କେନ୍ଦ୍ରାପଡା: ରାଜ୍ୟରେ ଚାଲିଥିବା ନିର୍ବାଚନୀ ମାହୋଲକୁ ବେଶ ସରଗରମ କରୁଛି ହେଭିୱେଟ ନେତାଙ୍କ ପ୍ରଚାର ଗସ୍ତ । ବର୍ତ୍ତମାନ ରାଜ୍ୟକୁ ବିଜେପିର ଅନେକ ହେଭିୱେଟଙ୍କ ଲାଇନ ଛୁଟିଥିବା ବେଳେ ମଙ୍ଗଳବାର ଜିଲ୍ଲାରେ ଆସି ପହଞ୍ଚିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଏନେଇ ଚୂଡାନ୍ତ ପର୍ଯ୍ୟାୟରେ ପହଞ୍ଚିଛି ଜିଲ୍ଲାସ୍ତରୀୟ ପ୍ରସ୍ତୁତି । ପ୍ରଧାନମନ୍ତ୍ରୀଙ୍କ ଗସ୍ତ ସମୟରେ ଟ୍ରାଫିକ ସମସ୍ୟାକୁ ଏଡାଇବା ପାଇଁ ବ୍ୟାପକ ବ୍ୟବସ୍ଥା ହୋଇଥିବା ବେଳେ ଦର୍ଶକମାନଙ୍କ ପାଇଁ ମଧ୍ୟ ବିଭିନ୍ନ ବ୍ୟବସ୍ଥା କରାଯାଇଛି ।
ସୂଚନା ଅନୁଯାୟୀ 23 ତାରିଖ, ମଙ୍ଗଳବାର ହେବାକୁ ଥିବା ଏହି କାର୍ଯ୍ୟକ୍ରମ ପାଇଁ ସ୍ଥାନୀୟ ବାରୁଅ ପଡିଆରେ ପ୍ରାୟ 45 ଏକର ଜାଗାରେ ସଭାସ୍ଥଳର ଆୟୋଜନ ହୋଇଛି । ଯେଉଁଠାରେ ଏକାସାଙ୍ଗରେ ଦେଢ ଲକ୍ଷ ଲୋକେ ବସି ପ୍ରଧାନମନ୍ତ୍ରୀଙ୍କୁ ଶୁଣିବାର ବ୍ୟବସ୍ଥା ରହିଛି । ସଭାରେ ଯୋଗ ଦେବାକୁ ଥିବା ସମସ୍ତ ଦର୍ଶକମାନଙ୍କ ପାଇଁ ପାନୀୟ ଜଳ ସହ ଟଏଲେଟ୍ର ବ୍ୟବସ୍ଥା ରହିଛି । ଅନ୍ୟପଟେ ପ୍ରଧାନମନ୍ତ୍ରୀଙ୍କ ପାଇଁ ମଞ୍ଚ ପଛରେ ଅସ୍ଥାୟୀ କାର୍ଯ୍ୟାଳୟ ସହ ଗ୍ରୀନ ରୁମ୍ର ବ୍ୟବସ୍ଥା ମଧ୍ୟ କରାଯାଇଛି ।
ଏହି କାର୍ଯ୍ୟକ୍ରମରେ କେନ୍ଦ୍ରାପଡା ସାଂସଦ ପ୍ରାର୍ଥୀ ବୈଜୟନ୍ତ ପଣ୍ଡା ଓ 7ଟି ବିଧାନସଭା ନିର୍ବାଚନ ମଣ୍ଡଳୀର ସମସ୍ତ ବିଧାୟକ ପ୍ରାର୍ଥୀଙ୍କ ପାଇଁ ପ୍ରଚାର କରିବେ ମୋଦି । ତେବେ ରବିବାର କେନ୍ଦ୍ରମନ୍ତ୍ରୀ ପୀୟୂଷ ଗୋଏଲଙ୍କ ଗସ୍ତ ପରେ ପ୍ରଧାନମନ୍ତ୍ରୀଙ୍କ ଗସ୍ତ ନିର୍ବାଚନରେ ପ୍ରାର୍ଥୀମାନଙ୍କ ପାଇଁ ଅନେକ ଲାଭଦାୟୀ ହେବ । ତେଣୁ ଲୋକଙ୍କୁ ବିଜେପି ସପକ୍ଷରେ ଭୋଟ ଦେବା ପାଇଁ ବୈଠକ କରିଛନ୍ତି କେନ୍ଦ୍ରମନ୍ତ୍ରୀ ମୁଖତାର ଅବ୍ବାସ ନକବି ।
ଗୋଟିଏ ପଟେ ଜିଲ୍ଲାରେ ପ୍ରଧାନମନ୍ତ୍ରୀଙ୍କ ଗସ୍ତକୁ ନେଇ ଜିଲ୍ଲାବାସୀ ଉତ୍ସାହିତ ରହିଥିବା ବେଳେ ଶେଷ ପର୍ଯ୍ୟାୟ ନିର୍ବାଚନ ପୂର୍ବରୁ ମୁଖ୍ୟମନ୍ତ୍ରୀଙ୍କ ରୋଡ ଶୋ’କୁ ନେଇ ଆଶାବାଦୀ ଅଛନ୍ତି ଦଳୀୟ କର୍ମୀ ।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
