ଆନନ୍ଦପୁର: ବଳଦ ଯାତ୍ରା । ଯେ କେହି ଏହି ଯାତ୍ରା ବିଷୟରେ ଶୁଣିଲେ ଆଶ୍ଚର୍ଯ୍ୟ ହେବେ । କାରଣ ରାଜ୍ୟରେ ବିଭିନ୍ନ ଯାତ୍ରା ହେଉଥିବାବେଳେ ବଳଦ ଯାତ୍ରା ଖୁବ୍ କମ ସ୍ଥାନରେ ହୋଇଥାଏ । ଶାରଦୀୟ ଦୁର୍ଗା ପୂଜାର ବିଜୟା ଦଶମୀ ଦିନ କେନ୍ଦୁଝର କେଶଦୁରାପାଳ ଗାଁରେ ଅନୁଷ୍ଠିତ ହୋଇଛି ଏହି ନିଆରା ଯାତ୍ରା । ଏଥିରେ ଗାଁର ବଳିଷ୍ଠ ବଳଦମାନଙ୍କୁ ବିଭିନ୍ନ ବେଶ ପୋଷାକରେ ସଜ୍ଜାଯାଇ ସହର ପରିକ୍ରମା କରାଯାଏ । ଯାହା ଯାତ୍ରାକୁ ବେଶ ଆକର୍ଷଣୀୟ କରେ ।
ଏଠାରେ କାହିଁ କେଉଁ କାଳରୁ ବଳଦ ଯାତ୍ରା ପାଳନ ହେଉଛି । ବିଜୟା ଦଶମୀ ଦିନ ଗାଁର ବଳିଷ୍ଠ ବଳଦଙ୍କ ମଧ୍ୟରେ ପ୍ରତିଯୋଗିତା କରାଯାଏ । ପ୍ରଥମେ ବଳଦଙ୍କୁ ହଳଦୀ ପାଣିରେ ଗାଧେଇ, ସୁନ୍ଦର ବେଶ ପୋଷାକରେ ସଜାଯାଏ । ଏହାପରେ ଗାଁ ମଝିରେ ସେମାନଙ୍କୁ ପୂଜା କରାଯାଇ ବିଭିନ୍ନ ଗ୍ରାମ ପରିକ୍ରମା କରାଯାଇଥାଏ । ଏହି ଯାତ୍ରା ଦେଖିବାକୁ ଜିଲ୍ଲା ତଥା ଜିଲ୍ଲା ବାହାରୁ ଲୋକଙ୍କ ଆଗମନ ହୋଇଥାଏ ।
ସାଧାରଣତଃ ବଳଦମାନେ ଚାଷ କାର୍ଯ୍ୟରେ ସାହାଯ୍ୟ କରିଥାନ୍ତି । ଲୋକମାନେ ବେପାର ବଣିଜ କରିବା ପାଇଁ ବଳଦ ମାନଙ୍କର ସାହାଯ୍ୟ ନେଇଥାନ୍ତି । କେଶଦୁରାପାଳ ଗ୍ରାମବାସୀ ଚାଷ ସହ ବାଣିଜ୍ୟିକ ସମ୍ପ୍ରଦାୟର ହୋଇଥିବାରୁ ବେପାରରେ ଉନ୍ନତି ପାଇଁ ଏହି ଦିନ ନିଜ ବ୍ୟବସାୟର ଶୁଭାରମ୍ଭ କରିଥାନ୍ତି । ବିଶ୍ବାସ ରହିଛି ବିଜୟା ଦଶମୀରେ ଏଭଳି କଲେ ମଙ୍ଗଳା ମା' ଖୁସି ହେବା ସହ ବେପାର ଓ ଚାଷ କାମ ଭଲ ହୋଇଥାଏ ।
ପୂର୍ବକାଳରେ କୃଷି କାର୍ଯ୍ୟ ହେଉ କିମ୍ବା ବେପାର ବଳଦ ବ୍ୟବହାର ହୋଇଥାନ୍ତି । ହେଲେ ବର୍ତ୍ତମାନର ଯାନ୍ତ୍ରିକ ଯୁଗରେ ବଳଦଙ୍କ ବ୍ୟବହାର ଲୋପ ପାଇବାରେ ଲାଗିଛି । କିନ୍ତୁ କେଶଦୁରାପାଳର ଏହି ବଳଦ ଯାତ୍ରା ପ୍ରାଚୀନ ପରମ୍ପରାକୁ ବଞ୍ଚାଇ ରଖିଛି ବୋଲି ଆୟୋଜକ କମିଟିର ସଭାପତି କହିଛନ୍ତି ।
ଆନନ୍ଦପୁରରୁ ସ୍ମତିରଞ୍ଜନ ବିହାରୀ, ଇଟିଭି ଭାରତ
