କେନ୍ଦ୍ରାପଡା: ମହିଳାଙ୍କୁ ଋଣ ଓ ଚାକିରୀ କରାଇଦେବା ନାଁ ରେ ଲକ୍ଷାଧିକ ଟଙ୍କା ଠକେଇ ହୋଇଥିବା ଅଭିଯୋଗ । କେନ୍ଦ୍ରାପଡା ମ୍ୟୁନିସିପାଲିଟିର ପୂର୍ବତନ କର୍ମଚାରୀ ଗୋଲଖ ପଢିହାରୀ ଓ କେନ୍ଦ୍ରାପଡ଼ା ବିଧାୟକ ଶଶୀଭୂଷଣ ବେହେରାଙ୍କ ସମ୍ପର୍କକୁ ନେଇ ପ୍ରଶ୍ନ ଉଠାଇଛି ବିଜେପି।
ଦୁହୁରିଆସ୍ଥିତ ଦଳୀୟ କାର୍ଯ୍ୟାଳୟରେ ଅନୁଷ୍ଠିତ ସାମ୍ବାଦିକ ସମ୍ମିଳନୀରେ ନଗର ବିଜେପି ସଭାପତି ଦିଲ୍ଲୀପ ଦାଶ ବିଜେଡିର କେନ୍ଦ୍ରାପଡ଼ା ବିଧାୟକ ଶଶୀଭୂଷଣ ବେହେରା ଓ ଗୋଲଖଙ୍କ ସମ୍ପର୍କିତ ଫଟୋଚିତ୍ର ପ୍ରଦର୍ଶନ କରିବା ସହ ଗତ ୨୦୧୧-୧୨ ଅଡିଟ ରିପୋର୍ଟରେ ଗୋଲଖ ଲକ୍ଷାଧିକ ଟଙ୍କା ଆତ୍ମସାତ କରିଥିବା ଉଲ୍ଲେଖ କରିଛନ୍ତି ।
ଏନେଇ ମ୍ୟୁନିସିପାଲିଟି କାର୍ଯ୍ୟନିର୍ବାହୀ ଅଧିକାରୀ ଗୋଲଖଙ୍କୁ ମାତ୍ର ଖଣ୍ଡିଏ ଚିଠି ଲେଖି ବସିଯାଇଥିବା ବେଳେ ବିଧାୟକଙ୍କ ସମ୍ପର୍କୀୟ ଓ ବିଜେଡି ଦଳର ବ୍ୟକ୍ତି ହୋଇଥିବାରୁ ତାଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରୁନଥିବା ଅଭିଯୋଗ କରିଛି ବିଜେପି।
ସେହିପରି କଟକ ସିଡିଏ ସେକ୍ଟର-୭ର ଜଣେ ମହିଳାଙ୍କ ଠାରୁ ଠକେଇ କରି ଆଣିବା ଓ କେନ୍ଦ୍ରାପଡା ଟାଉନ ଥାନାରେ ଲିଖିତ ଅଭିଯୋଗ ହୋଇଥିଲେ ହେଁ ପୋଲିସ ମାମଲା ରୁଜ୍ଜୁ ନକରିବା ଏବଂ ମାନ୍ୟବର ଉଚ୍ଚ ନ୍ୟାୟାଳୟଙ୍କ ନିର୍ଦ୍ଦେଶ ପରେ ମାମଲା ରୁଜ୍ଜୁ କରିବା ପୋଲିସ ପ୍ରଶାସନ ଉପରେ ବିଧାୟକଙ୍କ ଚାପକୁ ପ୍ରମାଣିତ କରୁଛି ବୋଲି ଅଭିଯୋଗ କରିଛନ୍ତି ।
ଏହି ଘଟଣାର ଉଚ୍ଚସ୍ତରୀୟ ତଦନ୍ତ ଦାବି କରିବା ସହ ମ୍ୟୁନିସିପାଲିଟି ଅର୍ଥ ଆତ୍ମସାତ ମାମଲାରେ ତାଙ୍କ ବିରୋଧରେ ପ୍ରଶାସନ ପକ୍ଷରୁ ପୋଲିସରେ ଏତଲା ହେଉ ବୋଲି ଦାବି ଉଠିଛି । ବିଜେଡି ପକ୍ଷରୁ ଗତ ଦୁଇଦିନ ତଳେ ଗୋଲଖଙ୍କ ସହ ବିଧାୟକଙ୍କ ସମ୍ପର୍କ ନଥିବା ଯାହା ସଫେଇ ଦିଆଯାଇଥିଲା ତାହା ମିଛ ବୋଲି ଏହି ଫଟୋ ଗୁଡିକ ବୟାନ କରୁଥିବା କହିଛି ବିଜେପି ।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି,ଇଟିଭି ଭାରତ
