କେନ୍ଦ୍ରାପଡା: ଜିଲ୍ଲାରେ ମେଡିକାଲ କଲେଜ ପ୍ରତିଷ୍ଠା ଦାବି ନେଇ ତାତିଲା କଂଗ୍ରେସ । କେନ୍ଦ୍ରାପଡାକୁ ସବୁ କ୍ଷେତ୍ରରେ ଅବହେଳା କରାଯାଉଛି । ଜିଲ୍ଲାରେ ଡାକ୍ତର ଅଭାବ ଓ ସାମାନ୍ୟ ରୋଗ ପାଇଁ କଟକ ବଡ ମେଡିକାଲ ଉପରେ ନିର୍ଭର ହେବାକୁ ପଡୁଛି । ଏଣୁ ଜିଲ୍ଲାରେ ମେଡିକାଲ କଲେଜ ଦାବିରେ ଆନ୍ଦୋଳନ କରିବା ନେଇ ସାମ୍ବାଦିକ ସମ୍ମିଳନୀ ଜରିଆରେ ସୂଚନା ଦେଇଛି କଂଗ୍ରେସ । ଆସନ୍ତା 10 ତାରିଖରେ ଦଳ ପକ୍ଷରୁ ଆନ୍ଦୋଳନ ସହ ଜିଲ୍ଲାପାଳ ଅଫିସ ଘେରାଉ କରାଯିବ । ଏହି ମହାଆନ୍ଦୋଳନରେ ପିସିସି ସଭାପତି ସମେତ ରାଜ୍ୟସ୍ତରୀୟ ନେତାମାନେ ଯୋଗ ଦେବା ନେଇ ସୂଚନା ମିଳିଛି ।
ଦୀର୍ଘ ଦିନ ହେବ ଜିଲ୍ଲାରେ ମେଡିକାଲ କଲେଜ ନିର୍ମାଣ ପାଇଁ ଦାବି ହେଉଥିଲେ ମଧ୍ୟ କୌଣସି ସୁଫଳ ମିଳିନାହିଁ । ନିକଟରେ ଅନ୍ୟ ଜିଲ୍ଲାଗୁଡିକରେ ମେଡିକାଲ କଲେଜ ହେବା ନେଇ ଘୋଷଣା କରାଯାଇଥିବାବେଳେ ଏଥିରୁ ବାଦ୍ ପଡିଛି କେନ୍ଦ୍ରାପଡା । ଏଣୁ ପ୍ରତି କ୍ଷେତ୍ରରେ ଜିଲ୍ଲା ଅବହେଳିତ ଥିବା କଂଗ୍ରେସ ଅଭିଯୋଗ କରିଛି ।
ଜିଲ୍ଲାରେ ଏକ ମେଡିକାଲ କଲେଜ ଦାବି କରି 10 ତାରିଖ ଦିନ ଆନ୍ଦୋଳନ ଓ ଜିଲ୍ଲାପାଳଙ୍କ କାର୍ଯ୍ୟାଳୟ ଘେରାଉ କରାଯିବା ନେଇ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ପୂର୍ବତନ ମନ୍ତ୍ରୀ ଗଣେଶ୍ବର ବେହେରା । ଏହି ସମ୍ମିଳନୀରେ ଜିଲ୍ଲା ସଭାପତି ଚିନ୍ମୟ ବେହୁରାଙ୍କ ସମେତ କଂଗ୍ରେସର ପ୍ରମୁଖ ନେତା ଓ କର୍ମୀମାନେ ଯୋଗ ଦେଇଛନ୍ତି ।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
