ଝାରସୁଗୁଡା: ମହାମାରୀ କୋରୋନା ଲୋକଙ୍କ ମନରେ ଏଭଳି ଆତଙ୍କ ଖେଳାଇ ଦେଇଛି ଯେ ଜଣେ ସ୍ବାଭାବିକ ମୃତ୍ୟୁବରଣ କରିଥିଲେ ମଧ୍ୟ ତାଙ୍କ ମୃତଦେହ ପାଖକୁ କେହି ଯାଉ ନାହାନ୍ତି । ନିଜ ସମ୍ପର୍କୀୟ ଯେଉଁଠାରେ ଯାଉ ନାହାନ୍ତି ସେଠାରେ ସାହି ପଡ଼ିଶା ଘର ଲୋକ ଅବା କାହିଁକି ଯିବେ । ଏଭଳି ପରିସ୍ଥିତିରେ ଅନେକ ସ୍ବେଚ୍ଛାସେବୀ ସଂଗଠନ ମାନବିକତା ଦେଖାଇ ମୃତକଙ୍କ ଦାହ ସଂସ୍କାର କରିବାକୁ ଆଗେଇ ଆସୁଛନ୍ତି।
ଏଭଳି ଏକ ଅଭାବନୀୟ ଘଟଣା ଘଟିଛି ଝାରସୁଗୁଡା ଜିଲ୍ଲା କୋଲାବିରା ବ୍ଲକ୍ ରଘୁନାଥପାଲି ଗ୍ରାମରେ । ଶିବ ଶଙ୍କର ମେହେରଙ୍କ ଗୁରୁବାର ସନ୍ଧ୍ୟାରେ ବାର୍ଦ୍ଧକ୍ୟ ଜନିତ ମୃତ୍ୟୁ ଘଟିଥିଲା। ତାଙ୍କ ମୃତ୍ୟୁପରେ ପରିବାର ଲୋକ ସମ୍ପର୍କୀୟ ଓ ଜ୍ଞାତିକୁଟୁମ୍ବଙ୍କୁ ଟେଲିଫୋନ୍ କରି ଜଣାଇଥିଲେ। ମୃତକଙ୍କ ଦାହ ସଂସ୍କାର ପାଇଁ ସେମାନଙ୍କୁ ଅନୁରୋଧ କରିଥିଲେ। ଘର ପାଖରେ ଥିବା ସାହି ପଡିଶାର ଲୋକଙ୍କୁ ମଧ୍ୟ ଅନୁରୋଧ କରିଥିଲେ।
ହେଲେ କୋରୋନା ଭୟରେ କେହି ମୃତଦେହକୁ ଛୁଇଁବା ତ ଦୂରର କଥା ପାଖକୁ ଦେଖିବାକୁ ମଧ୍ୟ ଆସି ନଥିଲେ। ଫଳରେ ମୃତଦେହ ଦୀର୍ଘ ୧୫ ଘଣ୍ଟା ପଡ଼ି ରହିଥିଲା। ବୃଦ୍ଧଙ୍କ ଏକମାତ୍ର ପୁଅ ଅକ୍ଷୟ ଅସହାୟ ହୋଇ ପଡ଼ିଥିଲେ।
ଶେଷରେ ପଶ୍ଚିମ ଓଡିଶା ଯୁବା ମଞ୍ଚର ସଦସ୍ୟଙ୍କୁ ଜଣାଇଥିଲେ । ମଞ୍ଚର ଆବାହାକ ରଞ୍ଜନ ସାହୁ, ସଭ୍ୟ ତେଜସ୍ବୀ ସାହୁ, ସଚ୍ଚିଦା ପ୍ରଧାନ ଓ ସୁରଜ ପ୍ରଧାନ ଶବସତ୍କାର କରିବାକୁ ଆଗେଇ ଆସିଥିଲେ। ସେମାନେ ଏକ ପିକ୍ଅପ୍ ଆଣି ମୃତଦେହକୁ ସମ୍ମାନର ସହିତ ଗାଁ ମଶାଣିକୁ ନେଇ ସେଠାରେ ସତ୍କାର କରିଥିଲେ।
ଯୁବ ସଂଗଠନର ଏଭଳି କାର୍ଯ୍ୟକୁ ବିଭିନ୍ନ ମହଲରେ ପ୍ରଶଂସା କରାଯାଇଛି । କୋରୋନା ରୋଗକୁ ଘୃଣା କର ରୋଗୀକୁ ନୁହେଁ ବୋଲି କହି ସମସ୍ତଙ୍କୁ ସଚେତନ କରିଛନ୍ତି ପଶ୍ଚିମ ଓଡିଶା ଯୁବା ମଞ୍ଚ ଆବାହକ ରଞ୍ଜନ ସାହୁ।
ଝାରସୁଗୁଡାରୁ ରବି ନାରାୟଣ ସାହୁ, ଇଟିଭି ଭାରତ
