ଭବାନୀପାଟଣା: କଳାହାଣ୍ଡି ଜିଲ୍ଲା ସମେତ ରାଜ୍ୟରେ ବର୍ଷାର ଅଭାବ ଯୋଗୁଁ ଚାଷଜମି ଫାଟି ଆଁ କରିଛି । ଆଉ ଯେଉଁଠି ଜଳସେଚନ ସୁବିଧାରେ ଚାଷ ହୋଇଛି, ସେଠି ଏବେ ସାରର ଘୋର ଅଭାବ ଚାଷ ଉଜାଡିବାକୁ ବସିଲାଣି । କେନ୍ଦ୍ରରୁ ଆବଶ୍ୟକ ଅନୁଯାୟୀ ସାର ଆସୁ ନ ଥିବାରୁ ଜିଲ୍ଲାର ଏବେ ସାରର ଅଭାବ ଦେଖିବାକୁ ମିଳୁଛି ବୋଲି ଅଭିଯୋଗ କରିଛି BJD । ଆଜି (ବୁଧବାର) ଜିଲ୍ଲା ବିଜେଡି ସଭାପତି ପୁଷ୍ପେନ୍ଦ୍ର ସିଂଦେଓଙ୍କ ଅଧ୍ୟକ୍ଷତାରେ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଏକ ପ୍ରତିବାଦ ସଭା ଅନୁଷ୍ଠିତ ହୋଇଥିଲା ।
ଦଳ ଅଭିଯୋଗ କରିଛି, କେନ୍ଦ୍ର ସରକାର ଉଚିତ ପରିମାଣର ସାର ଯୋଗାଇବାରେ ବିଫଳ ହେବା ପରେ ବଜାରରେ ଏବେ ସାରର ଘୋର ଅଭାବ ଦେଖିବାକୁ ମିଳିଲାଣି । ଯାହାର ସୁଯୋଗ ନେଇ ଅସାଧୁ ବେପାରୀମାନେ କଳାବଜାରୀ ଆରମ୍ଭ କରିଦେଲେଣି । ଆଜି ଅନୁଷ୍ଠିତ ପ୍ରତିବାଦ ସଭାରେ ଅନେକ ବିଜେଡି ନେତା ଓ କର୍ମୀ ସାମିଲ ହୋଇ କେନ୍ଦ୍ର ସରକାର ବିରୋଧରେ ନାରାବାଜି କରିବା ସହ ଜିଲ୍ଲାପାଳଙ୍କୁ ଏକ ଦାବିପତ୍ର ପ୍ରଦାନ କରିଛନ୍ତି। ଏହା ସହ ଆଗାମୀ ଦିନରେ ମଧ୍ୟ ଚାଷୀଙ୍କ ସ୍ବାର୍ଥ ପାଇଁ ଲଢେଇ ଜାରି ରହିବ ବୋଲି ଦଳ ପକ୍ଷରୁ ସ୍ପଷ୍ଟ କରାଯାଇଛି ।
କଳାହାଣ୍ଡିରୁ ଅଜିତ କୁମାର ସିଂ, ଇଟିଭି ଭାରତ
