ଫୁଲବାଣୀ : ପ୍ରେମ ସମ୍ପର୍କରେ ଲାଗିଲା ରକ୍ତର ଛିଟା । ପ୍ରେମିକାକୁ ହତ୍ୟା କଲା ପ୍ରେମିକ । ବିଶ୍ବାସରେ ଦେଲା ବିଷ । ଏଭଳି ଏକ ଘଟଣା ଦେଖିବାକୁ ମିଳିଛି କନ୍ଧମାଳ ଜିଲ୍ଲା ଦଡିଙ୍ଗିଆ ପଞ୍ଚାୟତର ଆମ୍ବେଦକର ନଗର ନିକଟରେ । ଗତ 14ରେ ହୋଇଥିବା ଯୁବତୀ ହତ୍ୟା ଘଟଣାରେ ନୃସଂଶ ପ୍ରେମିକକୁ ଗିରଫ କରିଛି ରାଇକିଆ ପୋଲିସ । ନିଜ ପ୍ରେମିକାକୁ ହତ୍ୟା କରିଥିବା ନେଇ ପୋଲିସ ଆଗରେ ସତ ମାନିଛି ଅଭିଯୁକ୍ତ ପଙ୍କଜ ଦିଗାଲ ।
ସୂଚନା ଅନୁସାରେ, ଗତ ୧୪ ତାରିଖରେ ଫୁଲବାଣୀ ଯାଉଥିବା କହି ଘରୁ ବାହାରିଥିଲେ ମଧ୍ୟ ଦିନ ତମାମ ପ୍ରେମିକ ପଙ୍କଜ ସହିତ ବୁଲାବୁଲି କରିଥିଲା ଅଞ୍ଜୁତା । ସନ୍ଧ୍ୟା ସାତଟା ପରେ ଗାଁକୁ ପ୍ରେମିକ ସହିତ ଫେରୁଥିବା ବେଳେ ଘର ଠାରୁ ଏକ କିମି ପୂର୍ବରୁ ମାଡେସୁଗାର ନିର୍ଜନ ରାସ୍ତା କଡ଼ରେ ଅଞ୍ଜୁତାର ବିରୋଧ ସତ୍ତ୍ବେ ଦୁଷ୍କର୍ମ କରିଥିଲା ପ୍ରେମିକ । ଆଉ ନିଜ ଗାଁକୁ ଯିବା ପାଇଁ କହିଥିଲା ।
କିନ୍ତୁ ଅଞ୍ଜୁତା ସାଙ୍ଗରେ ଯିବା ପାଇଁ ରାଜି ନ ହେବାରୁ ନୃସଂଶ ପ୍ରେମିକ ପଥରରେ ଛେଚି ହତ୍ୟା କରିଥିଲା । ପରେ ମୃତଦେହକୁ ରାସ୍ତାକଡ ବୁଦା ମୂଳରେ ଫୋପାଡି ଦେଇ ଚାଲି ଯାଇଥିଲା । ପରିବାର ଲୋକେ ଝିଅ ନ ଆସିବାରୁ ଖୋଜା ଖୋଜି କରିଥିଲେ l ଶୁକ୍ରବାର ସକାଳୁ ପରିବାର ଲୋକେ ଝିଅର ମୃତଦେହ ବୁଦା ମୂଳେ ପଡ଼ିଥିବା ଦେଖି ପୋଲିସକୁ ଖବର ଦେଇଥିଲେ l ପୋଲିସ ଘଟଣା ସ୍ଥଳରେ ପହଞ୍ଚି ମୃତଦେହ ଉଦ୍ଧାର କରିଥିଲା ।
ଘଟଣାର ତଦନ୍ତ ଆରମ୍ଭ କରି ପୋଲିସ ଅଭିଯୁକ୍ତକୁ ନିଜ ଗାଁ ଫିରିଙ୍ଗିଆ ଥାନା ଉପର ଦଣ୍ଡିକିଆରୁ ଗିରଫ କରିଥିଲା । ରବିବାର ଅଭିଯୁକ୍ତ ପୋଲିସ ଆଗରେ ସମସ୍ତ ଘଟଣା ସ୍ବୀକାର କରିଥିଲା । ଏହାପରେ ପୋଲିସ ଅଭିଯୁକ୍ତକୁ ଘଟଣାସ୍ଥଳକୁ ନେବାପରେ ଅଞ୍ଜୁତାକୁ କେମିତି ହତ୍ୟାକଲା ସେନେଇ ସମ୍ପୂର୍ଣ୍ଣ ଘଟଣାର ସିନ ରିକ୍ରିଏସନ୍ କରିଥିଲା ପ୍ରେମିକ । ଅଭିଯୁକ୍ତ ପଙ୍କଜ ଦିଗାଲ ପୂର୍ବରୁ 2015 ରେ ନିଜ ପତ୍ନୀକୁ ହତ୍ୟା କରି ଜେଲ ଯାଇଥିବା ନେଇ ଏସଡିପିଓ ଡି ତିରୁପତି ରାଓ ପଟ୍ଟନାୟକ ସୂଚନା ଦେଇଛନ୍ତି ।
ଇଟିଭି ଭାରତ, କନ୍ଧମାଳ
