କେନ୍ଦ୍ରାପଡ଼ା: ଖୋଦ ଶକ୍ତିମନ୍ତ୍ରୀଙ୍କ ନିର୍ବାଚନ ମଣ୍ଡଳୀରେ ସରପଞ୍ଚ ଓ ସମିତିସଭ୍ୟ ଭିକ୍ଷା ମାଗିବା ଘଟଣାରେ ଜିଲ୍ଲାପାଳଙ୍କ ବିବାଦିୟ ମନ୍ତବ୍ୟ । କହିଲେ ୫୦ -୧୦୦ ଟଙ୍କା ଭକ୍ଷାରେ ହୋଇପାରିବନି ରାସ୍ତାକାମ । ଜିଲ୍ଲାପାଳଙ୍କ ଏଭଳି ମନ୍ତବ୍ୟ ପରେ ଅସନ୍ତୋଷ ପ୍ରକାଶ କଲେ ସାଧାରଣ ଜନତା । ସାଧାରଣ ଜନତାଙ୍କ ଟଙ୍କାରେ ସମଗ୍ର ଦେଶ ଚାଲିଥାଏ । ତେଣୁ ଏଭଳି ଘୃଣ୍ୟ ମନ୍ତବ୍ୟରୁ ଜିଲ୍ଲାପାଳ ନିବୃତ ରୁହନ୍ତୁ ବୋଲି ସାଧାରଣରେ ମତ ପ୍ରକାଶ ପାଇଛି ।
ଗ୍ରାମାଞ୍ଚଳ ବା ଗ୍ରାମାଞ୍ଚଳରେ ବସବାସ କରୁଥିବା ଲୋକଙ୍କ ସମସ୍ୟାର ସମାଧାନ ପାଇଁ ସରକାର ମାଳମାଳ ଯୋଜନା ପ୍ରଣୟନ କରୁଛନ୍ତି । ହେଲେ ଅନେକ କାରଣରୁ ଲୋକଙ୍କ ପାଖରେ ଏହି ଯୋଜନା ପହଞ୍ଚି ପାରୁନାହିଁ । କେତେବେଳେ ଲୋକଙ୍କ ସେବା କରିବାକୁ ଜନ ପ୍ରତିନିଧି ମନ ବଳାଉନଥିବା ବେଳେ କେତେବେଳେ ଜନ ପ୍ରତିନିଧିଙ୍କୁ ସହଯୋଗ କରୁନାହାଁନ୍ତି ପ୍ରଶାସନ ଅଧିକାରୀ । ଫଳରେ ବାଧ୍ୟ ହୋଇ ଜନ ପ୍ରତିନିଧିଙ୍କୁ ଲୋକଙ୍କ ସମସ୍ୟାର ସମାଧାନ ପାଇଁ ଭିକ୍ଷାବୃତ୍ତି କରିବାକୁ ପଡ଼ିଛି । ଏହାର ଏକ ଜ୍ବଳନ୍ତ ଉଦାହରଣ କେନ୍ଦ୍ରାପଡ଼ା ଜିଲ୍ଲା ରାଜକନିକା ବ୍ଲକ୍ର ପେଗରପଡ଼ା ପଞ୍ଚାୟତରେ ଦେଖିବାକୁ ମିଳିଥିଲା । ପଞ୍ଚାୟତର ସରପଞ୍ଚ ଶ୍ରଦ୍ଧାଞ୍ଜଳୀ ମଲ୍ଲିକ ଓ ସମିତିସଭ୍ୟ ପ୍ରବେଶନ ମଲ୍ଲିକ ସେହି ପଞ୍ଚାୟତର ସର୍ପାବାଦ ଦାଣ୍ଡି ରାସ୍ତା ନିର୍ମାଣ ପାଇଁ ଦ୍ବାରଦ୍ବାର ବୁଲି ଭିକ୍ଷା ସଂଗ୍ରହ କରିଥିଲେ (Pegarpada ward member and Sarpanch seen begging) ।
କ'ଣ ଥିଲା ସମସ୍ୟା
ଭିକ୍ଷା ମାଗିବାର ୧୦ ଦିନ ପୂର୍ବରୁ ଅର୍ଥାତ ଅଗଷ୍ଟ ୨୯ ତାରିଖ ଦିନ ମିଳିତ ଜନ ଅଭିଯୋଗ ଶୁଣାଣୀରେ ହାଜର ହୋଇ ଏହି ରାସ୍ତା ନିର୍ମାଣ ପାଇଁ ଉଭୟ ଲୋକ ପ୍ରତିନିଧି ଜିଲ୍ଲାପାଳଙ୍କୁ ଜଣାଇଥିଲେ । ଜିଲ୍ଲାପାଳ ତୁରନ୍ତ ଏହି ଗାଁ ରାସ୍ତା ନିର୍ମାଣ ପାଇଁ ନିର୍ଦ୍ଦେଶ ଦେଇଥିଲେ । ଏହା ପରଦିନ ରାଜକନିକା ବ୍ଲକର କନିଷ୍ଠ ଯନ୍ତ୍ରୀ, ସହକାରୀ ଯନ୍ତ୍ରୀ ଓ ପେଗରପଡା ପଞ୍ଚାୟତ ନିର୍ବାହୀ ଅଧିକାରୀ ଏହି ଗାଁକୁ ଯାଇ ମାପଚୁପ କରିଥିବା ବେଳେ ସରପଞ୍ଚ ଶ୍ରଦ୍ଧାଞ୍ଜଳୀ ଏବଂ ସମିତିସଭ୍ୟ ପ୍ରବେଶନଙ୍କୁ କାମ କରିବା ପାଇଁ କହି ଆସିଥିଲେ । ପରେ ଏହି ୬୩୦ ମିଟର ଦୀର୍ଘ ଗାଁ ରାସ୍ତା ନିର୍ମାଣ ପାଇଁ ଲୋକ ପ୍ରତିନିଧି ଦୁହେଁ ବାଲି ଏବଂ ମେଣ୍ଟାଲ ପକାଇବା ପରେ ଆରମ୍ଭ ହୋଇଥିଲା ପ୍ରଶାସନିକ ଅସହଯୋଗର ଖେଳ । ଏହି କାମକୁ ବନ୍ଦ କରାଯାଇ ଗ୍ରାମସଭା, ପଲ୍ଲୀସଭା ହେଲେ କାମ ହେବ ବୋଲି କହିଥିଲା ପ୍ରଶାସନ । ପରେ ରାସ୍ତା କାମ ପାଇଁ ପଡ଼ିଥିବା ବାଲି ବର୍ଷାରେ ଧୋଇଯାଇଥିଲା । ଏନେଇ ପ୍ରଶାସନିକ ଅଧିକାରୀଙ୍କ ଅସହଯୋଗକୁ ଦାୟୀ କରି ଘରଘର ବୁଲି ଭିକ ମାଗି ରାସ୍ତା କାମ ପାଇଁ ଅର୍ଥ ସଂଗ୍ରହ କରିଥିଲେ ଏହି ଦୁଇ ଲୋକ ପ୍ରତିନିଧି ।
ସରପଞ୍ଚଙ୍କ ଦୋଷ ରହିଥିବା କହିଲେ ମନ୍ତ୍ରୀ
ରାଜ୍ୟ ସରକାରଙ୍କର ଖୋଦ ଶକ୍ତି ମନ୍ତ୍ରୀ ପ୍ରତାପ ଦେବଙ୍କ ନିର୍ବାଚନ ମଣ୍ଡଳୀରେ ଏଭଳି ଦୃଶ୍ୟକୁ ବିଭିନ୍ନ ସ୍ତରରେ ନିନ୍ଦା କରାଯାଇଥିଲା । ଏନେଇ ସମସ୍ତ ଦୋଷ ସରପଞ୍ଚଙ୍କ ଉପରେ ଲଦି ଦେଇଥିଲେ ମନ୍ତ୍ରୀ ପ୍ରତାପ ଦେବ । ମନ୍ତ୍ରୀ କହିଥିଲେ ଯେ, ''ସରପଞ୍ଚଙ୍କ ତ୍ରୁଟି ରହିଛି । ବିନା ଗ୍ରାମସଭାରେ ସେମାନେ ପ୍ରକଳ୍ପ ନେଇଥିବା କାରଣରୁ କାମ ହୋଇ ପାରୁନାହିଁ । ସେମାନେ ପ୍ରଥମେ ନିଜେ ଠିକ୍ ହୁଅନ୍ତୁ ।'' ଅନ୍ୟପଟେ ଦୀର୍ଘ ୭ ମାସ ହେବ ପଞ୍ଚାୟତ ପ୍ରତିନିଧିମାନେ ନିର୍ବାଚିତ ହୋଇଥିଲେ ମଧ୍ୟ ଅଦ୍ୟାବଧି ଗୋଟିଏ ମଧ୍ୟ ଗ୍ରାମସଭା କରାଇ ନଦେବା ପଛରେ ଶାସକ ଦଳର କିଛି ସମର୍ଥକଙ୍କ ହାତ ରହିଥିବା ଅଭିଯୋଗ ହୋଇଥିଲା ।
ଏହା ମଧ୍ୟ ପଢ଼ନ୍ତୁ...ପେଗରପଡା ପଞ୍ଚାୟତ ପ୍ରତିନିଧି ଭିକ୍ଷା ମାଗିବା ଘଟଣା, ଏମିତି କହିଲେ ମନ୍ତ୍ରୀ
୫୦-୧୦୦ ଟଙ୍କା ଭିକ୍ଷାରେ ରାସ୍ତାକାମ ହୋଇପାରିବନି କହିଲେ ଜିଲ୍ଲାପାଳ
ଏନେଇ ଜିଲ୍ଲାପାଳ ଅମ୍ରିତ ଋତୁରାଜଙ୍କୁ ପଚରାଯିବାରୁ ସେ ଦେଇଥିବା ମନ୍ତବ୍ୟକୁ ବିଭିନ୍ନ ମହଲରେ ନିନ୍ଦା କରାଯାଇଛି । ସେ କହିଛନ୍ତି, "୫୦-୧୦୦ ଟଙ୍କା ଭିକ୍ଷାରେ ରାସ୍ତା କାମ ହୋଇପାରିବ ନାହିଁ । କୌଣସି ଉନ୍ନତିମୂଳକ କାର୍ଯ୍ୟ ପାଇଁ ପଞ୍ଚାୟତର ଫଣ୍ଡ ପର୍ଯ୍ୟାପ୍ତ ହୋଇନଥାଏ । ଏଥିପାଇଁ ପଞ୍ଚାୟତ ସମିତି ଫଣ୍ଡ ମଧ୍ୟ ଆବଶ୍ୟକ । ପ୍ରଥମେ ଗ୍ରାମ ସଭାରେ କାର୍ଯ୍ୟ ଖସଡ଼ା ପାରିତ ହେବା ଆବଶ୍ୟକ ।"
ତେବେ ଏହି ସାଧାରଣ ଜନତାଙ୍କ ସ୍ବଳ୍ପ ଟିକସରେ ସରକାରୀ ଅଧିକାରୀଙ୍କ ଠାରୁ ଆରମ୍ଭ କରି ବିଭିନ୍ନ ବିଧାୟକ ଓ ସାଂସଦ ଚଳିଥାନ୍ତି । ସରକରୀ କାର୍ଯ୍ୟ ମଧ୍ୟ ଏଥିରୁ ହିଁ ହୋଇଥାଏ । ତେଣୁ ଏଭଳି ମନ୍ତବ୍ୟରୁ ଜିଲ୍ଲାପାଳ ନିବୃତ ରୁହନ୍ତୁ ବୋଲି ବୁଦ୍ଧିଜୀବୀ କହିଛନ୍ତି । ପଞ୍ଚାୟତର ବିକାଶ ପାଇଁ ଯାହା ସମ୍ଭବ ସେଦିଗରେ ପଦକ୍ଷେପ ନେବାକୁ ଦାବି ହୋଇଛି ।
ଲୋକପ୍ରତିନିଧିଙ୍କ ସହ ପ୍ରଶାସନ ଉଚିତ ବ୍ୟବହାର କରୁ
କିଛିଦିନ ପୂର୍ବରୁ କେନ୍ଦ୍ରାପଡ଼ା ଗସ୍ତରେ ଆସିଥିବା କେନ୍ଦ୍ରମନ୍ତ୍ରୀ ନିଶିଥ ପ୍ରାମାଣିକ ଜିଲ୍ଲାପାଳଙ୍କ ଏଭଳି ମନ୍ତବ୍ୟକୁ ଦୃଢ଼ ନିନ୍ଦା କରିଥିଲେ । ସେ କହିଛନ୍ତି, "ସାଧାରଣ ଲୋକଙ୍କ ଦ୍ବାରା ନିର୍ବାଚନରେ ଜିତିଥିବା ଲୋକପ୍ରତିନିଧି ମାନଙ୍କୁ କେନ୍ଦ୍ର ସରକାର ଯଥେଷ୍ଟ ସମ୍ମାନ କରନ୍ତି । ତେଣୁ ପ୍ରଶାସନିକ ଅଧିକାରୀଙ୍କର ଲୋକପ୍ରତିନିଧିମାନଙ୍କୁ ଏଭଳି ବ୍ୟବହାର କରିବା ଉଚିତ ହୋଇନାହିଁ ।
ଇଟିଭି ଭାରତ, କେନ୍ଦ୍ରାପଡ଼ା
