରା ପ୍ରସଙ୍ଗରେ ଚର୍ଚ୍ଚିତ ଓକିଲ ହେଉଛନ୍ତି ଏପି ସିଂ । ଆଜି (ଶୁକ୍ରବାର) କେନ୍ଦୁଝର ଜିଲ୍ଲା କାରାଗାରକୁ ଆସି ଦାରା ସିଂ କୁ ଭେଟିଥିଲେ ଏପି ସିଂ। ତାଙ୍କୁ ଜେଲରୁ ମୁକୁଳାଇବା ପାଇଁ ପ୍ରୟାସ ଜାରି ରଖିବେ ବୋଲି ଏପି ସିଂ ତାଙ୍କ ପ୍ରତିକ୍ରିୟା କହିଛନ୍ତି । ଦାରା ସିଂଙ୍କୁ ମୁକୁଳାଇବା ପାଇଁ ସମସ୍ତ ଉଦ୍ୟମ କରାଯିବ ବୋଲି ଦାରା ସେନା ପକ୍ଷରୁ କୁହାଯାଇଛି ।
ତେବେ କେବେ ଦାରା ସିଂ ଜେଲରୁ ମୁକ୍ତ ହେଉଛନ୍ତି ନା ଜେଲରେ ରହୁଛନ୍ତି ତାକୁ ଅପେକ୍ଷା ।
ସୂଚନାଯୋଗ୍ୟ ଯେ 1999 ମସିହାରେ କେନ୍ଦୁଝର ଜିଲ୍ଲା ମନୋହରପୁର ଗ୍ରାମରେ ମିଶିନାରୀ ଗ୍ରାହମ ଷ୍ଟେନ୍ସ ଓ ତାଙ୍କର ଦୁଇ ପୁଅଙ୍କୁ ଜିପ୍ରେ ନିଆଁ ଲଗାଇ ହତ୍ୟା କରାଯାଇଥିଲା । ଯାହା ସାରା ଦେଶରେ ପାଲଟିଥିଲା ଚର୍ଚ୍ଚାର ବିଷୟ । ଘଟଣାରେ କେନ୍ଦୁଝର ପୋଲିସ ତଦନ୍ତ କରି ମୁଖ୍ୟ ଅଭିଯୁକ୍ତ ଦାରା ସିଂ ଓ ତାଙ୍କର କିଛି ସହଯୋଗୀଙ୍କୁ ଗିରଫ କରିବାରେ ସଫଳ ହୋଇଥିଲା । ପରେ ମାମଲା ସିବିଆଇକୁ ହସ୍ତାନ୍ତର କରାଯାଇଥିଲା ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
