ଫୁଲବାଣୀ: ଫୁଲବାଣୀ ବିଧାୟକ ଅଙ୍ଗଦ କହଁରଙ୍କ ମାନବିକତା ପ୍ରଦର୍ଶନକୁ ନେଇ ସହରରେ ଚର୍ଚ୍ଚା ଜୋର ଧରିଛି । କେହି କେହି ବିଧାୟକଙ୍କୁ ଏକ ରୋଲ ମଡେଲ ବୋଲି କହୁଛନ୍ତି । ଅଙ୍ଗଦ କହଁର ଫୁଲବାଣୀରୁ ଫିରିଙ୍ଗିଆ ପଟକୁ ଜରୁରୀ କାମରେ ନିଜ ଗାଡିରେ ଯାଉଥିବାବେଳେ ଫୁଲବାଣୀ ସ୍ଵୟଂଶାସିତ ମହାବିଦ୍ୟାଳୟ ନିକଟରେ ଏକ ବାଇକ ଭାରସାମ୍ୟ ହରାଇ ସାଇକଲ ଆରୋହୀଙ୍କୁ ଧକ୍କା ଦେବା ଫଳରେ ୨ ଜଣ ଗୁରୁତର ଆହତ ହୋଇଥିଲେ । ଫଳରେ ସେହିବାଟ ଦେଇ ଯାଉଥିବା ବିଧାୟକ ଏହା ଦେଖି ତତକ୍ଷଣାତ ଗାଡିକୁ ଓହ୍ଲାଇ ଆହତ ୨ ଜଣଙ୍କୁ ନିଜ ଗାଡିରେ ବସାଇ ଫୁଲବାଣୀ ସଦର ମହକୁମା ଡାକ୍ତରଖାନାରେ ଚିକିତ୍ସା ପାଇଁ ଭର୍ତ୍ତି କରିଥିଲେ ।
କେବଳ ସେତିକି ନୁହେଁ ଡାକ୍ତରଙ୍କ ସହ ଆଲୋଚନା କରି ସେମାନଙ୍କ ଚିକିତ୍ସା କଥା ମଧ୍ୟ ବୁଝି କରିଥିଲେ । ଫଳରେ ଦୁଇଟି ଅମୂଲ୍ୟ ଜୀବନ ନିଶ୍ଚିତ ମୃତ୍ୟୁମୁଖରୁ ବଞ୍ଚିଯାଇଥିଲ। । ବିଧାୟକଙ୍କ ଏଭଳି ସେବା ମନୋଭାବକୁ ସାଧାରଣରେ ବେଶ ପ୍ରଶଂସା କରାଯାଇଛି । ଲୋକେ ଦୁର୍ଘଟଣାରେ ଆହତଙ୍କୁ ଅଣଦେଖା ନକରି ସହଯୋଗର ହାତ ବଢାଇବା ଉଚିତ ବୋଲି ଫୁଲବାଣୀ ବିଧାୟକ ଅଙ୍ଗଦ କହଁର କହିଛନ୍ତି । ଫଳରେ ବହୁ ଅମୂଲ୍ୟ ଜୀବନ ରକ୍ଷା ହୋଇପାରିବ ବୋଲି ସେ କହିଛନ୍ତି ।
କନ୍ଧମାଳରୁ ସଦାଶିବ ପାତ୍ର, ଇଟିଭି ଭାରତ
