କେନ୍ଦ୍ରାପଡ଼ା: ବିଶ୍ବରେ ହୁ ହୁ ହୋଇ ବଢି ଚାଲିଛି କୋରୋନା ଆକ୍ରାନ୍ତଙ୍କ ସଂଖ୍ୟା । ଯାହାକୁ ନେଇ ରାଜ୍ୟରେ ବଢିଚାଲିଛି ଲକ ଡାଉନ ଅବଧି । ଗତ ୨୨ ତାରିଖରେ ଜନତା କର୍ଫ୍ୟୁ ପରେ କେନ୍ଦ୍ର ସରକାରଙ୍କ ପକ୍ଷରୁ ଘୋଷଣା କରାଯାଇଥିବା ଲକ ଡାଉନ ଦ୍ବାରା ବହୁ କ୍ଷୁଦ୍ର ବ୍ୟବସାୟୀ ଜୀବିକା ହରାଇଛନ୍ତି । ଫଳରେ ବହୁ ଦୁଃଖ କଷ୍ଟରେ ରହୁଛନ୍ତି ଏମାନେ । ସେହିପରି କିଛି ବିହାରର ଶ୍ରମିକ କେନ୍ଦ୍ରାପଡ଼ାରେ ଫସିରହିଛନ୍ତି ।
ଦୀର୍ଘ ୩୫ବର୍ଷ ଧରି କେନ୍ଦ୍ରାପଡ଼ା ସହରର ମାଧପୁର ଅଞ୍ଚଳରେ ରହି ଗୁପଚୁପ ବ୍ୟବସାୟ କରି ଆସୁଥିବା ବିହାରର ସର୍ଦ୍ଦାର ପିତାମ୍ବର ଯାଦବ ପ୍ରତିବର୍ଷ ନିଜ ଅଞ୍ଚଳରୁ ଜୀବନ ଜୀବିକା ପାଇଁ ସଂଗ୍ରାମ କରୁଥିବା ଯୁବକ ଓ ସେମାନଙ୍କ ପରିବାରକୁ କେନ୍ଦ୍ରାପଡ଼ା ଜିଲ୍ଲାକୁ ଆଣି ଗୁପଚୁପ ବ୍ୟବସାୟରେ ନିୟୋଜିତ କରିଥାନ୍ତି । କିନ୍ତୁ କୋଭିଡ଼-୧୯ ପାଇଁ ରାଜ୍ୟ ଓ କେନ୍ଦ୍ର ସରକାର କରିଥିବା ଲକଡାଉନ ଏମାନଙ୍କ ମୁହଁରୁ ଖୁସି ଛଡାଇ ନେଇଛି । କେନ୍ଦ୍ରାପଡ଼ା ପୌର ପରିଷଦ ପକ୍ଷରୁ ଯୋଗାଇ ଦିଆଯାଉଥିବା ଆହାର ଏମାନଙ୍କ ପାଇଁ ଏକମାତ୍ର ବଞ୍ଚିବାର ରାହା ପାଲଟିଛି । ତେବେ ସକାଳୁ ଭୋକିଲା ରହି ଦିନ ୨ଟାରେ ଖାଉଥିବାରୁ ଏମାନଙ୍କ ଦୁଃଖ ବଢିଯାଇଛି । ପାଖରେ ନା ଅଛି ପଇସା ନା ଖୋଲୁଛି ଗୁପଚୁପ ଦୋକାନ। ଗୁପଚୁପ ବାକ୍ସରେ ସେହିଦିନ ଠାରୁ ଗୁପଚୁପ ପଡି ରହିଥିବା ବେଳେ ରାଜ୍ୟ ସରକାରଙ୍କ ଏପ୍ରିଲ ୩୦ ପର୍ଯ୍ୟନ୍ତ ଲକ ଡାଉନ ଘୋଷଣା ଯେମିତି ଏମାନଙ୍କ ଆଶାକୁ ମଉଳାଇ ଦେଇଛି ।
ଦୀର୍ଘ ୩୫ବର୍ଷ ଧରି କେନ୍ଦ୍ରାପଡ଼ା ଜିଲ୍ଲାରେ ଗୁପଚୁପ ବ୍ୟବସାୟ କରି ଆସୁଥିବା ପିତାମ୍ବର ଯାଦବ କର୍ମଚାରୀ ମାନଙ୍କୁ ଧରି ବର୍ତ୍ତମାନ ପରିସ୍ଥିତିରେ ନିଜ ରାଜ୍ୟକୁ ଫେରିବା ପାଇଁ ପ୍ରଶାସନ ପକ୍ଷରୁ ବ୍ୟବସ୍ଥା କରିବା ପାଇଁ ଆକୁଳ ନିବେଦନ କରିଛନ୍ତି । ତେବେ ସମ୍ପୂର୍ଣ୍ଣ ରାଜ୍ୟ ସୀମା ସିଲ ଓ ଲକ ଡାଉନ ଜାରି ରହିଥିବାରୁ ସେମାନଙ୍କୁ ନିଜ ରାଜ୍ୟକୁ ଫେରିବା ପାଇଁ ସାହାଯ୍ୟ ପ୍ରସଙ୍ଗରେ ଏହାକୁ କାର୍ଯ୍ୟକାରୀ କରାଇବାରେ ଅସାମର୍ଥ୍ୟତା ପ୍ରକାଶ କରିଛନ୍ତି ପୌର ନିର୍ବାହୀ ଅଧିକାରୀ ।
କେନ୍ଦ୍ରାପଡ଼ାରୁ ରାଧାକାନ୍ତ ମହାନ୍ତି, ଇଟିଭି ଭାରତ
