କେନ୍ଦୁଝର: ବିଳମ୍ବିତ ରାତ୍ରିରେ ଜିଲ୍ଲାରେ ମର୍ମନ୍ତୁଦ ସଡକ ଦୁର୍ଘଟଣା । ଟ୍ରକକୁ ପଛ ପଟୁ ପିଟିଲା ବସ । ଦୁର୍ଘଟାରେ 8 ଗୁରୁତର ଥିବା ବେଳେ 10ରୁ ଊର୍ଦ୍ଧ୍ବ ଆହତ ଥିବା ସୂଚନା ରହିଛି । ଗୁରୁବାର ରାତି ପ୍ରାୟ 1 ସମୟରେ ବଡ଼ବିଲରୁ ଭୁବନେଶ୍ବର ଯାଉଥିବା ‘ଶ୍ରୀରାମ’ ବସ୍ ୨୦ ନମ୍ବର ଜାତୀୟ ରାଜପଥର ନେଙ୍କଡ଼ାଘର ନିକଟରେ ଦୁର୍ଘଟଣାଗ୍ରସ୍ତ ହୋଇଛି ।
ବସଟି ଭୁବନେଶ୍ବର ଅଭିମୁଖେ ଯାଉଥିବା ବେଳେ ସାମନାରେ ଯାଉଥିବା ଏକ ଆଇରନ ବୋଝେଇ ଟ୍ରକ ହଠାତ ବ୍ରେକ ମାରି ଦେବାରୁ ବସଟି ପଛରୁ ପିଟି ହୋଇଗଲା । ଦୁର୍ଘଟଣାଟି ଏତେ ଭୟଙ୍କର ଥିଲା ଯେ ବସର ବାମ ପଟ ସାମନା କେବିନଟି ସମ୍ପୂର୍ଣ୍ଣ ଭାଙ୍ଗି ଯିବା ସହ ଇଞ୍ଜିନଟି ଗଳି ପଡିଛି । ସୂଚନା ପାଇ ଅଗ୍ନିଶମ ବିଭାଗ ଓ ଗ୍ରାମବାସୀ ଆହତ ମାନଙ୍କୁ ଉଦ୍ଧାର କରି ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଛନ୍ତି ।
ସେପଟେ ଚିକିତ୍ସାଳୟରେ ଖୋଦ ସିଡିଏମଓ, ଏଡିଏମଓଙ୍କ ସହ ପାଞ୍ଚ ଜଣ ଡାକ୍ତର ପ୍ରତ୍ୟକ୍ଷରହି ଆହତଙ୍କ ଚିକିତ୍ସା ଜାରି ରଖିଛନ୍ତି । ଏହି ଦୁର୍ଘଟଣାରେ ୧୦ରୁ ଊର୍ଦ୍ଧ୍ବ ଆହତ ହୋଇଥିବା ବେଳେ ୮ ଜଣ ଗୁରୁତରଙ୍କ ମଧ୍ୟରୁ ୨ ଜଣଙ୍କ ଅବସ୍ଥା ସଙ୍କଟାପନ୍ନ ଅଛି । ଦୁଇ ଜଣ ଗୁରୁତରଙ୍କୁ କଟକ ପଠାଯିବ ବୋଲି ଅଧିକାରୀ ପ୍ରକାଶ କରିଛନ୍ତି ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
