ଝାରସୁଗୁଡା: ଦେଶର ବିଭିନ୍ନ ବିମାନବନ୍ଦରରୁ ରିଜିଓନାଲ କମ୍ୟୁନିକେଶନ ସ୍କିମ ଉଡାନ ଯୋଜନାରେ ନୂଆ ରୁଟରେ ବିମାନ ସେବା ଆରମ୍ଭ ହେବ । ଏହି ପରିପ୍ରେକ୍ଷୀରେ କେନ୍ଦ୍ର ବେସାମରିକ ବିମାନ ଚଳାଚଳ ମନ୍ତ୍ରଣାଳୟ ପକ୍ଷରୁ ଝାରସୁଗୁଡ଼ାର ବୀର ସୁରେନ୍ଦ୍ର ସାଏ ବିମାନ ବନ୍ଦର(Veer Surendra Sai Airport)କୁ ନୋଡାଲ ବିମାନବନ୍ଦର ଭାବେ ଗ୍ରହଣ କରାଯାଇ ଉଡାନ ଦିବସ ((udaan utsav) ପାଳିତ ହେବ । ଏଥିରେ କେନ୍ଦ୍ର ବେସାମରିକ ବିମାନ ଚଳାଚଳ ଜ୍ୟୋତିରାଦିତ୍ୟ ସିନ୍ଧିଆ( Civil Aviation Minister Jyotiraditya Scindia)ଙ୍କ ସମେତ ବିଭାଗୀୟ ଅଧିକାରୀ ଯୋଗ ଦେବେ । ଏ ନେଇ ସମସ୍ତ ପ୍ରସ୍ତୁତି ଶେଷ ହୋଇଛି ।
ଉଡ଼ାନ ଦିବସ ପାଳନ ଅବସରରେ କେନ୍ଦ୍ରମନ୍ତ୍ରୀ ଜ୍ୟୋତିରାଦିତ୍ୟ ସିନ୍ଧିଆ ଝାରସୁଗୁଡ଼ା ବିମାନ ବନ୍ଦର ପାଇଁ ଆଉ କିଛି ରୁଟ୍ ପାଇଁ ବିମାନ କିମ୍ବା ବିମାନ ବନ୍ଦରର ବିକାଶ ଦିଗରେ କୌଣସି ଘୋଷଣା କରିପାରନ୍ତି ବୋଲି ସ୍ଥାନୀୟ ଲୋକେ ଆଶା ରଖିଛନ୍ତି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି (PM Narendra Modi)ଙ୍କ ଦୂରଦୃଷ୍ଟି ସମ୍ପର୍ଣ୍ଣ ସରକାରଙ୍କର ଉଡାନ ଯୋଜନା ସାଧାରଣ ଲୋକଙ୍କ ସ୍ବପ୍ନ ଓ ଆକାଂକ୍ଷାକୁ ପୂରଣ କରିଛି । ଦେଶର ବ୍ୟାବସାୟିକ ରାଜଧାନୀ ମୁମ୍ବାଇ ଏବଂ ଆଇଟି ହବ ବାଙ୍ଗାଲୋର ସହିତ ଭୁବନେଶ୍ବର, ରାୟପୁର, କୋଲକାତା, ହାଇଦ୍ରାବାଦ, ଦିଲ୍ଲୀ, ଚେନ୍ନାଇକୁ ଝାରସୁଗୁଡ଼ାରୁ ବିମାନ ସେବା ମିଳୁଛି ।
ଉତ୍ସବରେ ଦେଶର ଶ୍ରେଷ୍ଠ ବିମାନବନ୍ଦର ଓ ଏୟାରଲାଇନ୍ସକୁ ସମ୍ବର୍ଦ୍ଧିତ କରାଯିବା ସହ ଅନ୍ୟାନ୍ୟ କାର୍ଯ୍ୟକ୍ରମ ରହିଛି । ଏଥିପାଇଁ ବିମାନବନ୍ଦରକୁ ସୁସଜ୍ଜିତ କରାଯାଇଛି । ଓଡିଶାର କଳା, ସଂସ୍କୃତି ଓ ଐତିହକୁ ନେଇ ବିଭିନ୍ନ ଚିତ୍ରକଳା ପ୍ରଦର୍ଶନ ହୋଇଛି ।
ଝାରସୁଗୁଡ଼ାରୁ ଗୁରୁଚରଣ ବାଘଙ୍କ ରିପୋର୍ଟ,ଇଟିଭି ଭାରତ
