ଭବାନୀପାଟଣା: କୋଟିଆ ହାତେଇବାକୁ ଉଦ୍ୟମ ଜାରି ରଖିଥିବା ଆନ୍ଧ୍ରର ନଜର ଏବେ କଳାହାଣ୍ଡିର ନୀଳଗିରି ଗଛ ଉପରେ। ବନ୍ଧୁକ ମୁନରେ ଜୋର ଜବରଦସ୍ତି ଛଡାଇ ନେଇଛନ୍ତି ଥୁଆମୂଳ ରାମପୁର ପେଙ୍ଗଢୁସି ଗ୍ରାମର 15 ଟି ପରିବାର 3 ଶହ ଟ୍ରିପ ନୀଳଗିରି ଗଛ । ଏନେଇ ପୋଲିସ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରିନଥିବା ବେଳେ ହାଇକୋର୍ଟ ଦ୍ୱାରସ୍ଥ ହୋଇଥିଲେ ସ୍ଥାନୀୟ ଗ୍ରାମବାସୀ । କୋର୍ଟ ନିର୍ଦ୍ଦେଶ ପରେ ବି କାର୍ଯ୍ୟାନୁଷ୍ଠାନ ନ ହେବାରୁ ଏବେ ଏସପିଙ୍କ ଦ୍ୱାରସ୍ଥ ହୋଇଛନ୍ତି । ସଂଗ୍ରାମୀ ନେତା ରୋହିତ ଦୁର୍ଗାଙ୍କ ଦ୍ବାରା ଏସପିଙ୍କୁ ଏକ ଦାବିପତ୍ର ପ୍ରଦାନ କରାଯାଇଛି।
ଏନେଇ ଏସପି ଅଭିଳାଷ ଜୀ ଏହି ଘଟଣାରେ ଥୁଆମୂଳ ରାମପୁର ପୋଲିସକୁ ତଦନ୍ତ ନିର୍ଦ୍ଦେଶ ଦେଇଛନ୍ତି । ଅନ୍ୟପଟେ ଏନେଇ କାର୍ଯ୍ୟାନୁଷ୍ଠାନ ଗ୍ରହଣ କରାନଗଲେ ଆଦିବାସୀଙ୍କ ସ୍ୱାର୍ଥ ପାଇଁ ଜିଲ୍ଲାପାଳଙ୍କ ଅଫିସ ସମ୍ମୁଖରେ ଅନିର୍ଦ୍ଦିଷ୍ଟ କାଳ ପାଇଁ ଧାରଣା ଦେବୁ କହିଛନ୍ତି ରୋହିତ ଦୁର୍ଗା । ସୂଚନା ଆଉକି, ପେଙ୍ଗଧୁସି ଗ୍ରାମର ଆସ୍ତୁ ମାଝୀ ଓ ଅନ୍ୟ 14 ଜଣ ଚାଷୀ ନିଜ ଜମିରେ ନୀଳଗିରି ଗଛ ୟୁ ହରି କ୍ରିଷ୍ଣାଙ୍କ ସହାୟତାରେ ଲଗେଇ ଥିଲେ ।
ହେଲେ ୟୁ ହରି କ୍ରିଷ୍ଣାଙ୍କ 2020 ରେ ମୃତ୍ୟୁ ହୋଇଥିଲା । କିନ୍ତୁ ଅକ୍ଟୋବରରୁ ଜାନୁଆରୀ ମଧ୍ୟରେ ଆନ୍ଧ୍ରର କେଭି ମୋହନ, ଆଲା ଲୋକେଶ, ଆଲା ଭାରା ନାମକ ବ୍ୟକ୍ତି ଏଠାରୁ ଆସି ମାରଣାସ୍ତ୍ର ଦେଖାଇ ରାତି ଅଧିଆ ଏମାନଙ୍କ ୩ ଶହ ଟ୍ରିପ ଗଛ କାଟି ନେଇଥିବା ଆଦିବାସୀ ମାନେ ଅଭିଯୋଗ କରିଛନ୍ତି ।
ଏଥି ସହ ଆମକୁ ବନ୍ଧୁକ ମୁନରେ କାଠ ମାଫିଆ ମାନେ ଡ଼ରାଇ ଥିବା ସେମାନେ କହିଛନ୍ତି । ଏନେଇ ସ୍ଥାନୀୟ ପୋଲିସର ଦ୍ୱାରସ୍ଥ ହୋଇଥିଲେ କିଛି ସହଯୋଗ ମିଳିପାରିନଥିଲା । ଏହାପରେ ଏହି ପ୍ରସଙ୍ଗ ନେଇ ହାଇକୋର୍ଟର ଦ୍ୱାରସ୍ଥ ହୋଇଥିଲେ 15 ପରିବାର । ଗତ ଫେବୃଆରୀ 3ରେ ଥୁଆମୂଳ ରାମପୁର ପୋଲିସକୁ ମାମଲା ରୁଜୁ କରିବାର ନିର୍ଦ୍ଦେଶ ଦିଆଯାଇଥିଲା । ହେଲେ ପୋଲିସ କିଛି ପଦକ୍ଷେପ ଗ୍ରହଣ କଲା ନାହିଁ । ଫଳରେ ଏହି ଗଛ ହରାଇଥିବା 15 ଚାଷୀ ଏସପିଙ୍କ ଦ୍ୱାରସ୍ଥ ହୋଇଥିଲେ । ଏସପି ଘଟଣାର ସମ୍ବେଦନଶୀଳକୁ ଦେଖି ତଦନ୍ତ ନିର୍ଦ୍ଦେଶ ଦେଇଛନ୍ତି ।
ଏହି ଅଞ୍ଚଳରେ 20ରୁ ଊର୍ଦ୍ଧ୍ବ ଚାଷୀ ନୀଳଗିରି ଚାଷ କରିଛନ୍ତି । ମାତ୍ର ଆନ୍ଧ୍ର କାଠ ମାଫିଆଙ୍କ ଗୁଣ୍ଡା ରାଜ ଦେଖି ସେମାନେ ଭୟଭୀତ ଅବସ୍ଥାରେ ଅଛନ୍ତି । ଏମିତି କି ଏମାନେ ସେଠାକାର କିଛି ସ୍ଥାନୀୟ ଗୁଣ୍ଡାକୁ ବି ଲଗାଇ ଡରାଉ ଥିବା ଅଭିଯୋଗ ହୋଇଛି । ଏମାନଙ୍କ ଜୀବନ ପ୍ରତି ବିପଦ ଥିବା ନେଇ ମଧ୍ୟ ଏସପିଙ୍କୁ ଜଣାଇଛନ୍ତି । ତେବେ ପୋଲିସ ପ୍ରଥମରୁ କାହିଁକି ସୁରକ୍ଷା ଦେଲା ନାହିଁ ତାହା ନେଇ ସନ୍ଦେହ ସୃଷ୍ଟି ହୋଇଛି। ଏହି ଘଟଣା ନେଇ ଆଦିବାସୀ ମାନେ କମିଶନଙ୍କ ପାଖରେ ଅଭିଯୋଗ ପାଇଁ ପ୍ରସ୍ତୁତ ହେଉଛନ୍ତି।
ଇଟିଭି ଭାରତ, କଳାହାଣ୍ଡି
