କେନ୍ଦ୍ରାପଡ଼ା: ସାମ୍ଭାବ୍ୟ ବାତ୍ୟା ‘‘ୟସ’’ର ମୁକାବିଲା ପାଇଁ ପ୍ରସ୍ତୁତି ଆରମ୍ଭ କରିଛି ଜିଲ୍ଲା ପ୍ରଶାସନ । ବିଭିନ୍ନ ବିଭାଗର ବରିଷ୍ଠ ଅଧିକାରୀଙ୍କ ସହ ବୈଠକ କରି ଫନିଠାରୁ ଅଧିକ ସଜାଗ ରହିବା ପାଇଁ ଆଜି ବୈଠକରେ ନିର୍ଦ୍ଦେଶ ଦେଇଛନ୍ତି ଜିଲ୍ଲାପାଳ । ବାତ୍ୟା ପରବର୍ତ୍ତୀ ସମୟରେ ବିଦ୍ୟୁତ ପରିଚାଳନା ଏକ ମୁଖ୍ୟ ସମସ୍ୟା ଭାବେ ଉଭା ହେଉଥିବାରୁ ଅଧିକ ପରିମାଣର ଖୁଣ୍ଟ ମହଜୁଦ ରଖିବା ସହ ବର୍ତ୍ତମାନ କର୍ମଚାରୀ ସଂଖ୍ୟା ଓ ଆବଶ୍ୟକୀୟ କର୍ମଚାରୀ ଚିଠା ପ୍ରଦାନ କରି ଏହି ବିଭାଗକୁ ଅଧିକ କ୍ରିୟାଶୀଳ କରିବାକୁ ନିର୍ଦ୍ଦେଶ ଦିଆଯାଇଛି ।
ସେହିପରି ଲୋକସଂଖ୍ୟା ଅନୁଯାୟୀ ପୂର୍ବରୁ ୧୧୭ଟି ବାତ୍ୟା ଆଶ୍ରୟସ୍ଥଳୀ ଥିବାବେଳେ ଏବେ କୋଭିଡ ମହାମାରୀ ଗାଇଡ଼ଲାଇନ ଅନୁଯାୟୀ ଅଧିକ ୫୦୦ଟି ବିଦ୍ୟାଳୟକୁ ବାତ୍ୟା ଆଶ୍ରୟସ୍ଥଳୀ ଭାବେ ବ୍ୟବହାର କରିବା ପାଇଁ ନିର୍ଦ୍ଦେଶ ପ୍ରଦାନ କରାଯାଇଛି । ଏପର୍ଯ୍ୟନ୍ତ ବାତ୍ୟାର ସମ୍ଭାବନା ରହିଥିବାବେଳେ କୌଣସି ସ୍ପଷ୍ଟ ଚିତ୍ର ବାତ୍ୟାକୁ ନେଇ ମିଳିନଥିବାବେଳେ ବାତ୍ୟା ହେବାର ୩୬ ଘଣ୍ଟା ପୂର୍ବରୁ ସମସ୍ତ ବ୍ଲକ ହେଡକ୍ବାର୍ଟରରେ ଶୁଖିଲା ଖାଦ୍ୟ ପହଞ୍ଚାଯିବା ପରେ ସେଠାରୁ ଆଶ୍ରୟସ୍ଥଳୀଙ୍କୁ ଖାଦ୍ୟ ପହଞ୍ଚାଇବା ଓ ଆବଶ୍ୟକ ସ୍ଥଳେ ରନ୍ଧାଖାଦ୍ୟ ଯୋଗାଇ ଦିଆଯିବା ପାଇଁ ବ୍ୟବସ୍ଥା କରାଯିବ ବୋଲି ସୂଚନା ରହିଛି ।
କେନ୍ଦ୍ରାପଡ଼ାରୁ ରାଧାକାନ୍ତ ମହାନ୍ତି, ଇଟିଭି ଭାରତ
