ଯାଜପୁର: ସ୍ଥାନୀୟ ନରସିଂହ ମହାବିଦ୍ୟାଳୟରେ ଅତିଥି ଅଧ୍ୟାପକ ନିଯୁକ୍ତିକୁ ବିରୋଧ କରି ଦେଖା ଦେଇଛି ଛାତ୍ର ଅଶାନ୍ତି । ଶତାଧିକ ଛାତ୍ରଛାତ୍ରୀ ଏନେଇ ଗେଟ ବନ୍ଦ କରି ତାଲା ପକାଇବା ସହ ନିଯୁକ୍ତ ଅଧ୍ୟାପକ ପ୍ରଦୀପ ବେହୁରିଆଙ୍କୁ ନିଲମ୍ବନ ଦାବି କରିଛନ୍ତି ।
ଛାତ୍ରଛାତ୍ରୀଙ୍କ ଅଭିଯୋଗ ଅନୁଯାୟୀ 2 ବର୍ଷ ତଳେ ଏହି ଅଧ୍ୟାପକ କଲେଜରେ ନିଯୁକ୍ତି ପାଇଥିଲେ । ତାଙ୍କ କାର୍ଯ୍ୟକାଳ ସମୟରେ ସେ କଲେଜର ଛାତ୍ରଛାତ୍ରୀଙ୍କ ସହ ଅଧ୍ୟାପକଙ୍କୁ ମଧ୍ୟ ଖରାପ ବ୍ୟବହାର ପ୍ରଦର୍ଶନ କରିଥିଲେ । ତେଣୁ ତାଙ୍କୁ କଲେଜରୁ ଅତିଥି ଅଧ୍ୟାପକ ପଦରୁ ବହିଷ୍କାର କରାଯାଇଥିଲା । ଚଳିତ ନିର୍ବାଚନୀରେ ସେ ସ୍ବାଧୀନ ପ୍ରାର୍ଥୀ ଭାବେ ଯାଜପୁର ଲୋକସଭା ଆସନରୁ ପ୍ରତିଦ୍ବନ୍ଦିତା ମଧ୍ୟ କରିଥିଲେ । ତେଣୁ କିଭଳି ଏବଂ କେଉଁ ପରିସ୍ଥିତିରେ କଲେଜ ପ୍ରିନ୍ସିପାଲ ତାଙ୍କୁ ପୁର୍ନବାର ନିଯୁକ୍ତି ଦେଇଛନ୍ତି ସେନେଇ ପ୍ରଶ୍ନ ଉଠାଇଛନ୍ତି ଛାତ୍ରଛାତ୍ରୀ ।
ଅନ୍ୟପଟେ ନିଯୁକ୍ତ ଅତିଥି ଅଧ୍ୟାପକଙ୍କୁ ଯଥାଶୀଘ୍ର ବହିଷ୍କାର କରାନଗଲେ ଆନ୍ଦୋଳନ ଜାରି ରହିବ ବୋଲି ଛାତ୍ରଛାତ୍ରୀ ଚେତାବନୀ ଦେଇଛନ୍ତି । ସେପଟେ କଲେଜ କମିଟି ସହ ଆଲୋଚନା କରାଯାଇ ଯଥାଶୀଘ୍ର କାର୍ଯ୍ୟାନୁଷ୍ଠାନ ନିଆଯିବ ବୋଲି ପ୍ରିନ୍ସିପାଲ ସୂଚନା ଦେଇଛନ୍ତି ।
ଯାଜପୁରରୁ ଜ୍ଞାନରଞ୍ଜନ ଓଝା, ଇଟିଭି ଭାରତ
