ଭବାନୀପାଟଣା: ପ୍ରଧାନମନ୍ତ୍ରୀ ସଡକ ଯୋଜନାରେ ନିର୍ମାଣ ରାସ୍ତାରୁ ପିଚୁ ଉଠିବା ପରେ ଆରମ୍ଭ ହୋଇଥିଲା ତଦନ୍ତ । କଳାହାଣ୍ଡି ଜିଲ୍ଲା ଲାଞ୍ଜିଗଡ ବ୍ଲକ ଗ୍ରାମ୍ୟ ଉନ୍ନୟନ ବିଭାଗରେ ଥିବା କୁମଖାଲରୁ ସିନ୍ଧିବାହାଲି ପର୍ଯ୍ୟନ୍ତ ପ୍ରଧାନମନ୍ତ୍ରୀ ସଡକ ଯୋଜନାରେ କାର୍ଯ୍ୟ ହୋଇଥିଲା । ହେଲେ ଏହି ରାସ୍ତା ନିର୍ମାଣରେ ଠିକା ସଂସ୍ଥା ପକ୍ଷରୁ ପିଚୁ କାମ ଅତ୍ୟନ୍ତ ନିମ୍ନମାନର ହୋଇଥିବା ଅଭିଯୋଗ କରି ସ୍ଥାନୀୟ ଗ୍ରାମବାସୀ କାମ ବନ୍ଦ କରିଥିଲେ ।
ଏହା ପରେ ନିର୍ବାହୀ ଯନ୍ତ୍ରୀ କ୍ଷେତ୍ର ପରିଦର୍ଶନ କରି ରାସ୍ତାର ଦୁଇଟି ସ୍ଥାନରୁ ନମୁନା ସଂଗ୍ରହ କରି ତାର ପରୀକ୍ଷା ନିରୀକ୍ଷା କରିଥିଲେ । ପରୀକ୍ଷା ପରେ ରାସ୍ତାକାମ ନିମ୍ନମାନର ହୋଇଥିବା ଏବଂ ଏଥିରେ ସୁଧାର ଆଣିବା ସହ ବିଛା ଯାଇଥିବା ସମସ୍ତ ପିଚୁ ଉଠାଇ ପୁଣି ଥରେ ପିଚୁ କରାଯିବ ବୋଲି କହିଛନ୍ତି ।
ଏଥିସହ ରାସ୍ତା ନିର୍ମାଣ କାମ ତଦାରଖ ଦାୟିତ୍ବରେ ଥିବା ଅଧିକାରୀ ଓ ସମ୍ପୃକ୍ତ ଠିକା ସଂସ୍ଥାକୁ ମଧ୍ୟ ନିର୍ବାହୀଯନ୍ତ୍ରୀ ତାଗିଦ କରିଥିବା ଜଣାପଡିଛି ।
କଳାହାଣ୍ଡିରୁ ଅଜିତ ସିଂ, ଇଟିଭି ଭାରତ
