କନ୍ଧମାଳ: ଜି ଉଦୟଗିରି ବିଧାୟକ ସାଲୁଗା ପ୍ରଧାନଙ୍କ ଦାଦାଗିରି । ଦଳୀୟ ସଭାରେ କର୍ମୀଙ୍କୁ ଖୁଲମଖୁଲା ଧମକ । ‘ତୁମ ଭୋଟ ପାଇ ବିଧାୟକ ହୋଇଛି, ଯଦି ଜିଲ୍ଲାପରିଷଦ ପ୍ରର୍ଥୀକୁ ଆଗାମୀ ନିର୍ବାଚନରେ ଜିତାଇବ ତେବେ ତୁମ ପାଇଁ କାମ କରିବି । ନଚେତ କାମ କରିବି ନାହିଁ’ ବୋଲି କହିଛନ୍ତି ବିଧାୟକ ।
ଦାରିଙ୍ଗବାଡିର ଡୁଲୁରି ନିକଟସ୍ଥ ପାଇନ ଜଙ୍ଗଲରେ ଆୟୋଜିତ ଏକ କାର୍ଯ୍ୟକ୍ରମରେ ଯୋଗଦେଇ ଏ କଥା କହିଛନ୍ତି ସାଲୁଗା ପ୍ରଧାନ । ଦାରିଙ୍ଗବାଡି ବ୍ଳକର ବ୍ରାହ୍ମଣୀ ଗାଁ ଅଞ୍ଚଳରେ ବିଜେଡିର ଭୋଟ ହାର କମିଥିବାରୁ ସେହି ଅଞ୍ଚଳର ସାଧାରଣ ଜନତା ଓ ଦଳୀୟ କର୍ମୀଙ୍କ ଉପରେ ବିଷୋଦଗାର କରିଛନ୍ତି ବିଧାୟକ । ସେହିପରି ସେ କହିଛନ୍ତି, ଯେଉଁମାନେ ମୋତେ ନିର୍ବାଚନରେ ଭୋଟ ଦେଇନାହାଁନ୍ତି ସେମାନଙ୍କ ପାଇଁ କିଛି କାର୍ଯ୍ୟ କରିବି ନାହିଁ ।
ଗୋଟେପଟେ ସୁପ୍ରିମୋ ପଢାଉଛନ୍ତି 5‘ଟି’ ମନ୍ତ୍ର । ଲୋକପ୍ରତିନିଧିଙ୍କୁ ଲୋକଙ୍କ ପାଖକୁ ପହଞ୍ଚି ଲୋକଙ୍କ କାମ କରିବା ପାଇଁ ଗୁରୁମନ୍ତ୍ର ଦେଇଛନ୍ତି ମୁଖିଆ । କିନ୍ତୁ ଅନ୍ୟପଟେ ଏହାର ବାସ୍ତବ ଚିତ୍ର ସଂପୂର୍ଣ୍ଣ ବିପରୀତ । ଶାସକ ଦଳର ବିଧାୟକଙ୍କ ଏପରି ସ୍ପଷ୍ଟ ଉଚ୍ଚାରଣ ଓ ଧମକ ସରକାରଙ୍କ ଅସଲ ମୁଖା ଖୋଲିଦେଇଛି । ଏ ସଂକ୍ରାନ୍ତରେ ବିଧାୟକଙ୍କ ସହ ଯୋଗାଯୋଗ କରାଯାଇଥିଲେ ସୁଦ୍ଧା କୌଣସି ପ୍ରତିକ୍ରିୟା ମିଳିପାରିନାହିଁ ।
କନ୍ଧମାଳରୁ ସଦାଶିବ ପାତ୍ର, ଇଟିଭି ଭାରତ
