ଯାଜପୁର: ସୁନ୍ଦରପୁର ହତ୍ୟା ମାମଲାରେ ପୋଲିସର ତଦନ୍ତରେ ଶିଥିଳତା ପ୍ରତିବାଦରେ ଗ୍ରାମବାସୀଙ୍କ ଥାନା ଘେରାଉ । ହତ୍ୟାକାଣ୍ଡର ଦୋଷୀକୁ ତୁରନ୍ତ ଗିରଫ କରିବାକୁ ଗ୍ରାମବାସୀ ଦାବି କରିଛନ୍ତି ।
ସୂଚନା ଅନୁଯାୟୀ ଯାଜପୁର ଜିଲ୍ଲା ବିଂଝାରପୁର ଥାନା ଅନ୍ତର୍ଗତ ସୁନ୍ଦରପୁର ଗ୍ରାମର ଅଜୟ ନାୟକଙ୍କ ଛାତ ଉପରୁ ଗତ 17 ତାରିଖରେ ଜଣେ ଯୁବକଙ୍କୁ ରକ୍ତାକ୍ତ ଅବସ୍ଥାରେ ଉଦ୍ଧାର କରାଯାଇଥିଲା । ପରେ ତାଙ୍କୁ ସ୍ଥାନୀୟ ମେଡିକାଲରେ ଭର୍ତି କରାଯାଇ ଥିବାବେଳେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ମୃତକ କେନ୍ଦ୍ରାପଡା ଜିଲ୍ଲା ଆଳି ଥାନା ପରମାନନ୍ଦପୁର ଗ୍ରାମର ଅଜୟ ନାୟକଙ୍କ ପୁଅ ବିଶ୍ଵଜିତ ନାୟକ ବୋଲି ଜଣାପଡିଛି । ଗତ ମାସ 18 ତାରିଖ ଦିନ ତାଙ୍କର ନିର୍ବନ୍ଧ ଥିବାବେଳେ ସେ କୌଣସି ଏକ କାମରେ ଘରୁ ଆସି ଆଉ ଫେରି ନଥିଲେ । ପରେ ସେ ଅଜୟ ନାୟକଙ୍କ ଛାତ ଉପରେ ରକ୍ତାକ୍ତ ଅବସ୍ଥାରେ ପଡିଥିବା ଫୋନ ଯୋଗେ ପରିବାର ଲୋକେ ଖବର ପାଇଥିଲେ । ତେବେ ତାଙ୍କ ପୁଅକୁ ହତ୍ୟା କରାଯାଇଥିବା ଥାନାରେ ଅଭିଯୋଗ ହୋଇଥିବା ବେଳେ ପୋଲିସ ଏକ ହତ୍ୟା ମାମଲା ରୁଜୁ କରି ଚୁପହୋଇ ବସିରହିଥିବା ଅଭିଯୋଗ ହୋଇଛି । ଏହାକୁ ନେଇ ଆଜି ପ୍ରମାନନ୍ଦପୁର ଗ୍ରାମର କିଛି ଲୋକ ବିଂଝାରପୁର ଥାନା ଘେରାଉ କରିବା ସହ ଘଟଣାର ତଦନ୍ତ କରି ଦୋଷୀକୁ ଗିରଫ କରିବାକୁ ଦାବି କରିଛନ୍ତି ।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
