କେନ୍ଦୁଝର: ସ୍କୁଲ ରାସ୍ତା ମରାମତିକୁ ନେଇ ଦୁଇ ଗୋଷ୍ଠୀ ମଧ୍ୟରେ ଉତ୍ତେଜନା । ଏମିତି ଏକ ଘଟଣା ଘଟିଛି କେନ୍ଦୁଝର ସଦର ଥାନା ଅନ୍ତର୍ଗତ ନରଣପୁରରେ ।
ସୂଚନା ଅନୁସାରେ, ନରଣପୁରରେ ଥିବା ଆବାସିକ ବିଦ୍ୟାଳୟର ରାସ୍ତା ମରାମତି କାର୍ଯ୍ୟ ହେଉଥିଲା । 49 ନମ୍ବର ଜାତୀୟ ରାଜପଥ ଠାରୁ ବିଦ୍ୟାଳୟ ପର୍ଯ୍ୟନ୍ତ ଯାଇଥିବା ରାସ୍ତା ସରକାରଙ୍କ ଦ୍ବାରା ନିର୍ମିତ ହୋଇଥିବା ବେଳେ ରାସ୍ତାର ଅବସ୍ଥା ଅତି ଶୋଚନୀୟ ହୋଇପଡିଥିଲା ।
ଫଳରେ ବିଦ୍ୟାଳୟ ପକ୍ଷରୁ ଅଭିଭାବକଙ୍କ ମାଧ୍ୟମରେ ଆଜି ରାସ୍ତାର ମରାମତି କରାଯାଉଥିଲା । କିନ୍ତୁ ଏହି ମରାମତିକୁ ବିରୋଧ କରିଥିଲେ ଗାଁ ର ଆଉ ଏକ ଗୋଷ୍ଠୀ। ଯାହାକୁ ନେଇ ଉଭୟ ଗୋଷ୍ଠୀ ମଧ୍ୟରେ ଉତ୍ତେଜନା ହେବାସହ ରାସ୍ତା କାମ ବନ୍ଦ ହୋଇଥିଲା ।
ଏହାର ପ୍ରତିବାଦରେ ଅଭିଭାବକ ମାନେ 49 ନଂ ଜାତୀୟ ରାଜପଥକୁ ଅବରୋଧ କରିଥିଲେ । ରାସ୍ତା ଅବରୋଧର ଖବର ପାଇ ସ୍ଥାନୀୟ ସରପଞ୍ଚ ଘଟଣାସ୍ଥଳରେ ପହଞ୍ଚି ଉତ୍ତ୍ୟକ୍ତ ଲୋକଙ୍କୁ ବୁଝାସୁଝା କରିବା ସହ ରାସ୍ତା କାମ ଆରମ୍ଭ କରିବାକୁ କହିଥିଲେ । ରାସ୍ତା କାମ ଆରମ୍ଭ ହେବା ପରେ ରାସ୍ତା ଅବରୋଧ ହଟିଥିଲା ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
