କଳାହାଣ୍ଡି: ଜିଲ୍ଲା କେସିଙ୍ଗା ରେଲଓ୍ବେ ଷ୍ଟେସନରେ ଶନିବାର ସକାଳ ୧୧ ଟା ସମୟରେ ତପସ୍ବିନୀ ଏକ୍ସପ୍ରେସରେ ବଲାଙ୍ଗୀରରୁ ଆସୁଥିବା କିଛି ମହିଳା ଯାତ୍ରୀ ଲୁଟେରାଙ୍କ ଶିକାର ହୋଇଥିଲେ । ମହିଳା ଜଣକୁ ପାଖାପଖି ୪ ରୁ ୫ ମହିଳା ଘେରି ବସିଥିବା ବେଳେ ଦୁଇ ଜଣ ମହିଳା ସୌଖୀନ ଗହଣା ବିକ୍ରୀ ପାଇଁ ଦେଖାଇଥିଲେ । ଦଳର ଅନ୍ୟ ସଦସ୍ୟ ମଧ୍ୟ ଯାତ୍ରୀ ଭାବେ ଗହଣା ଦେଖୁଥିବାରୁ ମହିଳା ଯାତ୍ରୀ ମଧ୍ୟ ବିକ୍ରୀ ସାମଗ୍ରୀ ପରଖିଥିଲେ । ଠିକ ଏହି ସମୟ ଅସାବଧାନତା ଯୋଗୁଁ ଟ୍ରେନରେ ଯାତ୍ରା କରୁଥିବା ମହିଳା ଲୁଟେରା ତାଙ୍କ ଗହଣା ବ୍ୟାଗକୁ ଲୁଟ କରି ଚମ୍ପଟ ମାରିଥିଲେ ।
ମହିଳା ଯାତ୍ରୀ ହଠାତ ବ୍ୟାଗ ଲୁଟ ବିଷୟରେ ଜାଣିପାରି ଟ୍ରେନରେ ଡ୍ୟୁଟି କରୁଥିବା ଆରପିଏଫ ଯବାନଙ୍କୁ ଖବର ଦେଇଥିଲେ । ପରେ ଏହି ମହିଳାଙ୍କୁ କାବୁ କରିଥିଲେ ଯବାନ । ପ୍ରାୟ ୧୨ ମହିଳା ଲୁଟେରା ମହିଳାଙ୍କ ସମର୍ଥନରେ ଆରପିଏଫ ପୋଲିସ ସହ ଯୁକ୍ତି ଆରମ୍ଭ କରିଥିଲେ । ଏହି ସମସ୍ତ ମହିଳାଙ୍କୁ ସନ୍ଦେହରେ ଅଟକ ରଖିଛି ପୋଲିସ ।
ସମସ୍ତେ ମହାରାଷ୍ଟ୍ରର ହୋଇଥିବା ବେଳେ ସାଥିରେ ଦୁଇ ଶିଶୁ ମଧ୍ୟ ରହିଛନ୍ତି । କିନ୍ତୁ ଲୁଟର ଶିକାର ହୋଇଥିବା ମହିଳା ତାଙ୍କ ସାମଗ୍ରୀ ଫେରି ପାଇଛନ୍ତି । ରେଲଓ୍ବେ ପୋଲିସ ମାମଲାର ତଦନ୍ତ କରୁଥିବା ବେଳେ ୧୨ ମହିଳା ଲୁଟେରା ଦଳ ଆନ୍ତଃ ରାଜ୍ୟ ପେସାଦାର ଲୁଟେରା ବୋଲି ଆଶଙ୍କା କରାଯାଉଛି ।
କଳାହାଣ୍ଡିରୁ ଅଜିତ ସିଂ, ଇଟିଭି ଭାରତ
