ଭବାନୀପାଟଣା: ବିବାହ ଭୋଜିରେ ଯୋଗ ଦେବାକୁ ଯାଉଥିବା ସମୟରେ ଘଟିଲା ଦୁର୍ଘଟଣା । ରାସ୍ତାକଡରେ ଥିବା ଅଟୋକୁ କାର୍ ଧକ୍କା ଦେବା ଦ୍ବାରା ଘଟଣାସ୍ଥଳରେ ଜଣଙ୍କର ମୃତ୍ୟୁ ଏବଂ ୫ ଜଣ ଗୁରୁତର । ସୋମବାର କଳାହାଣ୍ଡିର ୨୬ ନଂ ଜାତୀୟ ରାଜପଥ ଘୁଳିଯୁବା ଛକ ନିକଟରେ ଘଟିଛି ଏହି ମର୍ମନ୍ତୁଦ ସଡକ ଦୁର୍ଘଟଣା ।
ସୂଚନା ଅନୁଯାୟ, କଳାହାଣ୍ଡି ଜିଲ୍ଲା ଲାଞ୍ଜିଗଡ଼ ବ୍ଲକ ଲଙ୍ଗଳବେଡା ଗାଁର କିଛି ଯୁବକ ଜୁନାଗଡ଼ ଥାନା ଚାରବାହାଲକୁ ଏକ ବିବାହ ଭୋଜିରେ ଯୋଗ ଦେବାକୁ ଯାଉଥିଲେ । ଘୁଳିଯୁବା ଛକ ନିକଟରେ କାର୍ ଭାରସାମ୍ୟ ହରାଇ ରାସ୍ତାକଡ଼ରେ ଛିଡା ହୋଇଥିବା ଏକ ଅଟୋ ସହ ଖୁବ୍ ଜୋରରେ ପିଟି ହୋଇଥିଲେ । ଫଳରେ ସେହିଠାରେ ହିଁ ଅଟୋ ଚାଳକଙ୍କ ମୃତ୍ୟୁ ହୋଇଯାଇଥିଲା । ସେପଟେ କାରରେ ଥିବା ୫ ଗୁରୁତରଙ୍କୁ ସ୍ଥାନୀୟ ଲୋକେ ଉଦ୍ଧାର କରି ହସ୍ପିଟାଲରେ ଭର୍ତ୍ତି କରିଥିଲେ ।
ଖବର ପାଇ ଘଟଣାସ୍ଥଳରେ ଜୁନାଗଡ଼ ପୋଲିସ ପହଞ୍ଚି ମୃତଦେହ ଉଦ୍ଧାର କରିବା ସହ ତଦନ୍ତ ଆରମ୍ଭ କରିଛି । ମୃତ ଅଟୋ ଡ୍ରାଇଭର ଜଣକ ବିଶ୍ୱନାଥପୁର ଗାଁର ପୁରନ୍ଧର ନାଏକ ବୋଲି ଜଣାପଡିଛି ।
କଳାହାଣ୍ଡିରୁ ଅଜିତ୍ କୁମାର ସିଂ, ଇଟିଭି ଭାରତ
