ପୁରୀ: ଶିଶୁଙ୍କ କ୍ଷେତ୍ରରେ ଯୌନ ନିର୍ଯ୍ୟାତନା ରୋକିବା ଦିଗରେ ପୁରୀରେ ଆରମ୍ଭ ହୋଇଛି ୩ ଦିନିଆ ଜାତୀୟ କର୍ମଶାଳା । ଏହି କର୍ମଶାଳାରେ ଦେଶର ବିଭିନ୍ନ ରାଜ୍ୟର ପ୍ରତିନିଧି ଓ ଶିଶୁ ସୁରକ୍ଷା ଅଧିକାରୀ ଅଂଶଗ୍ରହଣ କରିଥିଲେ । ଓଡିଶା ହାଇକୋର୍ଟର ପୂର୍ବତନ ବିଚାରପତି ଜଷ୍ଟିସ ଡି.ପି ଚୌଧୁରୀ, ଏନସିପିସିଆରର ସଦସ୍ୟ ଜସୱନ୍ତ ଜୈନ୍, ରାଜ୍ୟ ଶିଶୁ ସୁରକ୍ଷା କମିଶନର ଅଧ୍ୟକ୍ଷା ସନ୍ଧ୍ୟାବତି ପ୍ରଧାନ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ ।
ତେବେ ଦିନକୁ ଦିନ ରାଜ୍ୟ ତଥା ଦେଶରେ ଶିଶୁଙ୍କ କ୍ଷେତ୍ରରେ ଯୌନ ନିର୍ଯ୍ୟାତନା ହାର ବୃଦ୍ଧି ପାଇବାରେ ଲାଗିଛି । ତେଣୁ, ଏହା ଉପରେ କିଭଳି ରୋକ ଲଗାଯାଇପାରିବ ସେନେଇ ବୈଠକରେ ଆଲୋଚନା କରାଯାଇଥିଲା । ସେପଟେ ରାଜ୍ୟ ସରକାର ସମସ୍ତ ଜିଲ୍ଲାରେ ଶିଶୁ ସୁରକ୍ଷା ପାଇଁ ସ୍ବତନ୍ତ୍ର ଥାନା ସ୍ଥାପନ କରନ୍ତୁ ବୋଲି ରାଜ୍ୟ ଶିଶୁ ସୁରକ୍ଷା ଆୟୋଗ ମୁଖ୍ୟମନ୍ତ୍ରୀ ଏବଂ ଡିଜିପିଙ୍କୁ ଅନୁରୋଧ କରିଛନ୍ତି । ସେହିପରି ସମାଜ ପ୍ରତେକ ବ୍ୟକ୍ତି ଶିଶୁଙ୍କ ସୁରକ୍ଷା ଦାୟିତ୍ୱ ନେଲେ ଏହି ନିର୍ଯ୍ୟାତନାକୁ ରୋକିହେବ ବୋଲି ମତ ପ୍ରକାଶ ପାଇଛି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
