କେନ୍ଦ୍ରାପଡା: ପଞ୍ଚାୟତ ନିର୍ବାଚନର ପ୍ରଥମ ପର୍ଯ୍ୟାୟ ମତଦାନ ଭିତରେ ଅନେକ ହିଂସାକାଣ୍ଡ ଘଟିଛି । ଭୋଟିଂ ବେଳେ ବୋମାମାଡ଼, ବୁଥ କ୍ୟାପଚରିଂ, ମାରପିଟ୍, ଗୋଷ୍ଠୀସଂଘର୍ଷ ଭଳି ନିର୍ବାଚନୀ ହିଂସାର କିଛି ଚିତ୍ର ସାମ୍ନାକୁ ଆସିଛି । କେନ୍ଦ୍ରପଡା ଜିଲ୍ଲା ଆଳି ବ୍ଲକ ବଡ଼ଆଙ୍କୋ ଗ୍ରାମରେ ନିର୍ବାଚନ ପରବର୍ତ୍ତୀ ହିଂସାକାଣ୍ଡ ଘଟିଛି। ଗ୍ରାମରେ ଦୁଇଗୋଷ୍ଠୀ ମଧ୍ୟରେ ହିଂସାକାଣ୍ଡ ଘଟି 10 ଜଣ ଆହତ ହୋଇଥିବା ଜଣାପଡ଼ିଛି ।
ଅଭିଯୋଗ ଅନୁଯାୟୀ ଗ୍ରାମର ହନୁମାନ ଛକରେ ସୁବ୍ରତ ତ୍ରିପାଠୀ,ସୁଶାନ୍ତ ବେହୁରା,ଅଜୟ ସାହୁ,ସହଦେବ ବେହୁରା, ଅବକାଶ ସେଠୀଙ୍କ ସମେତ ବଡ଼ଆଙ୍କୋ ହନୁମାନ ଛକ ନିକଟରେ ବସି ଗ୍ରାମରେ ନିର୍ମାଣଧୀନ ହନୁମାନ ମନ୍ଦିର ବିଷୟରେ ଆଲୋଚନା କରୁଥିଲେ । ଏହି ସମୟରେ ଗ୍ରାମର ସୁବାଷ ମଲିକ, ରମେଶ ମଲିକ,ବାବାଜୀ ମଲିକଙ୍କ ସମେତ ଅନ୍ୟମାନେ ସେମାନଙ୍କୁ ବିଭିନ୍ନ ମାରଣାସ୍ତ୍ରରେ ଆକ୍ରମଣ କରିବା ସମୟରେ ଗ୍ରାମବାସୀ ସେଠାକୁ ଆସିବାରୁ ସେମାନେ ପଳାଇ ଯାଇଥିଲେ ।
ସେମାନଙ୍କ ଆକ୍ରମଣରେ ସୁବ୍ରତଙ୍କ ସମେତ ସୁଶାନ୍ତ ବେହୁରା, ଅଜୟ ସାହୁ, ସହଦେଵ ବେହୁରା,ଅବକାଶ ସେଠୀ ଆହତ ହୋଇ ଆଳି ମେଡିକାଲରେ ଚିକିତ୍ସାଧୀନ ଅଛନ୍ତି । ଅପରପକ୍ଷରେ ଉଷା ମଲିକ ନିରଞ୍ଜନ ମଲିକ,ରମେଶ ମଲିକ ପ୍ରମୁଖଙ୍କୁ ସଦେଇ ବେହେରା,କାଳିଆ, ଅଜୟ, ଟାଇଆ ପ୍ରମୁଖଙ୍କ ସମେତ ଅନ୍ୟମାନେ ତାଙ୍କୁ ଆକ୍ରମଣ କରି ରକ୍ତାକ୍ତ କରି ଦେଇଥିବା ପାଲଟା ଅଭିଯୋଗ ହୋଇଛି ।
ଏନେଇ ଆଳି ଥାନାରେ ଉଭୟ ପକ୍ଷରୁ ଦୁଇଟି ମାମଲା ରୁଜୁ ହୋଇଥିବା ଜଣାପଡିଛି l ଏହି ଘଟଣା ପଛରେ ରାଜନୈତିକ ଉଦ୍ଦେଶ୍ୟ ଥିବା ସନ୍ଦେହ କରାଯାଉଛି। ଖବର ପାଇ ଆଳି ପୋଲିସ ଗ୍ରାମରେ ପାଟ୍ରୋଲିଂ କଡାକଡି କରିଛି । ପ୍ରକାଶ ଥାଉ ଆଳି ବ୍ଲକରେ ୩୪ଟି ପଞ୍ଚାୟରେ ତ୍ରିସ୍ତରୀୟ ପଞ୍ଚାୟତ ନିର୍ବାଚନର ପ୍ରଥମ ପ୍ରର୍ଯ୍ୟାୟ ନିର୍ବାଚନ ଶେଷ ହୋଇଛି । କାଁ ଭାଁ ଗଣ୍ଡଗୋଳକୁ ଛାଡି ଦେଲେ ପ୍ରାୟତଃ ଶାନ୍ତି ଶୃଙ୍ଖଳାର ସହ ଭୋଟ ଗ୍ରହଣ ହୋଇଛି ।
କେନ୍ଦ୍ରାପଡ଼ାରୁ ରାଧାକାନ୍ତ ମହାନ୍ତି, ଇଟିଭି ଭାରତ
