କେନ୍ଦୁଝର: ନୂତନ ପଞ୍ଚାୟତ ଦାବିରେ ଗ୍ରାମବାସୀଙ୍କ ତହସିଲ କାର୍ଯ୍ୟାଳୟ ଘେରାଉ । ଜିଲ୍ଲାର ତେଲକୋଇ ବ୍ଲକ ଅନ୍ତର୍ଗତ ଲକ୍ଷ୍ମୀନାରାୟଣପୁରରେ ଏକ ନୂତନ ପଞ୍ଚାୟତ ଦାବିରେ 16ଟି ଗ୍ରାମର ଗ୍ରାମବାସୀ ଶନିବାର ଦିନ ତେଲକୋଇ ତହସିଲ କାର୍ଯ୍ୟାଳୟ ଘେରାଉ କରିଥିଲେ । ଏଥିସହ ଏହି ଦାବି ପୂରଣ ନ ହେଲେ ଆଗାମୀ ନିର୍ବାଚନରେ ଭୋଟ ବର୍ଜନ କରିବେ ବୋଲି ଗ୍ରାମବାସୀମାନେ ଚେତାବନୀ ଦେଇଛନ୍ତି ।
ଖବର ମୁତାବକ, ସରକାରୀ ନିୟମାନୁସାରେ ଏକ ହଜାରରୁ ଉର୍ଦ୍ଧ୍ବ ଲୋକ ସଂଖ୍ୟାରେ ପଞ୍ଚାୟତ ଗଠନ ହୁଏ । କିନ୍ତୁ କାଳିଆହୋତା ଗ୍ରାମପଞ୍ଚାୟତ ଭୌଗଳିକ ଦୃଷ୍ଟିକୋଣରୁ ବହୁତ ବଡ଼ ହେବା ସହ ଲୋକ ସଂଖ୍ୟା ମଧ୍ୟ ବହୁ ଅଧିକ । କିନ୍ତୁ ବର୍ତ୍ତମାନ ଥିବା ପଞ୍ଚାୟତ କାର୍ଯ୍ୟାଳୟ ବହୁ ଦୂରରେ ହୋଇଥିବାରୁ ଗ୍ରାମବାସୀଙ୍କୁ ବହୁ ଅସୁବିଧାର ସମ୍ମୁଖୀନ ହେବାକୁ ପଡୁଛି । ତେଣୁ ଏଠିକାର 16ଟି ଗ୍ରାମର ବାସିନ୍ଦାମାନେ ୨୦୧୬ ମସିହାରୁ ଲକ୍ଷ୍ମୀନାରାୟଣପୁରକୁ ନୂତନ ପଞ୍ଚାୟତ ଘୋଷଣା କରିବାକୁ ଦାବି କରି ଆସୁଛନ୍ତି । କିନ୍ତୁ ତାଙ୍କ କଥା କେହି ପ୍ରଶାସନିକ ଅଧିକାରୀ ନଶୁଣିବାରୁ ବାଧ୍ୟ ହୋଇ ଶନିବାର ଦିନ ତହସିଲ ଘେରାଉ କରିଥିଲେ ।
କେନ୍ଦୁଝରରୁ ସନ୍ତୋଷ କୁମାର ମହାପାତ୍ର, ଇଟିଭି ଭାରତ
