କେନ୍ଦ୍ରାପଡ଼ା: ଆଗକୁ ଆସୁଛି ପାର୍ବଣର ଋତୁ । ପଲ୍ଲୀ ଠାରୁ ଆରମ୍ଭ କରି ସହର ପର୍ଯ୍ୟାନ୍ତ ଏନେଇ ଚଳଞ୍ଚଳ ହୋଇଉଠିଲାଣି । ତେବେ ଗଜଲକ୍ଷ୍ମୀ ପୂଜା ପାଇଁ ସାରା କେନ୍ଦ୍ରାପଡ଼ା ସହର ଉତ୍ସବମୁଖର । ଚଳିତ ବର୍ଷ ଗଜଲକ୍ଷ୍ମୀ ପୂଜାକୁ ସରସ ସୁନ୍ଦର କରିବା ପାଇଁ ଏବେ ଠାରୁ ଆରମ୍ଭ ହେଲାଣି ସାଜ୍ଜସଜା । ସେପଟେ ଜିଲ୍ଲାରେ ଶାନ୍ତି ଶୃଙ୍ଖଳାରେ ପୂଜାକୁ ସାରିବା ପାଇଁ ଜିଲ୍ଲା ପ୍ରଶାସନ ସମେତ ପୋଲିସ ପ୍ରଶାସନ ଓ ପୂଜା କମିଟି ଗୁଡିକ ମଧ୍ୟରେ ଆରମ୍ଭ ହୋଇଛି ପୂଜା ପ୍ରସ୍ତୁତି ବୈଠକ ।
ତେବେ ବୈଠକରେ କରାଯାଇଥିବା ଆଲୋଚନା ଅନୁଯାୟୀ, ଚଳିତଥର କେନ୍ଦ୍ରାପଡ଼ା ସହରର ୬୮ଟି ଭିନ୍ନ ଭିନ୍ନ ପୂଜା ମଣ୍ଡପରେ ମା' ଧନଦାତ୍ରୀଙ୍କ ପୂଜା ପାଳନ ହେବା । ସେହିପରି ମେଳଣ ଓ ଭସାଣି କାର୍ଯ୍ୟକ୍ରମରେ ମୋଟ ୪୮ଟି ମେଢ଼ ଭାଗ ନେବେ । ଚଳିତ ବର୍ଷ ପୂର୍ଣ୍ଣିମା ତିଥି ଅର୍ଥାତ ୨୮ ଅକ୍ଟୋବରରେ ଚନ୍ଦ୍ର ଗ୍ରହଣ ପଡ଼ୁଥିବା କାରଣରୁ ପରମ୍ପରା ଅନୁଯାୟୀ କୁମାର ପୂର୍ଣ୍ଣିମା ମଧ୍ୟରାତ୍ରରୁ ମା' ଗଜଲକ୍ଷ୍ମୀଙ୍କ ପୂଜା ଆରମ୍ଭ ହେବ । ୩ ତାରିଖ ପର୍ଯ୍ୟନ୍ତ ପୂଜା କାର୍ଯ୍ୟ ଚାଲିବାକୁ ଥିବା ବେଳେ ନଭେମ୍ବର ୪ ଓ ୫ ତାରିଖରେ ମେଳଣ ଓ ଭସାଣି କାର୍ଯ୍ୟକ୍ରମ ଅନୁଷ୍ଠିତ ହେବ । ତେବେ ଏବର୍ଷ ପୂଜାରେ ରଙ୍ଗାରଙ୍ଗ କାର୍ଯ୍ୟକ୍ରମକୁ ଅନୁମତି ରହିଥିବା ବେଳେ କାର୍ଯ୍ୟକ୍ରମ ନାଁରେ ଅଶ୍ଳୀଳ ନୃତ୍ୟ ଓ ଗୀତକୁ ବଜାଇବାକୁ ଅନୁମତି ଦିଆଯିବ ନାହିଁ ବୋଲି କହିଛନ୍ତି ଜିଲ୍ଲାପାଳ ଅମ୍ରିତ ଋତୁରାଜ ।
ଏହା ମଧ୍ୟ ପଢ଼ନ୍ତୁ... କେନ୍ଦ୍ରାପଡ଼ାରେ ଧୂମଧାମରେ ଶେଷ ହେଲା ଧନଦାତ୍ରୀଙ୍କ ପୂଜା
ସେହିପରି ଉଚ୍ଚ ଶବ୍ଦ ଯୁକ୍ତ ଡିଜେ ଭାଇବ୍ରେଟର ଏବଂ ପବ ବକ୍ସକୁ ମଧ୍ୟ ପୂଜାରେ ବଜାଇବାର ଅନୁମତି ମିଳିବ ନାହିଁ । ଗୁରୁତ୍ୱପୂର୍ଣ୍ଣ ପଦକ୍ଷେପ ସ୍ୱରୂପ ପୂଜା ଓ ମାଇକ ବଜାଇବା ପାଇଁ ଅନୁମତି ନେବାକୁ ପୂଜା କମିଟି ଗୁଡିକୁ ଆଉ ଦୁଇ ତିନୋଟି କାର୍ଯ୍ୟାଳୟ ବୁଲିବାକୁ ପଡିବ ନାହିଁ । ସିଙ୍ଗଲ ୱଣ୍ଡୋ ସିଷ୍ଟମ ଦ୍ୱାରା ଗୋଟିଏ ସ୍ଥାନରେ ହିଁ ପୋଲିସ, ବିଦ୍ୟୁତ ବିଭାଗ ଓ ତହସିଲ କାର୍ଯ୍ୟ ସମାପନ କରାଯିବ ବୋଲି ଜିଲ୍ଲାପାଳ ସୂଚନା ଦେଇଛନ୍ତି । ଏହାସହ ଚଳିତଥର ପୂଜା ଏବଂ ଭସାଣିରେ ବାଣ ସମ୍ପୂର୍ଣ୍ଣ ବନ୍ଦ ରହିବ ଓ ପୋଲିସ ପ୍ରଶାସନ ପକ୍ଷରୁ ଅସାମାଜିକ ଲୋକମାନଙ୍କ ଉପରେ ତୀକ୍ଷ୍ଣ ନଜର ରଖାଯିବ । ସେହିପରି ସହରରେ ଟ୍ରାଫିକ ସମସ୍ୟା ଏହି ସମୟରେ ବଢିବାକୁ ଥିବା ବେଳେ ଏଗୁଡିକ ଉପରେ ଯଥେଷ୍ଟ ଧ୍ୟାନ ଦିଆଯିବ ସହ ଚୋରାମଦ ଉପରେ ଚଢ଼ାଉକୁ ତୀବ୍ର କରାଯିବ ବୋଲି କହିଛନ୍ତି ଏସପି ସନ୍ଦୀପ ସମ୍ପଦ ମଦକର।
ଇଟିଭି ଭାରତ, କେନ୍ଦ୍ରାପଡ଼ା
