କେନ୍ଦ୍ରାପଡା: ମଦ ଦୋକାନକୁ ବିରୋଧ କରୁଥିବା ମହିଳାଙ୍କୁ ପ୍ରଶାସନିକ ସ୍ତରରେ ଅସହଯୋଗ । ଦୀର୍ଘ ଦୁଇମାସ ହେବ ଧାରଣାରେ ବସିଥିଲେ ମଧ୍ୟ ଶୁଣୁନି ପ୍ରଶାସନ । ବାରମ୍ବାର ନ୍ୟାୟ ଆଶାରେ ଜିଲ୍ଲାପାଳଙ୍କ କାର୍ଯ୍ୟାଳୟକୁ ଦୌଡି ନିରାଶ ହେବାପରେ ହାତରେ କିରାସିନି, ପେଟ୍ରୋଲ ଓ ଦିଆସିଲି ଧରି ଆତ୍ମହତ୍ୟା କରିବା ପାଇଁ ଦେଇଛନ୍ତି ଧମକ ।
ରାଜନଗର ଥାନା ଭିତରଗଡ ପଞ୍ଚାୟତରେ ଥିବା ଏକ ସରକାରୀ ବିଦେଶୀ ଠିପିବନ୍ଦ ମଦଦୋକାନକୁ ବାରମ୍ବାର ସ୍ଥାନୀୟ ମହିଳା, ପୁରୁଷ ଓ ବୁଦ୍ଧିଜୀବି ବିରୋଧ କରି ଦୁଇମାସ ହେବ ଧାରଣାରେ ବସିଛନ୍ତି । ମଦଦୋକାନଟି ସ୍ଥାନୀୟ ବିଦ୍ୟାଳୟ,ମନ୍ଦିର ଓ ଜନବସତି ମଧ୍ୟରେ ଥିବାରୁ ମଦ ଦୋକାନକୁ ଆସୁଥିବା ବ୍ୟକ୍ତିବିଶେଷଙ୍କ ଦୌରାତ୍ମ୍ୟରେ ଅସହ୍ୟ ହୋଇଯାଉଛନ୍ତି ଏମାନେ । ତେଣୁ ଆଉ ଆନ୍ଦୋଳନରେ ନବସି ଆତ୍ମହତ୍ୟା ଭଳି ଚରମ ରାସ୍ତା ବାଛିନେଇଛନ୍ତି ମହିଳା । ହାତରେ ପେଟ୍ରୋଲ, କିରାସିନି ଓ ଦିଆସିଲି ଧରି ଢେର ସମୟ ଅତିରିକ୍ତ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ପ୍ରତିବାଦ କରିଛନ୍ତି ।
ବାରମ୍ବାର ପ୍ରଶାସନକୁ ଗୁହାରି ଶୁଣାଇଥିଲେ ମଧ୍ୟ ଏହାର କୌଣସି ସମାଧାନ ହୋଇପାରିନଥିଲା । ତେବେ ପୂର୍ବରୁ କିଛି ମହିଳା ଏନେଇ ଅତିରିକ୍ତ ଜିଲ୍ଲାପାଳ ବସନ୍ତ ରାଉତଙ୍କୁ ଭେଟି ଅଭିଯୋଗ କରିବା ପରେ ଅତିରିକ୍ତ ଜିଲ୍ଲାପାଳ ସେମାନଙ୍କୁ ସେଠାରୁ ମଦ ଦୋକାନ ବନ୍ଦ ହେବ ବୋଲି ପ୍ରତିଶ୍ରୁତି ଦେଇଥିଲେ । କିନ୍ତୁ ମହିଳାମାନଙ୍କର ବିଶ୍ବାସ ନହେବାରୁ ଅତିରିକ୍ତ ଜିଲ୍ଲାପାଳ ସେମାନଙ୍କୁ ନିଜ ମୋବାଇଲ ନମ୍ବର ଦେଇଥିଲେ । ଏହା ସହ ଦୋକାନ ସମ୍ବନ୍ଧୀୟ କୌଣସି ଅଭିଯୋଗ ପାଇଁ ତାଙ୍କୁ ମହିଳାମାନେ ଯୋଗାଯୋଗ କରିପାରିବେ ବୋଲି ମଧ୍ୟ କହିଥିଲେ ।
ତେବେ ଦୁଇଦିନ ପରେ ମଦ ଦୋକାନ ବନ୍ଦ ନହେବାରୁ ଜୟଶ୍ରୀ ସେଠୀ ନାମକ ଜଣେ ମହିଳା ଅତିରିକ୍ତ ଜିଲ୍ଲାପାଳଙ୍କୁ ମଧ୍ୟାହ୍ନରେ ଫୋନ କରିବାରୁ ଅତିରିକ୍ତ ଜିଲ୍ଲାପାଳ ମହୋଦୟ ତାଙ୍କୁ ଫୋନରେ ଗୀତ ଶୁଣାଇଥିଲେ । ତେବେ ସେ ଗୀତ ବାଥରୁମରେ ପଶି ଗାଇଥିବାର ଅଭିଯୋଗ କରିଛନ୍ତି ମହିଳା ଜଣକ । ଏଭଳି ଅଭିଯୋଗକୁ ହାଲୁକାରେ ନେଇ ଅତିରିକ୍ତ ଜିଲ୍ଲାପାଳ ରାଉତ କହିଛନ୍ତି ‘ଆଜିକାଲି ଫୋନରେ ରିଂ ଟୋନ ବାଜୁଛି, ସେଇଟା ବାଜୁଥିବ । ମୁଁ ସିଙ୍ଗର ନୁହେଁ, ତେଣୁ ଗୀତ କାହିଁକି ଗାଇବି?’
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
