ଭବାନୀପାଟଣା: ଉଦଯାପିତ ହେଲା ଘୁମୁରା ୨୦୨୦ । ଶୁକ୍ରବାର ଥିଲା କଳାହାଣ୍ଡି ମହୋତ୍ସବର ଉଦଯାପନୀ ସନ୍ଧ୍ୟା । ସନ୍ଧ୍ୟା ରେ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ ଅନୁସୂଚିତ ଜାତି ଓ ଜନଜାତି ବିଭାଗ ମନ୍ତ୍ରୀ ଜଗ୍ନନାଥ ସାରକା, ଗୃହ ରାଜ୍ୟ ମନ୍ତ୍ରୀ ଦିବ୍ୟଶଙ୍କର ମିଶ୍ର, କଳାହାଣ୍ଡି ସାଂସଦ ବସନ୍ତ ପଣ୍ଡା, ପର୍ବତାରୋହୀ ଯୋଗବ୍ୟାସ ଭୋଇ, ମୁଷ୍ଟିଯୋଦ୍ଧା ସତ୍ୟପିର ପ୍ରଧାନ ଓ ଓଡିଶା ସ୍ବତନ୍ତ୍ର ଉନ୍ନୟନ ପରିଷଦ ଉପଦେଷ୍ଟା ସୁଜିତ କୁମାର ।
ଉଦଯାପନୀ ସନ୍ଧ୍ୟାରେ ନାରାୟଣ ସଦେଇ ସଂଗୀତ ମହାବିଦ୍ୟଳୟ କଳାକାରଙ୍କ ପ୍ରାରମ୍ଭିକ ସଙ୍ଗୀତ ଓ ମାଙ୍ଗଳିକରୁ ଆରମ୍ଭ ହୋଇଥିଲା କାର୍ଯ୍ୟକ୍ରମ । ମହାବୀର ସାଂସ୍କୃତିକ ଅନୁଷ୍ଠାନର ବୀର ବାଦ୍ୟ ଘୁମୁରା, ରାଜସ୍ଥାନର ମାଂନିହାର ନୃତ୍ୟରେ ଗର୍ଜି ଉଠିଥିଲା ରେଣ୍ଡୋମାଝୀ ମଞ୍ଚ । ବିଏସଏର ବଜାଶାଲ ବେଶ ଆକର୍ଷଣୀୟ ହୋଇଥିଲା । ସାଂସ୍କୃତିକ ସନ୍ଧ୍ୟାକୁ ଦର୍ଶକ ବେଶ ମନଭରି ଉପଭୋଗ କରିଥିବା ବେଳେ କଳାକାର ମଧ୍ୟ ନିଜ ପ୍ରତିଭାକୁ ପ୍ରସ୍ଫୁଟିତ କରିବା ପାଇଁ ଏଭଳି ମଞ୍ଚ ପାଇବାରୁ ବେଶ ଉତ୍ସାହିତ ଥିଲେ ।
ସେହିଭଳି ମଣିପୁରର ଢୋଲଚଲମ, ମହାରାଷ୍ଟ୍ରର ଲାବଣୀ ଓ ଶୁଭମ ଅନୁଷ୍ଠାନ ର ଆଦିବାସୀ ନୃତ୍ୟ ଉଦଯାପନୀ ସନ୍ଧ୍ୟାରେ ଦର୍ଶକ ଭିତରେ ଆଣିଦେଇଥିଲା ମାଦକତା । ରାତି ଯେତିକି ବଢୁଥିଲା,ନାଚ ଗୀତ ରେ ଦର୍ଶକ ସେତିକି ବିଭୋର ହୋଇଉଠୁଥିଲେ । ଏହି ଘୁମୁରା ମହୋତ୍ସବକୁ ବିଭିନ୍ନ କ୍ଷେତ୍ର ରେ ପରିଚାଳନା କରିଥିବା ବ୍ୟକ୍ତି ବିଶେଷ ମାନଙ୍କୁ ସମ୍ମାନିତ କରାଯାଇଥିଲା ।
କଳାହାଣ୍ଡିରୁ ଅଜିତ ସିଂ, ଇଟିଭି ଭାରତ
