ଫୁଲବାଣୀ: ଗଞ୍ଜେଇ ଚୋରା ଚାଲାଣକାରୀଙ୍କୁ ପିଛା କରି ଖାଇକୁ ଖସିଲା ପୋଲିସ ଗାଡି । କନ୍ଧମାଳ ଜିଲ୍ଲା ମଣ୍ଡାକିଆ ବୁଡାମାହା ଠାରେ ଦୁର୍ଘଟଣାଗ୍ରସ୍ତ ପୋଲିସ ଗାଡି । ଏଥିରେ ଥାନା ଅଧିକାରୀ ଅଲେଖ ଗରଡିଆ ଓ ଡ୍ରାଇଭର ଗୁରୁତର ଆହତ ହୋଇଛନ୍ତି ।
କନ୍ଧମାଳ ଜିଲ୍ଲାରେ ଗଞ୍ଜେଇ ମାଫିଆ ପୋଲିସଙ୍କୁ ନାକେଦମ କରି ରଖିଛି । ଆଜି ସକାଳେ ଏକ ଇଣ୍ଡିଗୋ କାରରେ ଗଞ୍ଜେଇ ଯାଉଥିବା ନେଇ ରାଇକିଆ ପୋଲିସକୁ ଖବର ମିଳିବା ପରେ ଥାନା ଅଧିକାରୀ ଅଲେଖ ଗରଡିଆ ନିଜ ଟିମ ଧରି କାରର ପିଛା କରିଥିଲେ । ହେଲେ ମଣ୍ଡାକିଆ ନିକଟରେ ପୋଲିସ ଗାଡି ଭାରସାମ୍ୟ ହରାଇ ଖାଇକୁ ଖସି ପଡିଥିଲା । ରାଇକିଆ ଥାନା ଅଧିକାରୀଙ୍କୁ ପ୍ରଥମେ ରାଇକିଆ ଓ ପରେ ଫୁଲବାଣୀ ଜିଲ୍ଲା ମେଡିକାଲ ଅଣାଯାଇଥିବା ବେଳେ ପରେ ଭୁବନେଶ୍ବରକୁ ସ୍ଥାନାନ୍ତର କରାଯାଇଛି । ଡ୍ରାଇଭରଙ୍କୁ ରାଇକିଆ ଡାକ୍ତରଖାନାରେ ଭର୍ତ୍ତି କରାଯାଇଛି।
ସେପଟେ, ଗଞ୍ଜେଇ ଭର୍ତ୍ତି କାର ଛାଡି ଚାଲାଣକାରୀ ଫେରରା ଥିବା ଜଣାପଡିଥିବାବେଳେ, ପୋଲିସ ଘଟଣାର ତନାଘନା ଆରମ୍ଭ କରିଛି । ଅନ୍ୟପଟେ, ସାରଂଗଡ ଓ ଟିକାବାଲି ଥାନା ଅଧିକାରୀ ସମ୍ପୃକ୍ତ ଗଞ୍ଜେଇ ଗାଡି ନିକଟରେ ଉପସ୍ଥିତ ରହି ଯାଞ୍ଚ କରୁଛନ୍ତି ।
କନ୍ଧମାଳରୁ ସଦାଶିବ ପାତ୍ର, ଇଟିଭି ଭାରତ
