ଫୁଲବାଣୀ: ସରକାରୀ ଅର୍ଥ ଆତ୍ମସାତ ମାମଲାରେ ଦଣ୍ଡାଦେଶ ଶୁଣାଇଛନ୍ତି ସ୍ବତନ୍ତ୍ର ଭିଜିଲାନ୍ସ କୋର୍ଟ । ବୌଦ୍ଧ ଜିଲ୍ଲା ଆମ୍ବଝରୀ ପଞ୍ଚାୟତର ତତ୍କାଳୀନ ସମ୍ପାଦକ କୃତିବାସ ପଲିଆଙ୍କୁ 3 ବର୍ଷ ସଶ୍ରମ କାରାଦଣ୍ଡାଦେଶ ଦେଇଛନ୍ତି କୋର୍ଟ । ଏହାସହିତ ତିନି ଲକ୍ଷ ଟଙ୍କାର ଜୋରିମାନା କରିଛନ୍ତି ଏବଂ ଜୋରିମାନା ଅନଦେୟ ଅତିରିକ୍ତ 6 ମାସ ଜେଲଦଣ୍ଡ ଭୋଗିବାକୁ କୋର୍ଟ ନିର୍ଦେଶ ଦେଇଛନ୍ତି।
ସୂଚନା ଅନୁସାରେ 2009 ମସିହାରେ ପଞ୍ଚାୟତକୁ ଆସିଥିବା ଏସଜିଆରୱାଇ(ସମ୍ପୂର୍ଣ୍ଣ ଗ୍ରାମୀଣ ରୋଜଗାର ଯୋଜନା) ଯୋଜନା ଓ ଜି.ଆର ଯୋଜନାର 401.57 କୁଇଣ୍ଟାଲ ଚାଉଳକୁ ଆତ୍ମସାତ କରିଥିଲେ ପଲିଆ । ଏହା ସହିତ ନେନ୍ଦନ ଗାଁକୁ ବିଦ୍ୟୁତକରଣ ବାବଦକୁ ଆସିଥିବା ପଚାଶ ହଜାର ଟଙ୍କା ମଧ୍ୟ ଆତ୍ମସାତ କରିଥିଲେ। ମୋଟ ଉପରେ 301891 ଟଙ୍କା ହଡପ କରିଥିଲେ ସେକ୍ରେଟାରୀ । ବ୍ରହ୍ମପୁର ଭିଜିଲାନ୍ସ ପକ୍ଷରୁ ମାମଲା ରୁଜୁ କରାଯିବା ସହିତ ଖୋଳତାଡ କରାଯାଇଥିଲା। ମାମଲାରେ 21 ଜଣ ସାକ୍ଷୀ ସାକ୍ଷ୍ୟ ପ୍ରଦାନ କରିଥିଲେ।
ଦଣ୍ଡାଦେଶ ପରେ ଜାମିନରେ ଯାଇଛନ୍ତି ଦୋଷୀ ପଞ୍ଚାୟତ ସେକ୍ରେଟାରୀ । ମାମଲାକୁ ସରକାରଙ୍କ ପକ୍ଷରୁ ପବ୍ଲିକ ପ୍ରସିକ୍ୟୁଟର ସୁରେଶ ମହାପାତ୍ର ପରିଚାଳନା କରୁଥିଲେ।
କନ୍ଧମାଳରୁ ସଦାଶିବ ପାତ୍ର, ଇଟିଭି ଭାରତ
