କେନ୍ଦ୍ରାପଡ଼ା: ବାଲିଆ ବାଣ ବିସ୍ଫୋରଣ ଘଟଣାରେ ବର୍ତ୍ତମାନ ସୁଦ୍ଧା ୨ ଜଣଙ୍କ ମୃତ୍ୟୁ ଘଟିଥିବା ବେଳେ ଆହତଙ୍କ ଚିକିତ୍ସା କଟକ ବଡ଼ ମେଡିକାଲରେ ଜାରି ରହିଛି । ଏହି ବେଆଇନ ବାଣ ଫୁଟାଇବାକୁ ନେଇ ସଦର ପୋଲିସ ଆୟୋଜକ କମିଟିର ତିନିଜଣଙ୍କୁ ବାନ୍ଧି ଜେଲ ପଠାଇଥିବାବେଳେ ଗିରଫ ଭୟରେ ଏବେ ପୁରୁଷ ଶୁନ୍ୟ ହୋଇପଡିଛି ଭାଗବତପୁର ପଞ୍ଚାୟତର ଦଳିତ ବସ୍ତି । ଘରର ପୁରୁଷ ମାନେ କେଉଁଆଡ଼େ ଚାଲି ଯାଇଥିବାବେଳେ ଘରର ସ୍ତ୍ରୀ ଲୋକ ଓ ବୟସ୍କମାନେ ମୁଠାଏ ଖାଇବା ପାଇଁ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି ।
ଏମିତି ଥିଲା ଘଟଣା
ଗତ ବୁଧବାର ସନ୍ଧ୍ୟା ଥିଲା କେନ୍ଦ୍ରାପଡ଼ା ଜିଲ୍ଲା ଓ ବାଲିଆ ଅଞ୍ଚଳ ପାଇଁ ଏକ କାଳ ସନ୍ଧ୍ୟା । କାର୍ତ୍ତିକେଶ୍ବର ଭସାଣ ଉତ୍ସବ ଚାଲିଥିବାବେଳେ ଅସାବଧାନତା ଯୋଗୁଁ ଅଚାନକ ବାଣ ବିସ୍ଫୋରଣ ଘଟି ୩୪ ଜଣ ଗୁରୁତର ଭାବେ ଆହତ ହୋଇ କଟକ ବଡ଼ ମେଡିକାଲ ସ୍ଥାନାନ୍ତର ହୋଇଥିଲେ । ତେବେ ଆଜି ସୁଦ୍ଧା ଗୁରୁତରଙ୍କ ମଧ୍ୟରୁ ବାଣ ଫୁଟାଇବାକୁ ଆସିଥିବା କଟକ ଜିଲ୍ଲା ନିଶ୍ଚିନ୍ତକୋଇଲି ଥାନା ଅଧିନ ବୁହାଳୋ ଗାଁର ଉଦୟ ଭୋଇ ଓ ଏହି ଭସାଣ ଶୋଭାଯାତ୍ରାରେ ଖେଳଣା ବିକ୍ରି କରୁଥିବା ବୁଲା ବିକାଳୀ ପିଣ୍ଟୁ ଖାନଙ୍କର ମୃତ୍ୟୁ ହୋଇଛି । ଏବେ ମଧ୍ୟ ଜୀବନ ସହ ଯୁଦ୍ଧ କରୁଛନ୍ତି ୧୦ ଗୁରୁତର ।
ଗିରଫ ଭୟରେ ପୁରୁଷ ଶୂନ୍ୟ ଦଳିତ ବସ୍ତି
ପୋଲିସ ପ୍ରାଥମିକ ଭାବେ ଗତ ଶୁକ୍ରବାର ଦିନ ଭସାଣ ଶୋଭାଯାତ୍ରାରେ ବାଣ ଫୁଟାଇଥିବା ବାଲିଆ ଭାଗବତପୁର ଦଳିତ ସାହି ଶ୍ରମିକ ସଂଘ ପୂଜା କମିଟିର ୩ ଜଣଙ୍କୁ ବାନ୍ଧି ଜେଲ ପଠାଇଛି । ତେବେ ଏଥିରେ ସମ୍ପୃକ୍ତ ଅନ୍ୟ କର୍ମକର୍ତ୍ତାଙ୍କୁ ଧରିବା ପାଇଁ ଜୋରଦାର ପ୍ରୟାସ ଚଳାଇଛି ପୋଲିସ । ଦଳିତ ସାହିରେ ବାରମ୍ବାର ପୋଲିସ ଚଢ଼ାଉ ଜାରି ରଖିଥିବା ବେଳେ ଗିରଫ ଭୟରେ ଏବେ ଖାଁ ଖାଁ ଆଉ ପୁରୁଷ ଶୁନ୍ୟ ହୋଇପଡ଼ିଛି ଏହି ଦଳିତ ବସ୍ତି ।
ଘର ଛାଡ଼ୁଛନ୍ତି ମହିଳା ଓ ବୃଦ୍ଧା
ଦଳିତ ଗାଁ ଭାଗବତପୁର ପୁରୁଷ ଶୁନ୍ୟ ହେବାରୁ ଏବେ ପରିବାରବର୍ଗଙ୍କ ଗୁଜୁରାଣ କେମିତି ମେଣ୍ଟିବ ସେନେଇ ଚିନ୍ତାରେ ଘରେ ଥିବା ମହିଳା ଓ ବୟସ୍କ । ଏମିତିକି ଘରେ ରୋଗୀଣା ମାଆ ପଡିଥିବା ବେଳେ ଗିରଫ ଭୟରେ ଘର ଛାଡିଛି ରୋଜଗାରିଆ ପୁଅ । ଜଣେ ନିର୍ଦ୍ଦିଷ୍ଟ ବ୍ୟକ୍ତି ଦଳିତ ସାହିକୁ ଶ୍ମଶାନ କରିବା ପାଇଁ ଧମକ ଦେଉଥିବାବେଳେ କିଂକର୍ତ୍ତବ୍ୟବିମୁଢ ହୋଇ ଗୃହପାଳିତ ପଶୁମାନଙ୍କୁ ନେଇ ଘରର ମହିଳା ଘର ଛାଡ଼ୁଥିବା ଦେଖିବାକୁ ମିଳୁଛି । ଏନେଇ ଅତିରିକ୍ତ ଆରକ୍ଷୀ ଅଧିକ୍ଷକଙ୍କୁ ପୋଲିସ ପଦକ୍ଷେପ ନେଇ ପଚାରାଯିବାରୁ ସେ ବାଣ ବିସ୍ଫୋରଣ ଘଟଣାରେ ଗିରଫଦାରୀ ସଂଖ୍ୟା ବୃଦ୍ଧି ପାଇଁ ପୋଲିସ ପକ୍ଷରୁ ଜୋରଦାର ଚଢ଼ାଉ କରାଯାଉଥିବା କହିଛନ୍ତି ।
ଏଭଳି ଘଟଣାରେ ଗୁରୁତର ଆହତ ହୋଇ ଜୀବନ ସହ କିଛି ଜୁଝୁଥିବା ବେଳେ ୫ ଜଣ ଆହତ ସୁସ୍ଥ ହୋଇ ଘରକୁ ଫେରିଥିବା ଜଣା ପଡ଼ିଛି । ତେବେ ବର୍ତ୍ତମାନ ମଧ୍ୟ ୧୦ ଜଣ ଜୀବନ ସହ ଯୁଦ୍ଧ କରୁଛନ୍ତି ।
ଇଟିଭି ଭାରତ, କେନ୍ଦ୍ରାପଡ଼ା
