କେନ୍ଦ୍ରାପଡା: ପରିବେଶକୁ ସ୍ବଚ୍ଛ ରଖିବା ପାଇଁ କେନ୍ଦ୍ରାପଡା ପୌରପରିଷଦରେ ଆରମ୍ଭ ହେଲା ବ୍ୟାଟେରୀ ଚାଳିତ ଗାଡିରେ ଆବର୍ଜନା ସଂଗ୍ରହ । ଆଉ ବଡକଥା ହେଉଛି, ପୁରୁଷ ନୁହେଁ, ମହିଳା ସମ୍ଭାଳିବେ ପୌରପରିଷଦକୁ ସଫାସୁତୁରା ରଖିବାର ଭାର । ମହିଳାଙ୍କୁ ସ୍ବାବଲମ୍ବୀ ଓ ସହରକୁ ସ୍ବଚ୍ଛ ରଖିବା ପାଇଁ ଏଭଳି ଅଭିଯାନ ଆରମ୍ଭ କରାଯାଇଛି ।
ସ୍ବଚ୍ଛ ଓ ସୁସ୍ଥ କେନ୍ଦ୍ରାପଡା ଗଠନ ଲକ୍ଷ୍ୟରେ ପ୍ରଶାସନର ନିଆରା ପଦକ୍ଷେପ । କେନ୍ଦ୍ରାପଡା ପୌରପରିଷଦରେ ଆରମ୍ଭ ହୋଇଛି ବ୍ୟାଟେରୀ ଚାଳିତ ଯାନରେ ଆବର୍ଜନା ସଂଗ୍ରହ । ଆଉ ଏହାର ମଙ୍ଗ ଧରିଛନ୍ତି ସ୍ବୟଂ ସହାୟକ ଗୋଷ୍ଠୀର ମହିଳା । ଘର ଘର ବୁଲି ମହିଳା ସଂଗ୍ରହ କରୁଛନ୍ତି ଅଳିଆ ଆବର୍ଜନା । ତାହା ପୁଣି ପୃଥକ୍ ପୃଥକ୍ ଭାବରେ । ପ୍ରାଥମିକ ପର୍ଯ୍ୟାୟରେ ୱାର୍ଡ ନଂ 1 ଓ 2ରେ ଅଭିଯାନ ଆରମ୍ଭ ହୋଇଛି । ପରେ ଅନ୍ୟ ୱାର୍ଡରେ ଏହି କାର୍ଯ୍ୟକ୍ରମ କରାଯିବ ।
କେନ୍ଦ୍ରାପଡାକୁ ସ୍ବଚ୍ଛ ରଖିବା ଓ ମହିଳାଙ୍କୁ ସ୍ବାବଲମ୍ବୀ କରିବାର ମହାନ ଲକ୍ଷ୍ୟ ନେଇ ଏଭଳି ଆରମ୍ଭ କରିଛି ପ୍ରଶାସନ । ଅଳିଆ ସଂଗ୍ରହ ଠୁ ଗାଡି ଚଳାଇବା ପର୍ଯ୍ୟନ୍ତ ସବୁ ଦାୟିତ୍ବ ସମ୍ଭାଳିବେ ମହିଳା । ଅନ୍ୟପଟେ ପ୍ରଶାସନର ଏଭଳି ପଦକ୍ଷେପ ଯୋଗୁଁ ପରିବେଶ ସ୍ବଚ୍ଛ ରହିବ ବୋଲି କହିଛନ୍ତି ସ୍ଥାନୀୟ ଲୋକେ । ଆଉ ପୌରପରିଷଦର ଏଭଳି ପ୍ରୟାସକୁ ଖୋଦ ମୁଖ୍ୟମନ୍ତ୍ରୀ ମଧ୍ୟ ପ୍ରଶଂସା କରିଛନ୍ତି ।
ସ୍ବଚ୍ଛ ଭାରତ ଗଠନ କରିବାକୁ ଆହ୍ବାନ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଆଉ ଏପଟେ ପ୍ରଶାସନର ଏଭଳି ପଦକ୍ଷେପ ନିହାତି ପ୍ରଶଂସାଯୋଗ୍ୟ ।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
