ଫୁଲବାଣୀ: କନ୍ଧମାଳ ଜିଲ୍ଲାରେ ଆତଙ୍କ । ବିଚ୍ ବଜାର ଉପରେ ଶହ ଶହ ଲୋକଙ୍କ ସାମ୍ନାରେ ଗୋଡେଇ ଗୋଡେଇ ହାଣିଲେ ଯୁବକଙ୍କୁ । ଏପରିକି ଗୋଟିଏ ହାତ ମଧ୍ୟ କାଟି ଫିଙ୍ଗି ଦେଲେ ଦୁର୍ବୃତ୍ତ । ସାରଙ୍ଗଡ ଥାନା ଅନ୍ତର୍ଗତ ପାବୁରିଆ ଛକରେ ଘଟିଛି ଏହି ନୃଶଂସ ହତ୍ୟାକାଣ୍ଡ । ଘୁ.ଉଦୟଗିରୀ ଏସଡିପିଓ ଓ ଦୁଇଟି ଟିମ୍ ପହଞ୍ଚି ତଦନ୍ତ ଆରମ୍ଭ କରିଛି । ହତ୍ୟା କରି ଫେରାର ହୋଇ ଯାଇଛନ୍ତି ଦୁର୍ବୃତ୍ତ।
ସୂଚନା ଅନୁସାରେ, ପୂର୍ବ ଶତ୍ରୁତାକୁ ନେଇ ଏହି ହତ୍ୟାକାଣ୍ଡ ଘଟିଛି ବୋଲି କହିଛନ୍ତି ଏସଡିପିଓ ଜୟକୃଷ୍ଣ ବେହେରା । ସଚିଦାନନ୍ଦ ନାୟକଙ୍କୁ (42) ପାବୁରିଆର ଆର ଆଇ ଅଫିସ ସାମ୍ନାରେ ଘେରି ଯାଇ ହାଣି ପକାଇଥିଲେ। ପରେ ହାତକୁ କାଟି ଫିଙ୍ଗି ଦେଇଥିଲେ।
ଏହି ନୃଶଂସ ହତ୍ୟାକାଣ୍ଡ ପରେ ଅଞ୍ଚଳରେ ଆତଙ୍କର ବାତାବରଣ ସୃଷ୍ଟି ହୋଇଛି । ରାସ୍ତା ଘାଟରେ ଯାନବାହନ ଚଳାଚଳ ବନ୍ଦ ରହିଛି। ପୋଲିସ୍ ଛାନଭିନ କରୁଥିବା ବେଳେ କାହାରିକୁ ଗିରଫ କରାଯାଇନାହିଁ । ହତ୍ୟାକାଣ୍ଡ ନେଇ ବିଭିନ୍ନ ସ୍ଥାନରେ ଚଢାଉ କରାଯାଉଛି ବୋଲି କହିଛନ୍ତି ଏସଡିପିଓ ।
କନ୍ଧମାଳରୁ ସଦାଶିବ ପାତ୍ର, ଇଟିଭି ଭାରତ
