କେନ୍ଦ୍ରାପଡା: ସହରର ବିଭିନ୍ନ ପୂଜା ମଣ୍ଡପରେ ପୂଜା ପାଉଛନ୍ତି ଧନଦାତ୍ରୀ ମା' ଲକ୍ଷ୍ମୀ । ବିଭିନ୍ନ ପୂଜା କମିଟିର କର୍ମକର୍ତ୍ତା ଦର୍ଶକ ଓ ଶ୍ରଦ୍ଧାଳୁଙ୍କ ଆକର୍ଷିତ କରିବା ପାଇଁ ବିଭିନ୍ନ ଯୋଜନାମାନ ପ୍ରସ୍ତୁତ କରିଛନ୍ତି । କେଉଁଠି ସୁଦୃଶ୍ୟ ଆଲୋକମାଳାରେ ମଣ୍ଡପ ସଜ୍ଜିତ ହୋଇଛି, ତ ଆଉ କେଉଁଠି ବିଭିନ୍ନ ଫଳରେ ତିଆରି ହୋଇଛି ତୋରଣ ।
ଏହିକ୍ରମରେ କେନ୍ଦ୍ରାପଡ଼ା ସହରର ମୁଖଶାଳା ଭାବରେ ପରିଚିତ ଦୁହୁରିଆ ଶୁଭଲକ୍ଷ୍ମୀ ପୂଜା କମିଟି ଚଳିତବର୍ଷ ନିଆରା ଢଙ୍ଗରେ ମା'ଙ୍କ ପୂଜା ପାଳନ କରୁଛନ୍ତି । ମା'ଙ୍କ ମୃଣ୍ମୟୀ ମୂର୍ତ୍ତି ଉଚ୍ଚ କୋଟିର ହୋଇଥିବାବେଳେ ପାଖରେ ଥିବା ବାରୁଆଳି ଦର୍ଶକଙ୍କୁ ବେଶ ଆକର୍ଷିତ କରୁଛି । ଭାରତକୁ ବିଶ୍ବ ଦରବାରରେ ପରିଚିତ କରାଇବା ତଥା ପୁଲୱାମାରେ ଭାରତୀୟ ସୈନିକଙ୍କ ଉପରେ ଆକ୍ରମଣ, ପ୍ରଧାନମନ୍ତ୍ରୀଙ୍କ ଦ୍ବାରା ଶହୀଦଙ୍କୁ ଶ୍ରଦ୍ଧାଞ୍ଜଳି, ବାଲାକୋଟ ଏୟାରଷ୍ଟ୍ରାଇକ, ବୀର ଜବାନ ଅଭିନନ୍ଦନ ବର୍ଦ୍ଧମାନଙ୍କୁ ପାକିସ୍ତାନୀ ସୈନିକମାନେ ବନ୍ଦୀ କରିବା ଏବଂ ପରେ ତାଙ୍କୁ ମୁକୁଳାଇବା ଭଳି ପ୍ରତ୍ୟେକ ଘଟଣାକୁ ବେଶ ଆକର୍ଷଣୀୟ ଭାବେ ବିଭିନ୍ନ ଷ୍ଟଲରେ ଦେଖିବାକୁ ମିଳିଛି ।
ତେବେ ଉକ୍ତ ଷ୍ଟଲ ମଧ୍ୟରୁ ୬ ନମ୍ବର ଷ୍ଟଲରେ ପାକିସ୍ତାନ ପ୍ରଧାନମନ୍ତ୍ରୀ ଥାଳ ଧରି ଭିକ୍ଷା ମାଗିବା ନିଆରା ମୂର୍ତ୍ତିଟି ଦର୍ଶକଙ୍କ ଆକର୍ଷଣର କେନ୍ଦ୍ରବିନ୍ଦୁ ପାଲଟିଛି । ପୂଜା କମିଟିର ସଦସ୍ୟଙ୍କ କହିବାନୁଯାୟୀ, ପ୍ରତ୍ୟେକ ବର୍ଷ କମିଟି ପକ୍ଷରୁ କିଛି ନିଆରା କରାଯାଇଥାଏ । ଏଥିପାଇଁ କମିଟି ବହୁ ପୂର୍ବରୁ ପ୍ରସ୍ତୁତି କରିଥାଏ ।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
