କେନ୍ଦ୍ରାପଡା: ଜିଲ୍ଲାପାଳଙ୍କ ଜନଶୁଣାଣୀରେ ମୋବାଇଲରେ ଭିଡିଓ ଦେଖାଇବା ଘଟଣାକୁ ନେଇ ଅଡ଼ୁଆରେ କନିଷ୍ଠ ଯନ୍ତ୍ରୀ । ଏହି ଘଟଣାକୁ ନେଇ କନିଷ୍ଠ ଯନ୍ତ୍ରୀ ରମଣ ଦାଶଙ୍କୁ ଚେତାବନୀ ଦେଇଛନ୍ତି କେନ୍ଦ୍ରାପଡା ଜିଲ୍ଲାପାଳ ଅମ୍ରିତ ଋତୁରାଜ । ଗୁରୁତ୍ବପୂର୍ଣ୍ଣ ବୈଠକ ସମୟରେ ଅଫିସ କାମରେ ମୋବାଇଲ ବ୍ୟବହାର କରିବା ବାରଣ ନୁହେଁ ମାତ୍ର ଜନଶୁଣାଣୀ ସମୟରେ ଏଣ୍ଟରଟେନମେଣ୍ଟ ପାଇଁ ମୋବାଇଲ ବ୍ୟବହାର କରିବା ଉଚିତ ନୁହେଁ କହିଛନ୍ତି ଜିଲ୍ଲାପାଳ ।
ଜନଶୁଣାଣିରେ ଯନ୍ତ୍ରୀଙ୍କ ଭିଡିଓ ଦେଖା, ଚେତାବନୀ ଦେଲେ ଜିଲ୍ଲାପାଳ
ସୂଚନା ଅନୁଯାୟୀ ଗତ ସୋମବାର ଜିଲ୍ଲାପାଳ ଓ ଏସପିଙ୍କ ମିଳିତ ଜଣାଶୁଣାଣିରେ ଜନସ୍ୱାସ୍ଥ୍ୟ ବିଭାଗର(PHED) କନିଷ୍ଠ ଯନ୍ତ୍ରୀ ରମଣ ଦାଶ ମୋବାଇଲରେ 'ମୋତେ ଗୋଟିଏ ଗୋରୀ ଝିଅ ଦରକାର' ଶୀରୋନାମାର ଭିଡିଓ ଦେଖୁଥିଲେ । ଯାହା କ୍ୟାମେରାରେ କଏଦ ହୋଇଥିଲା । ଏନେଇ ଆମ ଚ୍ୟାନେଲରେ ଖବର ପ୍ରସାରଣ କରାଯାଇଥିଲା । ଏହି ଖବର ବାଜିବା ପରେ ଜିଲ୍ଲାପାଳ ଅମ୍ରିତ ଋତୁରାଜ, କନିଷ୍ଠ ଯନ୍ତ୍ରୀ ରମଣ ଦାଶଙ୍କୁ ଚେତାବନୀ ଦେଇଛନ୍ତି ।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି,ଇଟିଭି ଭାରତ
