ହାଇଦ୍ରାବାଦ: ଆଉ କିଛିଦିନ ପରେ ଭାଇ ଭଉଣୀଙ୍କୁ ଧରି ରଥଯାତ୍ରାରେ ବାହାରିବେ ମହାପ୍ରଭୁ ଜଗନ୍ନାଥ । କୋରୋନା ସମୟରେ ବିନା ଭକ୍ତରେ ଚଳିତ ଥର ମଧ୍ୟ ରଥଯାତ୍ରା ହେବାକୁ ଥିବା ବେଳେ ଭିନ୍ନ ଏକ ଉପାୟରେ ରଥଯାତ୍ରା ପାଳନ କରିବାକୁ ଚିନ୍ତା କରିଛନ୍ତି କେନ୍ଦ୍ରାପଡ଼ାର ଚିତ୍ରଶିଳ୍ପୀ ପ୍ରିୟଙ୍କା ସାହାଣୀ ।
କଳାର ଠାକୁର କାଳିଆକୁ ନିଜ ରଙ୍ଗତୂଳୀରେ ଅତି ନିଖୁଣ ଭାବରେ ଆଙ୍କି ଦେଉଛନ୍ତି ବେଙ୍ଗାଲୁରୁରେ ସଫ୍ଟୱେୟାର ଡେଭଲପର ଭାବେ କାର୍ଯ୍ୟ କରୁଥିବା ପ୍ରିୟଙ୍କା । ତେବେ ସବୁଠାରୁ ବେଶୀ ଯାହା ଆକର୍ଷିତ କରୁଛି ତାହା ହେଉଛି ପ୍ରିୟଙ୍କା ମହାପ୍ରଭୁ ଜଗନ୍ନାଥ, ବଳଭଦ୍ର ଓ ଦେବୀ ସୁଭଦ୍ରାଙ୍କ ଚିତ୍ର କୌଣସି କାଗଜ କିମ୍ବା କାନଭାସ ନୁହେଁ ବରଂ ବିଭିନ୍ନ ଜିନିଷ ଉପରେ ଆଙ୍କିଛନ୍ତି ।
ତୁଳସୀ ପତ୍ର, ଅଶ୍ବତ୍ଥ ପତ୍ର, ଫୁଲ, ଚେରୀ, ତରଭୁଜ, କଦଳୀ, ପଣସ ମଞ୍ଜି, ରାଜମା, ବାଦାମ, ଆଳୁ, କାନଫୁଲ, ମାଳି, ବିସ୍କୁଟ, ଚିଉଇଙ୍ଗ ଗମ୍, ଆଦିରେ କାଳିଆର ଚିତ୍ର ଆଙ୍କିଛନ୍ତି ପ୍ରିୟଙ୍କା । ଏପରିକି ସେ ନିଜ ନଖରେ ମଧ୍ୟ ଆଙ୍କିଛନ୍ତି ଜଗନ୍ନାଥଙ୍କ ପ୍ରତିକୃତି । 108 ଟି ଜିନିଷ ଉପରେ ତିନି ଠାକୁରଙ୍କ ଚିତ୍ର ଆଙ୍କିବେ ବୋଲି ପ୍ରିୟଙ୍କା ଲକ୍ଷ୍ୟ ରଖିଛନ୍ତି ।
ନିଜ ସ୍ବର୍ଗତ ପିତା ବିବେକାନନ୍ଦ ସାହାଣୀଙ୍କ ଠାରୁ ଚିତ୍ରକଳା ଶିଖିଥିବା ପ୍ରିୟଙ୍କା ଏପର୍ଯ୍ୟନ୍ତ 35 ଟି ଚିତ୍ର ଆଙ୍କି ସାରିଛନ୍ତି । ରଥ ଯାତ୍ରା ପୂର୍ବରୁ ସେ ନିଜର 108 ଚିତ୍ରର ଲକ୍ଷ୍ୟ ପୂରଣ କରିବେ ବୋଲି ବିଶ୍ବାସ ରଖିଛନ୍ତି ।
ସବୁବେଳେ କିଛି ଭିନ୍ନ କରିବାକୁ ଆଶା ରଖିଥିବା ପ୍ରିୟଙ୍କା ଏହି ରଥଯାତ୍ରା ସମୟରେ ମଧ୍ୟ କିଛି ଭିନ୍ନ କରିବାର ଲକ୍ଷ୍ୟରେ ଏହି ଚିତ୍ର ଆଙ୍କିବା ଆରମ୍ଭ କରିଛନ୍ତି । ଏକ୍ରେଲିକ ରଙ୍ଗ, ଛୁଞ୍ଚି, ଓ ତୂଳୀ ବ୍ୟବହାର କରି ପ୍ରିୟଙ୍କା ଆଙ୍କି ପକାନ୍ତି ଜଗା କାଳିଆର ଚିତ୍ର ସବୁ । ତାଙ୍କ ଚିତ୍ର ଗୁଡ଼ିକୁ ଦେଖିଲେ ଯେକୌଣସି ବ୍ୟକ୍ତିର ମନମୁଗ୍ଧ ହୋଇଯିବ ।
ବ୍ୟୁରୋ ରିପୋର୍ଟ, ଇଟିଭି ଭାରତ
