କେନ୍ଦ୍ରାପଡା: ବ୍ରହ୍ମ ତାଳଧ୍ବଜ ରଥ ସୋମବାର ପୂର୍ବାହ୍ନ 11ଟାରେ ଟଣା ହୋଇ ଅପରାହ୍ନ 2ଟାରେ ଗୁଣ୍ଡିଚା ମନ୍ଦିରରେ ଲାଗିଥିଲା । ଏହା ପରେ ଆଡ଼ପ ମଣ୍ଡପକୁ ପହଣ୍ଡି ବିଜେ କରିଛନ୍ତି ମହାପ୍ରଭୁ ବଳଦେବଜୀଉଙ୍କ ସମେତ ଚତୁର୍ଦ୍ଧାମୂର୍ତ୍ତି । ରଥାରୁଢ ଠାକୁରଙ୍କୁ ଦର୍ଶନ ପାଇଁ ଗୁଣ୍ଡିଚା ମନ୍ଦିର ନିକଟରେ ହଜାର ହଜାର ଭକ୍ତଙ୍କ ସମାଗମ ହୋଇଥିଲା । ଭକ୍ତମାନେ ରଥାରୂଢ ଶ୍ରୀଜୀଉଙ୍କୁ ଦର୍ଶନ କରିଥିଲେ । ରାତି 10ଟାରେ ପହଣ୍ଡି ବେଜ ହୋଇ ଶ୍ରୀଜୀଉ ଆଡପ ମଣ୍ଡପକୁ ବିଜେ କରିଛନ୍ତି । ଶ୍ରୀଜୀଉଙ୍କ ଧାଡି ପହଣ୍ଡି ବିଜେ ଦେଖିବାକୁ ଭକ୍ତ ଅପଲକ ନୟନରେ ଚାହିଁ ରହିଥିଲେ ଆଉ ତାହା ପୂରଣ ହୋଇଛି ।
ସନ୍ଧ୍ୟା ଦଇତା ସେବକମାନଙ୍କ ଦ୍ବାରା ନୂତନ ବସ୍ତ୍ର ସହିତ ଟାହିଆ ପରିଧାନ କରାଯାଇଥିଲା। ଗତ ଶୁକ୍ରବାର ଅପରାହ୍ନ ଠାରୁ ମହାପ୍ରଭୁ ରଥାରୂଢ ହୋଇଥିବା ବେଳେ ଆଜି ପହଣ୍ଡି ପର୍ଯ୍ୟନ୍ତ ଶ୍ରୀଜୀଉଙ୍କ ପାଖରେ କେବଳ ଫଳ ଆହାର ଭୋଗ ଲାଗି କରାଯାଇଛି । ପାଟପଟୁଆର ବନାଟିଖେଳ ସହିତ ଆତସବାଜି ଦେଖିବାକୁ ମିଳିଥିଲା । ଦଇତା ସେବାୟତମାନେ ମହାପ୍ରଭୁଙ୍କୁ ମାଉସୀ ମା' ଘରକୁ ନିଆଗଲା । ମାଉସୀ ଘରେ ପହଞ୍ଚିଲା ପରେ ସ୍ନାନ କରାଯିବ ପରେ ପରେ ରାତ୍ରଧୂପ ଓ ମହାପ୍ରଭୁଙ୍କ ବଡ ସିଂହାରବେଶ ପରେ ଦହିପଖାଳ ଭୋଗ ଲାଗି କରାଯିବ ।
ରବିବାର ରଥଟଣା ସଠିକ ଭାବରେ ହୋଇ ନଥିବାରୁ ତାହା ଉତ୍ତର ଦିଗକୁ ମାଡି ଯାଇଥିଲା । ରାତିସାରା ରେଳ ବିଭାଗ ଯନ୍ତ୍ରୀ, କର୍ମଚାରୀ ପରିଶ୍ରମ କରି ରଥର ମୋଡକୁ ସଠିକ ଦିଗକୁ ଆଣିବା ପରେ ସୋମବାର ରଥଟଣା ସମ୍ଭବ ହୋଇଥିଲା ।
ଇଟିଭି ଭାରତ, କେନ୍ଦ୍ରାପଡା
